1Tawarikh Uram 27

Yin doun nang sien nang kibmai dinyi deyok

27:1-15

1Ani, Israel yala nang sun deibdoba yuk-yuk nirya weiknyi kimdeiriramnyi. Ara, yin doun nang yubwa 1.000 baryi nang sun sienyi yuk tikeibmai. Ani, yin doun nang yubwa 100 baryi nang sienyi yuk tikeibmai. Ani, weik sienyi dam aryi yuk-yuk wa ina lilirdeirin nang yuk tikeibmai. Ba, kwalina nirya a wa ibde baramnya nirya a nang aryi, “A tum ara ur kunmandarur. A tum ara wa ibkwandum!” eboka lilirdeirin nang olong yuk-yuk tikeibmai. Ba, a tikeibmai nang nungna yubwa ara ninyi 24.000 baryi tikeibmai.

2Ba, yuma olong nang aryi, yuma wala wa ibkwamnyi nang sienyi tikeibmainyi si ara Zabdiel mi Yasobam tikeibmai. Ba, Yosabam er olong ara ninyi yubwa 24.000 baryi wibmai. 3Anyi Yosabam bira Peres deibdoba yalanyi kuramwe. Ba, yuma wala ara yin doun nang sien nang nirya deici tam sienyi kiboka kalingnanyi kibmou. 4Ba, bitinyi wala ara Ahohi yalanyi si Dodai yin doun nang olong sienyi kiboka, yin doun nang yubwa 24.000 baryi kalingkwamwe. Ba, er amwetamnyi bira Miklot kuramwe. 5Ukuboka wala yuk-yuk yin doun nang yubwa 24.000 baryi kiboka olong yuk-yuk sien nang taleboka wa iramnyi. Winiryi wala ara imam nang sun sienyi Yoyada du mi Benaya yin doun nang olong sienyi kiboka yin doun nang yubwa 24.000 baryi kalingkwamwe. 6Anyi bira sienyi Daud dabub weik yin doun nang olong 30 baryi nang sienyi kibmou. Ba, er mi Amizabad bira er amwetam sienyi kibmou. 7Ba, dumbaryi wala ara Yoab er weit Asael biryi yin doun nang yubwa sienyi kibmou. Ani, Zebaja anyi olong unuboka yin doun nang yubwa 24.000 baryi nang sienyi kibmou. 8Ba, wala amubaryi wala Yizrah yalanyi si Samhut kibmou. Ba, yin doun nang yubwa 24.000 baryi nang sienyi kibmou. 9Ba, nabaryi wala ara Tekoa mutuknyi Ikesh mi si Ira wibmai. Ba, yin doun nang yubwa 24.000 baryi nang sienyi kibmou. 10Ba, tabaryi wala ara Peloni mutuknyi Efraim yalanyi si Heles kibmou. Ba, Heles biryi yin doun nang yubwa 24.000 baryi nang sienyi kibmou. 11Ani, inbaryi wala ara Husa ateinyi Zerah deibdobanyi si Sibkhai wibmai. Ba, Sibkhai biryi yin doun nang yubwa 24.000 baryi nang sienyi kibmou. 12Ani, toubnibaryi wala ara Anatot ateinyi Benyamin yalanyi si Abiezer bisi wibmai. Ba, Abiezer biryi yin doun nang yubwa 24.000 baryi nang sienyi kibmou. 13Ani, takubaryi baryi wala ara Netofa ateinyi Zerah deibdobanyi si Maharai bisi wibmai. Ba, Maharai biryi yin doun nang yubwa 24.000 baryi nang sienyi kibmou. 14Ani, koklombaryi wala ara Piraton ateinyi Efraim deibdobanyi si Benaya bisi wibmai. Ba, Benaya biryi yin doun nang yubwa 24.000 baryi nang sienyi kibmou. 15Ani, amolbaryi wala ara Netofa ateinyi Otniel deibdobanyi si Heldai wibmai. Ba, Heldai biryi yin doun nang yubwa 24.000 baryi nang sienyi kibmou.

Yuk weik wa dobmai ninyi deyok

27:16-34

16Ba, Israel yala ninyi sun yala yuk-yuk sienyi kiboka talebnin binmai nang si ara ato: Ruben yala sienyi kibmounyi bira Zikhri mi si Eliezer sienyi kibmou. Ba, Simeon yala nang sienyi bira Maakha mi si Sefaca sienyi kibmou. 17Ba, Lewi yala nang sienyi bira Kemuel mi Hasabya sienyi kibmou. Ba, Harun yala sienyi kibmounyi bira Zadok sienyi kibmou. 18Ba, Yehuda yala nang sienyi kibmounyi bira Daud er weit si Elihu sienyi kibmou. Ba, Isakhar yala nang sienyi kibmounyi bira Mikhael mi si Omri sienyi kibmou. 19Ba, Zebulon yala nang sienyi kibmounyi bira Obaja mi si Yismaya sienyi kibmou. Ba, Naftali yala nang sienyi bira Azriel mi si Yerimot sienyi kibmou. 20Ba, Efraim yala nang sienyi bira Azazya mi si Hosea sienyi kibmou. Ba, Manasye yala meici kukoka ton tam nang sienyi kibmounyi si ara Pedaya mi Yoel sienyi kibmou. 21Ba, Manasye yala akwe meici kukoka dinatam nang Gilead dam kuramnyi nang sienyi kibmounyi bira Zakharia mi Yido sienyi kibmou. Ba, Benyamin yala nang sienyi bira Abner mi Yaasiel sienyi kibmou. 22Ba, Dan yala nang sienyi bira Yeroham mi Azareel sienyi kibmou. Ukuboka Israel yala sien nang kiboka talebnin binamnyi. 23Ura, Daud biryi Israel yala nang si kerek sengnamwe ara Er Imtamnyi biryi, “Sun Israel nang yala ara im kurya nalirande ato kubkwande,” eamwe. Ato eamwe deyok aryi ninyi si kerek sengna ara kwalina 20 baryi sirya bisibmarinyi bikwe si kerek sengnamwe. Ba, kwalina 20 baryi kwalina kabul nang ara si kerek sengna kum kuramwe. 24Uca, Zeruya mi Yoab biryi, “Israel yala nang nirya si kerek sekwan,” tenen deyok kouboka kerek sekde banmou uca, Er Iya Erebdobnyi biryi ikin dinyi kareboka wenebmou. A deyok aryi kerek sengna taklobmou. Ato kuamwe deyok aryi sun Israel yala nang ninyi a kuramnyi tok asi Daud sienyi kiamwe dinyi liliboka kerek sengna deici dongona kum kubyi.

25Ba, Daud er bona Yerusalem atei ab, yuk weik atei ab, mitik-mitik atei ab bona miningdamwe. Ba, Daud er bona miningdamwe ai kalingnamnyi nang si ara ato: Adiel mi si Azmawet bira Yerusalem atei dam, sienyi ai dam deiriramwe bona-bona kalingnamwe. Ba, Uzia mi Yonatan bira Israel yala nang mutuk yuk-yuk weik atei mitik atei deiriramwe bona kalingnamwe. 26Ba, Daud er mutuk tukwe wa iramnyi nang kalingkwamwe ati Kelub mi Ezri bisi wibmai ba, erci kalingnamwe. 27Ba, co anggur wa iboka lingnamunyi bira Rama mutuknyi si Simei biryi wa iboka kalingnamwe. Ba, anggur du dakoka kibde miningdamunyi bira Syifmi mi si Zabdi biryi anggur du dakoka kibde miningdamwe. 28Ba, mutuk konkon dam co zaitun ab, co ara ab wa iboka kalingnamunyi bira Gederi mutuknyi si Baal-Hanan biryi wa iboka kalingnamwe. Ba, zaitun yung uruboka, ara du dakoka miningdamunyi bira Yoas biryi miningdamwe. 29Ba, bisam sapi lembu ab Saron mutuk winiramunyi bira Sitrai biryi winiramwe. Sitrai erda a mutuk Saron mutuk yokanyi kuramwe. Ba, mutuk bakan mutuk dam sapi lembu kalingnamunyi bira Adlai mi Safat biryi kalingnamwe. 30Ba, bisam unta kalingnamunyi bira Ismael yalanyi si Obil biryi kalingnamwe. Ba, bisam keledai ner akwe wiboka kalingnamunyi bira Meronot ateinyi si Yehdeya biryi kalingnamwe. 31Ba, bisam domba toto, kambing toto winiboka kalingnamunyi si ara Hagri ateinyi si Yazis biryi kalingnamwe. Sun a nang aryok Daud er bona-bona talena miningdamwe dinyi kalingnamnyi.

32Ba, Daud er nai weitnyi si Yonatan bira Daud bisi, “Ukubkwandum-ukubkwandum,” eboka lilirdeirinanyi kuramwe. Anyi Yonatan bira Er Imtamnyi uram kerek sengna liliboka bingnamunyi kuramwe. Ba, Hakhmoni mi Yehiel bira sienyi Daud er mabwe nermabwe eterenanyi kuramwe. 33Ba, sienyi Daud bisi, “Ato-ato dinyi kununa mem. Eda, ato kuboka lilibdeibkwandum!” eboka uram dorkarenanyi bira Ahitofel kuramwe. Ba, Arki ateinyi si Husai bira sienyi er kwit kiboka er dam wa iramwe. 34Ba, Ahitofel iramwe olong unubmounyi bira Benaya mi Yoyada ab, Abyatar ab unubmarei. Ba, sienyi Daud er yin doun nang sienyi bira Yoab kiamwe.

Currently Selected:

1Tawarikh Uram 27: MTG

Highlight

Copy

Compare