1Raja-raja Uram 12

Sun Israel nang bokoka atei bitinyi kiboka kubmai uram deyok

12:1-24

(2Taw. 10:1–11:4)

1Ura, Rehabeam bisi sienyi tikeibkwamai ati, Israel nang nirya ara Sikhem atei bulubmai. Ba, Rehabeam bira aminda sun a buluboka wekmai atei binmou. 2Nebat mi Yerobeam bira sienyi Salomo dam aryi deibloburyi, Mesir atei iniboka bindamuryi, a kuroramwe. Ani, Yerobeam biryi ato uram kekebmou, “Israel nang ab, Rehabeam ab Sikhem atei dam tonkwa wekmang,” en uram kekebmou. Ura, erci Mesir atei aryi kuboka Israel atei tamurbinmou. 3Ura, Yerobeam ab, sun eitam Israel mutuk nang ab aryi, Rehabeam bisi yanmaici ersi ato ebmai, 4“Kan nai Salomo biryi ilila ikin wa asi nunsi takubdeibsou. Asi kanci nunsi, a bobdeibsou ikin asi dobkaboka caknam kibdeibsurum. Ba, nunda kanyi teleb asa aryi kan ebminyi tok kunubkwayeb,” ebmai. 5Ato ebmai bok, Rehabeam biryi sunsi ato ebmou, “Bindobdarur! Binmamunyi ani, uki winiryi mabmunci, tubto ni dam yandarur,” ebmou ura, a ninyi nirya bindobmai.

6Ura, Rehabeam biryi sun akatei wisi-wisi nang asi ato eboka asibmou, “Akatei ninyi asi niryi sunsi una kuboka ebtinyi do?” ebmou. A wisi-wisi nang ara minob ura er nai Salomo kam kuramuryi, sienyi kiboka taleamwe. A talak ara er dam bukoka, “Ato kubdum-ato kuna mem,” erdeiramnyi nang kuramnyi. 7Uca, a wisi-wisi nang aryi ersi ato ebmai, “Kanci diba ati akatei sienyi kibkwaminyi ura, kanci sunsi uram teleb akwe ebkarebminyi ba, sunda iya ati busul kuboka kan atei ninyi kibingnyi ura, kan ebmaminyi tok kunuboka milinkwanking,” ebmai. 8Ebmai bok, Rehabeam biryi, “Ato ebkwandum,” ebmai uram malyi kiblobokmouci, er kwit yabwe kam nang, er kikib nang asi, “ ‘Ato kubdum,’ ebnindarur,” eboka molobmou. 9Ara, ato eboka sunsi molobmou, “Kan nai biryi takubdeiboka bisou ikin asi caknam kibdeibsurum, enmaning ati, sun tenebmarum ara niryi sunsi una kuboka ebtinyi do,” eboka er kikib kabir nang asi asibdenmou. 10Uca, “ Kanci sunsi ato ebdum, ‘Ni taruk teltelekca ara ni nai mirikna atoa kuma eda nira weiki! 11Akiryi, ni nai biryi ikin weik dinyi ab, mambul dinyi ab takubdeiboka bindobsou asi, niryi sunsi tubto ikin dinyi ab, mambul dinyi ab tabakdongobkwinsin. Tonda, ni nai biryi sunsi tabwe litukna aryi etereransou. Bok, ukura niryi sunsi besi tiling-tilinga tabwe litukna aryi eterebkwinsin,’ ebdum,” ebmai.

12Ura, sienyi Rehabeam biryi, “Uki winiryi tum aryi, tubto ni dam yandarur!” ebdeibmou to kuboka er dam binmai. Ara, Yerobeam ab, sun Israel nang nirya aryi tubto er dam binmai. 13Sienyi Rehabeam dam sirya binmai ura, wisi-wisi nang aryi, “Ato kuboka sunsi ebkwandum,” ebdeibmai to kum ebmou, eda sunsi uram malyi mikibanun ebmou. 14Eda, er kikib nang aryi, “Sun Israel nang asi ato ebkwandum,” ebmai. Ara, “Ni nai biryi sunsi weik ikin ara sirya bobdeibsou. Bok, niryi a bobdeibsou ikin asi, tubto tabakdongoboka weik ikin bobdeibkwansin. Ara, minob ura ni nai biryi sunsi tabwe litukna aryi etereransou. Bok, nira besi tiling-tilinga tabwe litukna aryi sunsi eterebkwansin,” ebkwandum ebdeibmai to kuboka sunsi ebmou. 15Ara, Er Iya Erebdobnyi tenen dinyi aryi kubminikmou. Ba, sienyi biryi sun Israel nang molobmai dinyi kum kekebmou. Ara, minob uca, Er Iya Erebdobnyi biryi Nebat mi Yerobeam bisi Er Imtamnyi uram ermurunanyi nabi Ahia, Silo ateinyi deici aryi, “Rehabeam taruk dam aryi iya ati sienyi kiboka talen dinyi ara dobokabniryi, Yerobeam kanti atei takubaryi karebkwankin,” to ati kunubmou.

16Ura, sienyi Rehabeam biryi sun Israel eitam mutuk nang molobmai dinyi kekeboka kum karebmou ba, sienyi bisi ato ebmai, “Daud bira nun atei nang darib?

A Isai mi Daud biryi nunti er boranci dinyi ton da kum karebsici ba, dobkwamab!

Ati, nun Israel nang ara er yuk a takloboka nun atei baronkwayeb!

Ba, Daud mi er yuk, er yala nang asi a sienyi kiboka kalikoka taleronkwande!”

Ato ebmaici, sun Israel eitam mutuk nang nirya ara atei yuk-yuk bindobmai. 17Ba, Rehabeam bira sun Israel me youkwetam Yehuda mutuk kuramnyi ninyi demang ati, sun sienyi kiboka talebmou. 18Ura, sienyi Rehabeam biryi il wa in nang sun sienyi si Adoram bisi, “Kalingbirum,” eboka bokeibmou. Uca, sun eitam Israel mutuk nang aryi Adoram bisi keil aryi donokoka obmai ba, dibmou. Ba, sienyi Rehabeam bira a eibmoua ilil ati ola asa aryi er atei Yerusalem bindobmou. Ani, er kereta dub ola weleboka burbinman kumto kubmou cok, weleburbindoka Yerusalem bindobmou. 19Ato kuboka sun Israel mutuk ninyi aryi Daud deibdoba ai ninyi asi, “Nun li,” eboka mar iramnyi dinyi ara uku talak ababyi tuba mar irdanung. 20Sun Israel mutuk ninyi aryi kekenmai uca, “Yerobeam bira Mesir aryi kuboka sirya tamuryanmar,” ebmai ura, sunci ersi nabokabiryi, uram sisikyi ura, ersi sunci Israel mutuk eitam mutuk sienyi tikeibmai. Ba, Israel mutuk ninyi aryi Daud deibdoba ai ninyi ara ton kum milibmaici, eda Yehuda yala nang demang Daud deibdoba nang milibmai.

21Ba, Salomo mi sienyi Rehabeam biryi Yerusalem atei binmouci, sun Yehuda yala yin doun nang ab, Benyamin yala yin doun nang ab yubwa 180.000 baryi nang mar ordana co birianci nang asi bulubdeibmou. A bitinyi yala nang yubwa bulubdeibmou ara, “Israel mutuk nang asi sun outam kibkwetebtiniryi, Israel mutuk ara ni dinyi akwe kibdobkwan,” tenen ati bulubdeibmou. 22Bok, Er Imtamnyi biryi Er uram ermurunanyi nabi Semaya deici asi ato ebdeibmou, 23“Sun Yehuda yala nang ab, Benyamin yala nang ab, sienyi Salomo mi Rehabeam ab asi ato ebdeibdum, 24‘Er Iya Erebdobnyi bira ato ebdeibsou: Sunci, sun Israel nang mamun mar boboka obdamunyei. Ara, Niryi bokoka bitinyi kibdeibsise asi ato kubdankwamarum ati, sunci sun atei yuk-yuk bindobdarur.’ A uram ara Er Imtamnyi biryi ato ebdeibmasir,” ebmou uram asi kekebmai. Ura, sunci Imtamnyi ebdeibmou to kuboka sun atei yuk-yuk bindobmai.

Yerobeam yuk kwemdeina asi molobkalibmou deyok

12:25-33

25Yerobeam sirya Israel mutuk sienyi kibmou. Ura, Sikhem atei takloboka, Efraim mutuk kon tam kuboka Pnuel atei binmou. Binmou ura, Pnuel atei a kuboka talebmou. 26Ura, Yerobeam er kanyatam aryi ato teneibmou, “Ukura Daud yala nang aryi sien nang kibingiryi, talebingnyei,” tenebmou. 27Ton teneibmou ara, “Akatei ninyi aryi, Yerusalem atei dam Er Imtamnyi biti dama deiboka uk dabkwamingnyi ati, Er Iya Erebdobnyi ai dam molorbangnyi ura, akatei ninyi kanya ara sirya sun nai Yehuda sienyi Rehabeam deibingnyei. Ba, nira sunci Yehuda sienyi Rehabeam talebwe atei aryi yakningnyei,” tenebmou. 28Ato kuboka teneibmou deyok aryi er ilil kubmouci, bisam lembu mi atoanun bitinyi emas aryi kiknibdeibmouci, sunsi ato ebmou, “Sunci, Yerusalem atei uki weiki binandau ara a kunum sirya binandum. Israel mutuk ninyi e, sunsi Mesir mutuk aryi bobde yanansunyi bira a dibdendarur. A kiknibdeibmasin dinyi asi molobdarur! Era mutuk Yerusalem bana mem!” ebmou. 29Ebmouci, a kiknibmou bisam lembu bitinyi, ton dinyi ara Betel atei deibmou ba, ton dinyi ara Dan atei deibmou. 30Akatei ninyi nirya aryi a kiknibdeibmou bisam lembu asi sunci Betel atei ab, Dan atei bindoka molon deyok aryi, sun malyi kun dinyi dobdobmai. 31Tonda, erci mutuk konkon asi yuk kwemdeina dama deiboka molon ai dobkanikmouci, sun Lewi yala kum nang asi wibokaburyi, a molorban ai Er Imtamnyi biti ninyi dama deirin nang imam nang tikeibnin yibinmou. 32Ura, Yerobeam biryi uki 15 baryi tum wala ara erci Yehuda atei weik tum kibdeiamnyi to kuboka weik tum kibdeibmou. Erci, ato kuboka kibdeibmouci, dama deirin keil lamna dub weletikmou. Ura, erci Betel atei aryi bisam kambing domba mi obokaburyi, emas aryi kiknibmou molon bisam lembu mabwe bitinyi ati dama deiboka molobmou. Ura, erci wiboka tikeibnin yibinmou Er Imtamnyi biti ninyi dama deirin nang asi a molorban ai Betel atei asi wa karebmou. 33Erci, Betel atei a kikniamwe dama deirin keil lamna dub asi uki 15 baryi inbaryi wala ara sun Israel ninyi weik uki tum eamwe wala dobmou tum aryi, a doamwe dama deirin keil lamna duba asi weletikmou ura, dama deirin bisam uk daboka deibmou.

Currently Selected:

1Raja-raja Uram 12: MTG

Highlight

Copy

Compare