1Raja-raja Uram 11

Salomo biryi Er Iya Erebdobnyi bisi takloboka yuk kwemdeina asi moloramwe uram deyok

11:1-13

1Sienyi Salomo bira Mesir sienyi nebnyi tentok asi doamwe. A doamwe cok, yuk mutuk-yuk mutuk nerabwe ababyi ilinto dortabangnamwe. Ara, Moab nerabwe ab, Amon nerabwe ab, Edom nerabwe ab, Sidon nerabwe ab, Het mutuk nerabwe ab asi dobtabangdamwe. 2“Ato kuna mem,” tenen ati, Er Iya Erebdobnyi biryi sun Israel nang asi minob uca ato ebdeiamwe, “Sun Israel nang aryi anda yuk mutuk nang ab teleb-teleb kibdandoka, anda nang mutuk nerabwe asi dobmunyei. Ba, sunci ato kubmunyi ba, sun kanya asi dangubdeibsicei! Ba, sun moloramingnyi kwemdeina mer asi molobmunyei!” Ebdeiamwe bok, Salomo kanya ara anda mutuk nerabwe mer asi, er kanya iya ati teleb teneamuryi, dobtabangdamwe. 3Erci doamwe nerabwe yubwa ara 1.000 baryi doamwe. Bok, 700 baryi doamwe nerabwe ara sun yuk mutuk sien nang aryi deibdoba yala nang nermabwe. Ba, 300 baryi doamwe nerabwe ara dortabangna nerabwe kuramnyi. A doamwe nerabwe mer aryi Salomo kanya dangubsiniamnyi. Ba, Salomo biryi Er Iya Erebdobnyi bisi takloboka, a doamwe nerabwe sun kwemdeina asi moloramwe. 4Ani, sirya wisi danmou talak ababyi, er nerabwe mer kwemdeina mer asi, er kanya diba teneamwe. Ba, Er Iya Erebdobnyi, sun Israel molonanyi diba asi, er nai Daud biryi moloramwe to kum kuramwe. 5Ba, Salomo biryi Sidon mutuk nang moloramnyi kwemdeina si Asytoret ab, Amon nang ab moloramnyi kwemdeina si Milkom ab asi moloramwe. Ba, kwemdeina si Milkom ara iya ilil tenen dinyi asi moloramnyi. Ara, sun mabwe asi obtaleboka, a kwemdeina ati dama deiboka moloramnyi. 6Ani, Er Iya Erebdobnyi urasintam asi, Salomo biryi malyi dinyi kurdongoramwe. Ara, er nai Daud biryi Er Iya Erebdobnyi bisi, er kanya tentok boboka Imtamnyi bisi miliramwe to kum kuramwe. 7Ato kuramwe talak aryi, Salomo biryi Moab nang ab, Amon nang ab aryi, iya malyito kubde moloramnyi kwemdeina si Kamos ab, Molokh ab ati dama deiboka molon ai dobmou. Ara, Yerusalem mutuk asi yaletam kuboka mutuk kon asi dobmou. 8Ba, er nerabwe mer aryi sun kwemdeina mer yuk-yuk ati dama deiboka, uk daboka molonkwamnyi ai ababyi neiktoto yuk-yuk dobdeibnin yibinmou.

9Salomo biryi Er Iya Erebdobnyi, sun Israel nang molonanyi bisi takloboka yuk kwemdeina asi moloramwe. Ba, Er Iya Erebdobnyi biryi ersi yu bobmou. Ara, ato kuramwe deyok ati, Imtamnyi biryi Salomo dam liki bitinyi sirya lak kibdandoka ato ebdeiamwe, “Kanci yuk kwemdeina asi molona mem!” ebdeiamwe. 10Ani, yuk-yuk kwemdeina asi moloboka milibdiryi, Er Iya Erebdobnyi biryi, “ ‘Ukubkwandum-ukuna mem,’ ebdeianci dinyi asi kum kunubcei,” tenen, Imtamnyi biryi er dam lak kibdandoka, “Andato dinyi kununa mem,” ebdeiamwe. 11Ura, Er Iya Erebdobnyi biryi Salomo bisi ato ebdeibmou, “Niryi kanti, ‘Ukubkwandum-ukuna mem!’ ebdeibkise dinyi ara bikumwe cok, teneboka kum bikana ato kurum. Ato kurum deyok aryi, ‘Niryi, kansi sienyi kibdeibkise ba, talebumwe dinyi ara kan taruk dam aryi dobdakabniryi, kan wa irmilikinanyi biti karebkwaman. 12Ato kubtinyi bok, kan nai Daud biryi Ni erdeirin dinyi kunuramwe deyok aryi, Niryi kan kam kunkwandim talak aryi, a dinyi kum kubkwaman. Eda, Kanci deibminyi mi aryi, sienyi kiboka talebkwande dinyi asi, Niryi erci sienyi kiboka taleanci dinyi asi dobdobkwan,’ eanse. 13Bok, kan mi taruk dam aryi, Niryi a taleanci atei nirya asi kum dobdobkwan. Eda, ersi atei tentok karebkwan. Ara, Ni wa inanyi Daud deyok ab, Niryi wibse atei Yerusalem deyok ab ati ato kubkwan,” eanse.

Salomo ab er mar ibdeibdandoka ordana nang ab deyok

11:14-40

14Ura, Er Iya Erebdobnyi biryi Salomo bisi mar ibdeiboka, Salomo ab ordananyi tentok wibdeibmou. Ara, Edom mutuk sienyi biryi deibdoba si Hadad wibdeibmou. 15A kabul talak ara Daud biryi Edom nang asi mar boboka orbinamwe. Ba, Edom nang asi, oboka muna kibdongoboka yandamwe. Ba, Daud yin doun sienyi Yoab ab, er yin doun nang ab aryi Israel nang asi Edom nang aryi oamnyi ba, diamnyi nang tukwe dongorbinamnyi. A dongorbinamiryi, Edom atei a bindoka wala nabaryi kuamnyi. 16Ba, a bindoka kuramiryi, Edom atei sal nang ab, sal mabwe ab asi nirya obkiribmai. 17Bok, a talak aryi Hadad bira Edom atei nang, er nai amwetam kuboka wa in nang ab Mesir mutuk bindamnyi. Ara, Hadad er kabir aryi ato kuboka bindamnyi. 18Ara, Midian mutuk aryi kuboka Paran mutuk binmai. Paran mutuk binmaici, akatei yin doun nang ton sunsi milibdobmai. Ura, Mesir mutuk sienyi Firaun bisi Mesir mutuk binmai. Binmai ba, Firaun biryi Hadad bisi, er kun ai ab tukwe ab, yina ababyi tuba yirkareramwe. 19Ato kuboka, Hadad bisi Mesir sienyi biryi teleb kibmouci, Firaun ner si Tahpenes er weit asi doboka kabdeibmou. 20Ba, Hadad ner, a kabdeibmou ner aryi mi deibmou. Ba, a mi si ara Genubat eboka dobmou. A mi ara sienyi mabwe ab, sienyi ai kuramnyi. Ba, sienyi ner Tahpenes biryi taleamuryi, nebdeibmou. 21Hadad bira Mesir mutuk a kuramwe talak aryi, Israel mutuk sienyi Daud ab, er bikdob yin doun sienyi Yoab ab sirya dibmaring en uram kekebmou. Ura, Mesir sienyi bisi ato ebmou, “Ni atei tubto tamuboka bindobkwan ati, ‘Ur birum,’ ebnurum,” ebmou. 22Ura, Firaun biryi Hadad bisi ato eboka asibmou, “Una keica asi kan dam ton kum karekunun ati bindobkwamarim do?” ebmou. Uca, Hadad biryi Firaun bisi, “Ni tenen dinyi nirya ara sirya karenurum ba, teleb asa aryi yibde kununum. Bok, ‘Ni atei binkwan,’ tenebman ati molobmakin,” ebmou. Ara, Hadad biryi er Mesir mutuk aryi kuboka Edom mutuk sirya binmou. Ura, Edom mutuk binmou ara sun Israel nang asi mar bobkwamnyi ati binmou.

23Ura, Er Imtamnyi biryi Salomo biti mar ibdeiboka obdankwandinyi tubto tentok kiknibdeibmou. Ara, Zoba mutuk sienyi Hadadezer dam aryi takloboka yuk mutuk bindamunyi si Elyada mi Rezon kiknibdeibmou. 24Ba, minob talak ara Daud biryi Aram mutuk sienyi Hadadezer bisi mar bobindoka, er tam nang asi oboka muna kibdongoamwe. Ba, Rezon biryi er ab tonkwa kuramnyi nang bulubdeiboka bobdobwe ura, sienyi Hadadezer takloboka Damsyik mutuk bindamwe. A bindoka kuramnyi talak aryi er a bobde binamwe nang aryi, Rezon bisi Aram mutuk sienyi tikeibmai. 25Anyi biryi Salomo er sienyi kiboka, kam kubde binkwamwe talak a nirya aryi, sun Israel nang asi mar boboka ordananyi kibkwamwe. Ara, Salomo bisi Hadad biryi iya malyi kun dinyi bobdongoamwe to kuamunyi kuramwe. Tonda, Rezon biryi Salomo biryi sienyi kiboka talena ara, “Ni li,” teneboka Salomo bisi malyi kibdeibmou. Ura, Rezon biryi sienyi kiboka talen mutuk ara weik kibdeibmouci, Aram mutuk nirya erci taleamwe.

26Tonda, Nebat mi Yerobeam bibabyi sienyi Salomo bisi mar irdeiramwe. Yerobeam bira Efraim yalanyi Zereda ateinyi kuramwe. Er kwin bira sulyi ner si Zerua ersi deibmou. Yerobeam bira sienyi Salomo wa inanyi kuramwe bok, er nai Salomo bisi mar irdeiramwe. 27Ara, Yerobeam biryi Salomo bisi mar irdeiramwe deyok ara ato: Sienyi Salomo biryi Iya Erebdobnyi aitam kuboka er nai Daud atei Yerusalem atei keil lika malyito kuamwe karin diksum asi, a tukwe aryi boboka lilirbinamwe ati, erci sienyi bisi mar ibdeiamwe. 28Ba, Yerobeam bibabyi Salomo wa iramwe. Akiryi, Salomo biryi Yerobeam bisi diramwe uca, Yerobeam bira wa li asa ina kumci diboka iramwe deyok aryi, sun il weik wa in nang kalingna sienyi wibmou. Ani, sun a wa in nang ara Yusuf yala nang akwe eamwe. 29Ani, uki tentok tum ara Yerobeam Yerusalem aryi kuboka yina kum mutuk binmou. Binmouci, bisik noutam tuba banmou bok, Er Imtamnyi uram ermurunanyi Ahia bira ukuryok ongon aling ongobmouci, er atei Silo aryi kuboka er dam binmou. Ba, a mutuk dam ara sun bitinyok kunmarei. 30Ura, Ahia a ongobmou ukuryok ongon aling kwiribokaburyi, kwilik-kwilik eblobokmou ba, a kwiliklobmoua ara amolbaryi kibmou. 31Ura, Yerobeam bisi ato ebmou, “Iya Erebdobnyi biryi ato ebdeibwe, ‘Niryi, Salomo talebwe atei nang asi bokokabniryi, kanda atei takubaryi karebkwankin,’ ebwe. A deyok aryi, a ongon aling kwilikdoba takubaryi dobmarim,” ebmou. 32“Bok, Niryi Israel ninyi yala tentok ara Salomo biti takdongobkwan ba, erci a yala nang asi talebkwande. Ara, Ni wa inanyi Daud biryi Ni ebdeianse uram asi kekeboka kunuramwe deyok ati Yehuda ninyi yala kum dobdobkwan. Tonda, Israel mutuk weik atei nirya kankan dam aryi Yehuda yala nang mutuk Yerusalem atei wianse deyok ati kum dobdobkwan. 33Niryi ersi ato kubkwan ara er nai Daud kuramwe to Niryi erti ebdeibse to kuboka, Ni urasintam aryi diboka kum kururci, deibloboka yuk kwemdeina asi molorbarur. Ara, Sidon nang kwemdeina Asytoret ab, Moab nang kwemdeina Kamos ab, Amon nang kwemdeina Milkom ab asi molorur. 34Ato kurur bok, Niryi er talebwe atei nirya asi ukuca kum dobkwan. Eda, er kam kuranci talak aryi, ersi iya sienyi kiboka Israel ninyi talen dinyi karebkwan. Ara, Niryi erti, ‘Ato kubde binkwandum,’ erdeirin dinyi ab, a ebdeibse dinyi asi diboka kalingdur ati ersi ato kubkwan. 35Bok, er mi taruk dam aryi iya ati sienyi kiboka talen dinyi ara dobokabniryi, Yerobeam kanti atei takubaryi karebkwankin. 36Bok, Salomo er mi ara Niryi ninyi yala tentok karebkwan. Ba, Ni uram kekeboka kunuramunyi si Daud er deibdoba nang aryi Niryi wibse atei Yerusalem atei asi sienyi kiboka iya talebde binkwaming. 37Akiryi, Niryi Yerobeam kansi wibkwankin ba, kan teneaminyi to kuboka Israel mutuk eitam takubaryi atei asi sienyi kiboka talebkwandim. 38Ba, Niryi kanti, ‘Ukubkwandum-ukuna mem,’ ebdeibkwankin uram asi kekeboka, Ni urasintam aryi malyi dinyi asi kuna kumci, teleb dinyi akwe Ni wa inanyi Daud kuramwe to kuboka kubde binkwaminyi ura, Niryi kansi dibniliboka kalikwankin. Ani, kan ai ninyi asi Daud biti Israel mutuk ninyi asi kareanse to kuboka iya karebkwankin. 39Ara, Salomo biryi malyi dinyi kun deyok aryi, Niryi Daud deibdoba mabwe asi ikin dinyi karebkwan. Bok, a ikin dinyi karebkwan ara iya ati kum karebkwan eda, tiya ati karebkwan,” Er Imtamnyi biryi Yerobeam bisi ebmou.

40Er Iya Erebdobnyi biryi Yerobeam bisi, “Ato kuboka karebkwankin,” ebmou uram asi Salomo sirya kekebmouci, “Yerobeam bisi obkwan,” tenen kunmou. Bok, Yerobeam bira Mesir mutuk sienyi Sisak bisi ola minob bindobmou. Ba, a bindoka kuramwe talak aryi, sienyi Salomo dibmou.

Sienyi Salomo dimna deyok

11:41-43

(2Taw. 9:29-31)

41Salomo sienyi kiboka taleamuryi, ibde yanamwe dinyi ab, er bingni dinyi lak kimdeiriamwe deyok ab ati ara Salomo er deyok ati sengdeirin kerek sengna umbura sirya kerek sekeibwe. 42Ba, Salomo biryi sienyi kiamuryi, Israel mutuk Yerusalem atei taleamwe ara kwalina nungna 40 baryi taleamwe. 43Ani, dibmou ba, Daud atei tukwe ukoka dongobmai. Ba, er mi Rehabeam biryi a mutuk sienyi kiboka er nai unubmou.

Currently Selected:

1Raja-raja Uram 11: MTG

Highlight

Copy

Compare