1Tawarikh Uram 5

Me Yordan kouboka dinatam kuramnyi yala deyok

5:1-26

1Yakub uruma si Israel er mi yanduanyi si Ruben deiamwe. Ruben yuma deiamunyi bok, er nai kisal dangna dinyi ara Ruben dona kum kubmou. Ara, er nai ner asi yobmou deyok aryi kisal dangna dinyi Yusuf ab, er deibdoba ab asi dobmou. Ani, yumanyi eboka kerek sengna yuma sengna kum kubyi ara malyito kuamwe deyok aryi kubyi. 2Uca, si erena ara Yehuda bisi si erebmou. Bok, sun nai kisal dangna dinyi ara Yusuf dobdobmou. 3Israel mi yanduanyi si Ruben er mabwe si ara Henokh ab, Palu ab, Hezron ab Karmi ab deibmou. 4Ba, Yoel er mi ara Semaya deibmou. Ba, Semaya biryi Gog deibmou. Gog biryi Simei deibmou. 5Simei biryi Mikha deibmou. Mikha biryi Reaya deibmou. Reaya biryi Baal deibmou. 6Baal biryi Beera deibmou. Uca, anyi bira Tilgat-Pilneser, Asyur sienyi biryi bobinamwe. Ba, anyi Beera bira Ruben yala nang kalingnanyi kiamwe.

7Ura, sun deibdoba yala kuramnyi to kuboka, du nang si kerek sengna kubwe to ara Yeiel yuma sun yala sienyi kibmou ani, a dam ara Zakharia unubmouci, unubdanin binmai. 8Ba, Yoel deibdoba ara Sema ab, Azas ab, Bela ab ukuboka deibdanin binmai. Akiryi sun yala a nang Yoel deibdoba ara Aroer dam aryi sekeiboka, Nebo mutuk dam sekeiboka ani, Baal-Meon mutuk dam sekeiboka noutam asi kuramnyi. 9Ba, a nang mutuk yaletam ara sun bisam winiramnya ilinto tabakoka ilinto kibde baramwe deyok aryi, yini mutuk wiliba aryi sekoka me Efrat kin sekeiboka ara sun mutuk kiamnyi. 10Ba, Saul sienyi kiamwe talak ara Hagri mutuk ninyi asi mar boboka obkiribmaici, akatei nang doramnyi keis ol atei araboka Gilead mutuk yaletam ara sun mutuk kiboka kuramnyi.

11Ba, Gad yala nang ara sun wiliba dam Basan mutuk aryi sekeiboka, Salkha dam sekoka noutam kuramnyi. 12Yoel bira sun du dounyi kuramwe. Ba, Safam bira er amwetamnyi kuramwe. Ani, Yaenai ab, Safat ab ara Basan mutuk kurandei. 13Ba, sun weit yabwe silib sun deiamnyi to lilina ara Mikhael ab, Mesulam ab, Syeba ab, Yorai ab, Yakan ab, Ziya ab Eber ab, sun sal tabaryi deiamwe. 14Sun a nang ara Abihail mabwe kuramnyi. Sun deiamnyi to lilina deyok tam aryi lilina ara yuma ara Bus biryi Yahdo deiamwe. Yahdo biryi Yesisai deiamwe. Yesisai biryi Mikhael deiamwe. Mikhael biryi Gilead deiamwe. Gilead biryi Yaroah deiamwe. Yaroah biryi Huri deiamwe. Huri biryi Abihail deiamwe. 15A nang sun yalanyi Guni biryi Abdiel deiamwe. Ba, Abdiel biryi Ahi deiamwe. Ba, Ahi biryi sun yala nang deyoknyi kuramwe. 16A nang ara Gilead mutuk ab, Basan mutuk ab kuramiryi mitik-mitik atei doboka kubde baramnyi ani, Saron bisam mol kwaboka winin mutuk dam kubkub dina-dina nirya sekeiboka kuramnyi. 17Sun a nang deibdanin yanamnyi dinyi liliboka kerek sengna ara Yehuda yala nang sienyi Yotam kiamwe talak ab, Israel sienyi Yerobeam kiamwe talak ab aryi liliboka kerek sekamnyi.

18Ba, Ruben yala nang ab, Gad yala nang ab, Manasye yal dinatam nang ab mar ordana co biriboka dukuta weik nang yubwa 44.760 baryi nang kuramnyi. A yin doun nang ara mar u limdon keica douboka, mar u limdona ab, ninyi on ya aryi ninyi ya sengkwetena ab, yin aryi ninyi mar bisik ena ab ara co biriamwe nang akwe kuramnyi. 19Ura, a nang aryi Hagri mutuk nang ab, Yetur mutuk nang ab, Nafish mutuk nang ab, Nodab mutuk nang ab mar bobmai. 20A yin doun nang ara Er Iya Erebdobnyi bisi dib tenebmaici, molobmai ba, sun molona kekeboka milibmou. Ba, a nang aryi Hagri mutuk nang ab, sun tonkwa antaniboka mar bobmai mutuk a nang ab asi oboka erebdobmai. Ba, a sun mining dam nang doboka karebdanmai. 21Ura, a yin doun nang aryi oboka erebdobmai mutuk nang bona daluboka dobmai. Ara, sun bisam unta yubwa 50.000 baryi ab, kambing toto, domba toto yubwa 250.000 baryi ab, keledai yubwa 2.000 baryi ab, ninyi kam kibman tomobmai yubwa ara 100.000 baryi ab daluboka dobmai. 22Ba, a ordanmai ara Er Iya Erebdobnyi biryi mar bobmou deyok aryi ninyi yubwa ilinto obmai ba, dibmai. Ura, a mutuk arabdobmaici, kuramnyi ani, a nang asi Babel mutuk bobinmai.

23Ba, Manasye yala meici kukoka dinatam nang ara a mutuk kuramnyi. Ara, mutuk si Basan dam aryi sekeiboka, Baal-Hermon aryi sekeiboka, Senir dam aryi kuboka Hermon kon sekeiboka noutumang mutuk kuramnyi. A mutuk dam kuramnyi uca, ninyi ilinto tabakoka nukiribman kumto kibmou. 24A ninyi sun yala du nang kiboka si ereramnyi nang ara Hefer ab, Yisei ab, Eliel ab, Azriel ab, Yeremia ab, Hodawya ab, Yahdiel ab kuramnyi. A nang ara ninyi ordana dabub nang ab, ninyi ordana co biriamwe nang ab, si bingna nang ab akwe sun yala sien nang kuramnyi.

25Uca, a nang ara sun moloraminyi, Er Iya Erebdobnyi bira molona taklobmaici, kanya dangubmou. Ba, sun urasin dam aryi, Er Iya Erebdobnyi biryi obkiribmou mutuk nang moloramnyi kwemdeina asi moloramnyi. 26Ato kuramnyi deyok aryi, Israel nang sun moloraminyi, Er Iya Erebdobnyi biryi Asyur mutuk sienyi si Pul ebok, Tilgat-Pilneser ebok kimnaminyi bisi milibmou. Ba, a nang Ruben yala nang ab, Gad yala nang ab, Manasye yala dinatam nang ab asi boboka, sun mutuk il dimkwamnyi ati bobinmai. A yala nang asi Asyur sienyi biryi bobinmou mutuk si ara Halah mutuk ton, Habor mutuk ton, Hara mutuk ton ani, me Gozan duman mutuk ton ukuboka bobinmou. A yala nang ukuboka bobinamnyi tok asi a mutuk ukubabyi tuba kunung.

Currently Selected:

1Tawarikh Uram 5: MTG

Highlight

Copy

Compare