1Tawarikh Uram 23

Sun Lewi yala nang asi bokoka wa karebmou deyok

23:1-32

1Ura, sienyi Daud sirya wisi danmou talak aryi er mi Salomo bisi Israel mutuk sienyi tikeibmou. 2Ura, sienyi Daud biryi sun Israel mutuk yuk sien nang ab, sun Lewi yala nang ab asi bulubdeibmou. 3Sirya bulubdeibmou ura, Lewi yala nang sun uki kuramnyi kwalina 30 baryi kuboka eitam kiamwe nang asi nungmai nirya ara 38.000 baryi eboka nukmai. 4Ura, Daud biryi sun a nukmai nang asi wa bokmouci, “Sun ninyi 24.000 baryi nang ara Er Iya Erebdobnyi ai si Bait Allah ai wa ibde binkwaming,” eboka wiboka, wa karebmou. Ba, sun ninyi 6.000 baryi nang ara Er Imtamnyi ai lilin lilibdeiboka, sun malyi dinyi kunubman nang asi uram sisikoka lilirdeirin wa karebmou. 5Ba, “Sun ninyi 4.000 baryi nang ara Er Imtamnyi ai Bait Allah weik bisik bublan dam kalingni nang kibdeibmou. Ba, ton 4.000 baryi nang ara niryi Er Iya Erebdobnyi biti mot seboka, lilim en keica kiknibminiksa aryi douboka lilim enmamunci, Imtamnyi mot semkwandum,” eboka karebmou. Ato kuboka sienyi Daud biryi sunsi wa karebmou. 6Ani, sienyi Daud biryi sun Lewi yala nang asi bokoka ninyi dika winiryi kibdeibmou. Ara, sun Gerson yala nang tam ton, Kehat yala nang tam ton ura, Merari yala nang tam ton kibdeibnin yibinmou.

7Gerson bira er mabwe bitinyi deibdamwe ba, kuroramnyi. Ba, er mabwe sun si ara Ladan ab, Simei ab deibdamwe ba, kuramnyi. 8Ba, Ladan bira er mabwe winiryi deibdamuryi, kuramwe. Ba, er mabwe sun si ara Yehiel ab, Zetam ab, Yoel ab deibdamwe ba, kuramnyi bok, Yehiel bira sun du kiboka kuramwe. 9Ba, sun Simei ai ninyi ara Ladan yala ninyi kiamiryi kuramnyi. Ba, Simei bira er mabwe winiryi deiamwe. Simei er mabwe sun si ara Selomit ab, Haziel ab, Haran ab deiamwe ba, kuramnyi. 10Ba, Simei bira er mabwe dumbaryi deibdamuryi, kuramwe. Ba, Simei er mabwe si ara Yahat ab, Ziza ab, Yeush ab, Beria ab deibdamwe ba, kuramnyi. 11Ba, Yahat bira sun du kuramwe ba, Ziza bira sun du damnyi kuramwe. Bok, Yeush ab, Beria ab ara sun mabwe weiki kum deibdandei akiryi sunda yala tentoka kibdamiryi kuramnyi. Ani, wa ababyi tentok doramiryi kuramnyi.

12Ba, sun Kehat mabwe si ara Amram ab, Yizhar ab, Hebron ab, Uziel ab deibdamwe ba, sun dumbaryi kuroramnyi. 13Ba, sun Amram mabwe ara Harun ab, Musa ab deibdamwe ba, kuroramnyi. Ba, Harun ab, er mabwe ab ara lek dinyi akwe iya ibde binkwandum eboka imam wa kareamwe. Ani, Er Iya Erebdobnyi dama uk daboka Er wa akwe iya ibde binkwaming eboka wa kareamwe. 14Ba, Er Imtamnyi wa inanyi Musa mabwe ara iya Er Imtamnyi wa akwe ibde binkwandum eboka sun Lewi yala nang tam kibdeiamwe. 15Ba, Er Imtamnyi wa inanyi Musa er mabwe si ara Gersom ab, Eliezer ab deibdamwe ba, kuramnyi. 16Ba, Gersom mi si ara Sebuel deibdamwe ba, er mi ara sienyi kiboka kuramwe. 17Ba, Eliezer mi si ara Rehabya tentok deibdamwe ba, kurorandei. Ba, Eliezer mi Rehabya bira er mabwe ilinto deiriramunyi kuramwe. 18Ba, Yizhar er mi si ara Selomit tentok deibdamwe ba, kurorandei. Ba, Yizhar mi si Selomit bira er nai yala sienyi kiboka kuramwe. 19Ba, sun Hebron mabwe si ara dunyi si Yeria ab, aramnyi si Amarya ab, winirinyi si Yahaziel ab, dumunyi si Yekameam ab deibdamwe ba, kuroramnyi. Ba, sun du Yeria bira sun yala sienyi kiboka kuramwe. 20Ba, Uziel mabwe si ara Mikha ab, Yisia ab deibdamwe ba, kuroramnyi. Ba, er mi dunyi Mikha bira sun yala sienyi kuramwe.

21Ura, Merari mabwe si ara Mahli ab Musi ab deibdamwe ba, kuroramnyi. Ba, Mahli mabwe si ara Eleazar ab, Kish ab deibdamwe ba, kuroramnyi. 22Ba, Eleazar bira mabwe ton kum deiamwe eda, nermabwe akwe yaldangnamwe ba, kuramnyi. Ba, sun nai er weit Kish mabwe aryi a nermabwe asi doamnyi ba, dobdandoka kuroramnyi. 23Ba, Musi bira mabwe winiryi deibdamwe. Er mabwe sun si ara Mahli ab, Eder ab, Yeremot ab deibdamwe ba, kuroramnyi.

24Ara, sun Lewi yala nang asi anyi biryi deiamwe yala nang sun sienyi bira ato kuboka taleamwe ba, kuramnyi ara atiba eboka yuk-yuk liliboka sekeibwe. Ba, sun anda nang ara sun kwalina 20 baryi kimban ura, Er Iya Erebdobnyi ai in wa doramnyi eboka liliboka sekeibwe. 25Ara, sienyi Daud biryi sirya ato eamwe, “Er Iya Erebdobnyi, nun Israel nang molonanyi biryi nun Israel ninyi asi sirya teleb asa akwe kun dinyi karebsou. Ani, Er Imtamnyi bira Yerusalem atei iya a kurur. 26A deyok aryi Er Imtamnyi ai Bait Allah ab, Bait Allah umbura kurande lek dinyi ab ara sun Lewi yala nang akwe taleboka wa ibingnyei,” eamwe. 27Er sienyi Daud biryi ato kuboka sirya ebdeibde binamwe deyok aryi sun Lewi yala ninyi nirya ara sun kwalina sirya 20 baryi kimbaci ura, sunci Er Imtamnyi ai wa inkwamingnyi ati si sengyankwanung. 28Sun Lewi yala nang wa ara, “Harun mabwe Er Iya Erebdobnyi ai Er si weik eboka molon tum wa asi ibmiliboka, Er Imtamnyi ai keta kalikde binkwanung. Ani, akai umtam kalikoka, Er Imtamnyi ai lek dinyi asi me ilikde binkwanung. Ani, tonda Er Imtamnyi ai dam dama deirina ab, molona ab ati wa akwe ibde binkwanung. 29Ani, sun Israel ninyi aryi Er Imtamnyi biti deibmangnyi dama babyi roti kwaning kiknin keica tepung teleb aryi yina-yina dama deiboka uk dan dinyi babyi nirya sunci kiknibkwanung. Ani, mitik roti bok asi roti bungbung ena dongona kum kubmangnyi roti asi uk bita dabmangnyi roti ababyi sunci kiknibkwanung. 30Ani, sunci belekuna babyi, inibdoroban babyi Er Iya Erebdobnyi bisi si weik eboka mot semnikwanung. 31Ani, Er Iya Erebdobnyi biti bisam domba oboka uk danmangnyi tum Sabat tum babyi, ukuryok wala berekmaci tum babyi ara ato kuboka dama deibibiryi molonkwanub eamingnyi to kuboka ukunkwanung. 32Ani, sunci Kemah Suci ai babyi, Er Iya Erebdobnyi ai Bait Allah babyi, sun wa kareamingnyi to akwe kunuboka wa iramingiryi kalingkwanung. Ara, sun kwit yabwe Harun mabwe asi Er Iya Erebdobnyi ai molon tum irmiliboka sunci kalingkwanung,” ebmou.

Currently Selected:

1Tawarikh Uram 23: MTG

Highlight

Copy

Compare