1Tawarikh Uram 26

Lewi yala nang asi lika bisik bublan dam kalingdamnyi nang deyok

26:1-19

1Sun Lewi yala nang bok Korah deibdoba asi Er Imtamnyi ai lika bublan dam kalingna nang wiboka wa karebmai ara Ebyasaf deibdobanyi Kore mi Meselemya bisi bisik lika bublan kalingnanyi wibmai. 2Ba, Meselemya bira er mabwe tabaryi deiamwe. Yuma mi ara Zakharia deiamwe. Ba, bitinanyi bira Yediael, winirinyi bira Zebaja, dumunyi bira Yatniel deiamwe. 3Ba, amunyi Elam, nabnyi Yohanan, tanyi Elyoenai deiamwe. 4Ba, Obed-Edom bira Er Iya Erebdobnyi biryi kisal dangna dinyi kareamwe ba, yuma mi si Semaya deiamwe. Bitinanyi bira Yozabad, winirinyi bira Yoah, dumunyi bira Sakhar, amunyi bira Netaneel deiamwe. 5Ba, nabnyi bira Amiel, tanyi bira Isakhar, inyi bira Peuletai deiamwe. 6Ba, Obed-Edom mi Semaya bira mabwe nabaryi deiamwe. A deiamwe nang ara ninyi mar boboka ordana mikib weik nang akwe kuramnyi deyok aryi sun yala nang kankan aryi weik nang kuramnyi. 7Sun a nang Semaya mabwe si ara Otni ab, Refael ab, Obed ab, Elzabad ab, Elihu ab, Semakhya ab deiamwe. A nang nirya ara ninyi mar boboka ordana mikib weik nang akwe kuramnyi. 8Sun a nang nirya ara Obed-Edom deibdoba nang kuramnyi. Ba, Obed-Edom mabwe babyi, er du yabwe ab, er weit yabwe ab, mabwe ababyi, ninyi ordana mikib weik nang akwe kuramnyi. Sun a nang yubwa nungna ara 62 baryi kuramnyi. 9Ba, Meselemya mabwe ara nungna 18 baryi deiamwe. A nang sun a nirya ara ninyi ordana mikib weik nang akwe kuramnyi.

10Ba, Merari deibdoba yala Hosa bira er mabwe dumbaryi deiamwe. Ura, Simri bira yumanyi kuma bok, sun nai Hosa biryi Simri bisi sun kankan dam weiknyi kibdeibmou. 11Ura, Hosa mabwe ton nang sun si ara bitinanyi Hilkia ab, winirinyi Tebalya ab, dumunyi Zakharia ab deibmou. Ba, Hosa mabwe kobdoba ab, er kwit yabwe mabwe ab antaniboka nungna ara 13 baryi nang kuramnyi. 12Ba, a nang Er Iya Erebdobnyi ai Bait Allah wengban bisik lika bublan dam kalingna nang asi, sun yala deibdoba asi weik nang wibmai. Ara, sun yala Lewi yala ton nang ababyi ukuboka wimdamnyi to wibmai. 13Ba, a nang bisik bublan dam kalikwamangnyi nang ara sun deibdoba weik nang babyi, sun deibdoba mitik nang babyi ara yamin deibdengnyi uca, si aliboka torbirinyi bisi lika bisik bublan dam kalingnamnyi. 14Ukuboka, sekni yamin deibmai uca, Er Iya Erebdobnyi ai lika bisik bublan yaletam bisik bublan kalingna ara Selemya si asi aliboka torbinmou. Ani, tubto sekni yamin deibmai uca, er mi Zakharia bukdob bingna bikamuryi, “Ukubkwayeb,” eramunyi bira er si asi aliboka torbinmou ba, me utam bisik bublan kalingna wibmai. 15Ba, Obed-Edom bira me youkwetam bisik bublan kalingnanyi wibmai. Ba, er mabwe ara Er Imtamnyi ai wa in keica miningna ai kalingna nang wibmai. 16Ba, Supim ab, Hosa ab ara kitingbantam bisik bublan ab, weik bisik bublan si Syalekhet weik bisik as welena tam kuboka bisik kalingna nang wibmai. Ba, ukuboka wibmai ura, bisik bublan kalingna ara olong unubdandoka tuba-tuba kalingnamnyi. 17Ura, yaletam bisik bublan kalingnamnyi to ara tentok tum ara ninyi nabaryi kiboka kalingnamnyi. Ba, me utam bisik bublan uki tentok tum ara ninyi dumbaryi kalingnamnyi. Ba, me youkwetam bisik bublan ababyi, uki tentok tum ara ninyi dumbaryi kalingnamnyi. Bok, Er Imtamnyi ai wa in keica deirin ai ara ninyi bitinyi nang kiboka kalingnamnyi. 18Ba, Imtamnyi ai wengyangana lika bisik bublan dam ai ara ton bitinyi nang lika bublan dam ai kalikdingnyi ura, ton bitinyi nang ara baitam weik bisik dam kalingdamnyi. 19Ukuboka Korah deibdoba ab, Merari deibdoba ab aryi Er Imtamnyi ai bisik bublan dam kalingnamnyi.

Er Iya Erebdobnyi ai yuk-yuk wa in nang kiamnyi deyok

26:20-32

20Ba, sun kwit yabwe neik yala Lewi yala nang aryok, meici kukoka ton nang ara Er Iya Erebdobnyi ai umbura deiamnyi bona-bona ab, Er Iya Erebdobnyi biti wiboka dama deirin bona ab kalingna nang kiamnyi. 21Ba, Gersom yala Ladan deibdoba ara mabwe ilinto yaldakamwe. Ba, a nang sun weiknyi kiaminyi si ara Yehiel bisi sun weiknyi kiamnyi. 22Ba, Yehiel er mabwe si Zetam ab, Yoel ab ara Er Iya Erebdobnyi ai Bait Allah co bok deirin nang kiandei. 23-24A nang sun deibdoba deyok lilina ara Musa biryi Gersom deiamwe. Ba, Gersom biryi Sebuel deiamwe. Ba, Sebuel bira Er Imtamnyi ai bona kalingna sienyi kiamwe. Akiryi, Sebuel biryi Amram yala nang ab, Yizhar yala nang ab, Hebron yala nang ab, Uziel yala nang ab Er Imtamnyi ai deiriramnyi bona kalingnamnyi nang sienyi kiamwe. 25Ba, Eliezer biryi deibmou mabwe ara Sebuel er weit yabwe-er du yabwe kuramnyi. Eliezer biryi Rehabya deibmou. Ba, Rehabya biryi Yesaya deibmou. Ba, Yesaya biryi Yoram deibmou. Ba, Yoram biryi Zikhri deibmou. Ba, Zikhri biryi Selomit deibmou. 26Ani, Selomit ab, er du weit yabwe ab, er mabwe ab ara weik sienyi Daud ab, yala yuk-yuk sien nang ab, yin doun nang yubwa 1.000 baryi nang sien nang ab, yin doun nang yubwa 100 baryi nang sien nang ab, sun yin doun nang a nirya sienyi ab aryi Imtamnyi biti yuk wiboka kareramnyi. Ba, Er Imtamnyi ai deiriramnyi bona kalingnamnyi nang kuramnyi. 27Ba, a mining damnyi bona ara yuk atei mar bobmaniryi yin doun nang oboka sun bona daluramnyi bona asi, Er Iya Erebdobnyi biti yuk wiboka kareramnyi bona asi deiriramnyi. 28Ani, nabi Samuel ab, Kish mi Saul ab, ninyi si Ner mi si Abner ab, Zeruya mi Yoab ab aryi, Er Iya Erebdobnyi biti yuk wiboka dama kareramnyi dinyi asi, Selomit ab, er mabwe ab, er du weit yabwe ab kalingnamnyi.

29Ba, Yizhar deibdoba yala ara Kenanya ab, er mabwe ab ara Er Iya Erebdobnyi ai wa ara ina kum kuramnyi. Eda, yuk wa asi administrasi negara ab, malyi kubman ninyi asi weneboka deyok liliboka kimna nang kuramnyi. 30Ba, Hebron yala nang ara Hasabya ab, er du weit yabwe ab, er mabwe ab kuramnyi. Sun a nang nirya ara mar ordana milib weik nang akwe yubwa 1.700 baryi kuramnyi. Ani, a nang aryi me Yordan kouboka yaletam mutuk atei nirya ara Er Imtamnyi biti wa in dinyi ab, sienyi biti wa in dinyi ab ara a nang aryi liliramnyi. 31Ba, Hebron yala nang weiknyi kiamunyi bira Yeria biryi weiknyi kiamwe. Ura, Daud sienyi kiboka taleamwe talak kwalina 40 kibmou talak uca, lilirdenmai uca, Hebron yala nang ara mar ordana mikib weik nang akwe kuramnyi asi bikmai. A nang ara Yaezer-Gilead mutuk dam kuramnyi. 32Ba, Yeria deibdoba mabwe ab, er du weit yabwe ab ara mar ordana mikib weik nang akwe yubwa ara 2.700 baryi nang weik nang kibmai. Sun a nang asi Daud sienyi biryi wa kareboka tikeiamwe. Ba, Ruben yala nang ab, Gad yala nang ab, Manasye yala nang meici kukoka dinatam nang ab asi kalingna nang kiamnyi. Akiryi, Er Imtamnyi biti wa in dinyi ab, sienyi biti wa in dinyi ab ara a nang aryi liliramnyi.

Currently Selected:

1Tawarikh Uram 26: MTG

Highlight

Copy

Compare