1Tawarikh Uram 28

Sienyi Daud biryi er mi Salomo bisi Er Imtamnyi ai don deyok ati ebdeibmou deyok

28:1-21

1Ura, weik sienyi Daud biryi sun Israel yuk weik sien nang asi, “Yerusalem atei bulubdarur,” ebmou. Sun anda bulubdarur ebmou weik sien nang ara sun yala nang talen sien nang ab, a mutuk talen sienyi biti wa in sien nang ab, akatei yin doun 1.000 baryi ab, 100 baryi kalingnamnyi sien nang ab, akatei sienyi bona-bona kalingna nang sien nang ab, weik sienyi bisam winin sien nang ab sun mabwe ab asi, “Yerusalem atei bulubdarur,” ebmou. Tonda weik sienyi ai dam wa irmilin nang ab, yin doun nang sien nang ab, mar ordana ati co biriamnyi yin doun nang ab nirya tonkwa bulubmai. 2#2Sam. 7:1-16; 1Taw. 17:1-14Ba, sirya bulubmai ura, sienyi Daud biryi sun anda weik sien nang urasin dam tikmouci, ato ebmou. “Ni kwit yabwe, ni uram ebkun asi kekendarur! Nira minob uca, ‘Er Iya Erebdobnyi biryi, “Ukubdarur-ukuna mem,” ebdeibsou uram deirin co sangkol ab, nun molonanyi yan yanin ai ab asi dobkwan,’ teneboka akai don dinyi nirya sirya kiknibminikse. 3Ato kuboka sirya kiknibminikse bok asi, Er Imtamnyi biryi nisi ato ebnou. ‘Sienyi Daud, kanci yin dounanyi kibumci, Ni Imtamnyi urasintam aryi ninyi mitika kum orum. Ato kuboka obde barum deyok aryi kanci Ni Imtamnyi si siboka ai ara kanci dona kum kubkwandim,’ ebnou. 4Bok, Er Iya Erebdobnyi, nun molonanyi biryi ni yala nang nirya aryi nisi, ‘Israel mutuk sienyi kiboka iya talebde binkwande,’ eboka wibsou. Nun a wibsou yala ninyi ara Yehuda yala ninyi asi wibsou. Bok, Er Imtamnyi biryi nun akatei yala ninyi kankan noutam aryi ni nai biryi yaldangni asi wibsou. Ba, ni nai biryi yaldangni mabwe kankan noutam aryi Er Imtamnyi biryi nisi, ‘Israel mutuk sienyi kiboka talebkwande,’ eboka wibnou. Ba, niryi Israel mutuk sienyi kiboka talebse. 5Ba, Er Iya Erebdobnyi biryi nisi mabwe weik karebnou ba, yaldakde bise. Anda yaldakde bise mabwe kankan noutam aryi ni mi Salomo bisi, ‘Israel mutuk sienyi kibokabdiryi talebkwande,’ eboka Er Iya Erebdobnyi biryi sirya wibwe. 6Ara, Er Iya Erebdobnyi biryi ato ebdeibnou, ‘Kan mi Salomo biryi Ni Imtamnyi ai ab, Ni ai keta ab dobkwande. Erda Ni mi kibkwan ba, Nira er Nai kibkwanir ati Niryi sirya wibse. 7Ba, erci Israel mutuk sienyi kiboka talebkwande tam ara Ni Imtamnyi biryi iya katabum ebdeibkwan ba, talebkwande. Ara, Niryi, “Ukubkwandum,” eboka yan memebdeianyi dinyi asi arub a kunuabde to asi talebnuruandiryi diboka kunubde binkwanci ura, Niryi ato kubdeibkwan,’ ebnou. 8Akiryi ukura Er Iya Erebdobnyi mabwe nermabwe sun Israel ninyi nirya urasin dam ab, Er Imtamnyi kekenmar dam ab aryi ni uram ebkwinsin ati kekendarur. Sunci Er Iya Erebdobnyi nun molonanyi biryi, ‘Ato kubdarur-ukuna mem,’ ebdeibsou dinyi ab, er yan memebdeibsou dinyi asi diboka talebnurubmunci, kunubde bindarur! Ba, sun ab sunci yaldakde binkwandum nermabwe mabwe ab aryi Kanaan mutuk teleb mutuk asi iya taleboka kubdorobinkwandum. 9Ba, ni mi Salomo, kanda ni kan nai molonunyi bisi, Er tentok akwe asi kan molonanyi kibminci Imtamnyi Er tentok molonkwandum! Kan kanya teleb asa akwe bobokabminci, Er Imtamnyi wa akwe ibde binkwandim! Er Imtamnyi bira kan kanya babyi, kanci, ‘Ukubkwan,’ tenen dinyi babyi ara sirya bingkurur. Kanci Er Imtamnyi bisi ingkirikminyi ura, Ersi asing eibkwandim. Bok, kanci Ersi taklobminyi ura, Erci kansi bai donokiriryi, iya deiblobkwankir. 10A mi, kanda Er Iya Erebdobnyi biryi, ‘Ni Imtamnyi kunkwanyi ai ara erci dobkwanir,’ eboka sirya wibkou. Ati, kan kanya kiknibminikdobminci, a ebkou to kuboka kunubde birum,” ebmou. Ara, er sienyi Daud dina kabul talak aryi er mi Salomo bisi Er Imtamnyi lek ai ara, “Ato-ato kuboka dobkwandum,” ebdeibmou.

11Ura, sienyi Daud biryi, “Er Imtamnyi ai ab, akai umtam asi wiliboka-wiliboka dobkwan,” teneramwe dinyi nirya ara er mi Salomo bisi nirya karebmou. Ara, bona-bona deirin wilimna ai ab, eitam wilimdan ai ab, umtam nong wilimdan ai ab ani, sun malyi kun nang kilina wilimna ai Ruang Mahakudus ab dobkwamwe dinyi nirya karebmou. 12Ani, “Er Iya Erebdobnyi ai keta dinatam-dinatam nirya aknabdongoboka dobkwan,” teneamwe dinyi ababyi karebmou. Ani, “Sun Israel ninyi aryi Er Imtamnyi biti karen bona-bona deirin ai ab, lek dama deirin ai wilimna ab dobkwan,” teneamwe ababyi karebmou. 13Ba, “Sun imam nang babyi, sun Lewi yala ninyi babyi aryi Er Imtamnyi ai wa teneamwe dinyi ababyi sunsi ato kuboka karebkwandum,” ebmou. Ani, Er Imtamnyi bisi dama deiboka molobkwamangiryi kiknirminingni dinyi ababyi karebmou.

14Ani, tonda Er Imtamnyi biti tuba-tuba dama deiboka molobkwamangiryi kiknirminingni dinyi kikimanto emas ab, perak ab ababyi karebmou. 15Ara, uk ubna kiknina ati emas ab perak ab aryi kiknina dinyi kikimanto karebmou. Ara, Er Imtamnyi bisi molobkwamangiryi ardeirin uk ubna kiknin dinyi ati karebmou. 16Ani, roti kwaning dama deirin co lamna nirya kiknibkwamwe to kuboka emas ab, perak ab karebmou. 17Ani, garpu ab, me dingni moyok ab, me kwena moyok ab kiknibkwamwe to ati tabtabingna kum emas ab, perak ab karebmou. 18Ani, tong teleb en dinyi dama deirin co lamna asi emas aryi kiknibkwamwe ati emas karebmou. Tonda emas aryi malaikat atoanun si kerub bitinyi asi kiknibkwamwe ati karebmou. Ba, a malaikat atoanun bitinyi ara Er Iya Erebdobnyi biryi, “Ukubdarur-ukuna mem,” en uram deirin co sangkol deici asi bukeibkwamwe. Ba, a malaikat atoanun bitinyi sun ol aryi a co sangkol asi otam atam akubdongobkwamwe kiknibkwamwe dinyi ababyi karebmou. 19Ato kuboka sienyi Daud biryi er mi Salomo bisi sirya karebmouci, ato ebmou. “Akai dona ara Er Iya Erebdobnyi biryi nisi, ‘Ato kuboka dobkwandum!’ ebdeibnou to kuboka sirya a kerek sekeibwe asi dibdeboka dobkwandum,” ebmou.

20Ura, sienyi Daud biryi er mi Salomo bisi tubto ato ebmou. “A mi, kan kanya kiknibminikdobminci, Er Imtamnyi ai dobdum! Kan kanya ara yuk dinyi-yuk dinyi asi ilil kubkicei! Kanci akai dobde binkwandim tam ara Er Iya Erebdobnyi, nun molonanyi biryi tanglona kum kubkwankir. Eda, Erci kansi dibniliboka kalikmurubde barankici tok asi akai nirya dobkwandim. 21Ba, sun imam nang babyi, sun Lewi yala nang babyi ara Er Imtamnyi molon ai Bait Allah ai wa ibmurubde binkwaming. Ani, sun Er Imtamnyi ai don nang yuk-yuk wa co biriamnyi nang ababyi sun kanya teleb asa aryi kansi miliboka, Er Imtamnyi ai wa ibmurubde binkwaming. Ani, sun Israel yuk weik sien nang ab, sun Israel ninyi nirya ab ara Salomo, kanci ebminyi to akwe kekeboka kunubde binkwaming.” Ara, sienyi Daud biryi er mi Salomo bisi, “Er Imtamnyi ai ara ato-ato kuboka dobkwandum,” ebkarebmou.

Currently Selected:

1Tawarikh Uram 28: MTG

Highlight

Copy

Compare