1Tawarikh Uram 24

Sun Er Imtamnyi biti ninyi dama deirin nang imam nang asi wa karebmou deyok

24:1-19

1Ura, a kerek sengna aryi liliboka kerek sekeibwe ara sun Harun mabwe yala deyok ati liliboka sekeibwe. Sun Harun mabwe si ara Nadab ab, Abihu ab, Eleazar ab, Itamar ab deibdamwe. 2Bok, Nadab ab, Abihu ab ara sun nai kam tuba kuramwe bok, sun minob diandei. Ba, a nang bitinyi mabwe ton deirona kum kuamuryok asi diandei. Ba, sun nai iramwe wa imam wa ara Eleazar ab, Itamar ab aryi taleandei. 3Ba, weik sienyi Daud ab, Eleazar deibdobanyi Zadok ab, Itamar deibdobanyi Ahimelekh ab ara Er Imtamnyi biti dama deiboka molon wa eterenkwamnyi to kuboka bokdobmai. 4Uca, Eleazar yaldangna ninyi asi weik kuramnyi. Ba, Itamar yaldangna ninyi ara mitikanun kuramnyi. Ato kuramnyi deyok aryi sun ninyi ato kuboka bokamnyi. Ara, sun Eleazar yaldangna ninyi ara ai ninyi sun du 16 baryi kibdeiamnyi. Bok, sun Itamar yaldangna ninyi ara ai ninyi sun du inbaryi kibdeiamnyi. 5Ani, sun Eleazar yala nang babyi, Itamar yala nang babyi nirya asi, “Unanyi wibkwayeb do?” eboka sun si mitik kerek sengna sekmaci yamin deibmai. Ato kubmai ara sun Eleazar yala nang babyi, sun Itamar yala nang babyi ara Er Iya Erebdobnyi ai wa ina kikiman nang ab, Er Imtamnyi uram eterena kikiman nang ab akwe kuramnyi deyok aryi ato kuboka yamin deiboka wibmai. 6Ba, sienyi Daud ab, sun Israel yuk sien nang ab, imam Zadok ab, Abyatar mi imam Ahimelekh ab urasin dam aryi sun si sekmou ba, yamin deibmai. Sun si sekmounyi bira Lewi yalanyi Sembaya mi Netaneel kerek sengnanyi biryi sun si sekokmou ba, yamin deibmai. Ani, imam nang sun sien nang ab, sun Lewi yala nang du nang ab urasin dam aryi sun a bitinyi yala nang sun si sekoka yamin deibmai.

7Ura, “Unanyi bisi wibkwamab do?” eboka yamin deibmai uca, yuma ara Yoyarib eboka wibmai ba, bitinyi dinyi ara Yedaya eboka wibmai. 8Ba, winirinyi bira Harim eboka wibmai ba, dumunyi bira Seorim eboka wibmai. 9Ba, amunyi bira Malkia eboka wibmai ba, nabnyi bira Miyamin eboka wibmai. 10Ba, tanyi bira Hakos eboka wibmai ba, inyi bira Abia eboka wibmai. 11Ba, toubnanyi bira Yesua eboka wibmai ba, takubaryanyi bira Sekhanya eboka wibmai. 12Ba, koklombaryanyi bira Elyasib eboka wibmai ba, amolbaryanyi bira Yakim eboka wibmai. 13Ba, 13 baryanyi bira Hupa eboka wibmai ba, 14 baryanyi bira Yesebeab eboka wibmai. 14Ba, 15 baryanyi bira Bilga eboka wibmai ba, 16 baryanyi bira Imer eboka wibmai. 15Ba, 17 baryanyi bira Hezir eboka wibmai ba, 18 baryanyi bira Hapizes eboka wibmai. 16Ba, 19 baryanyi bira Petahya eboka wibmai ba, 20 baryanyi bira Yehezkel eboka wibmai. 17Ba, 21 baryanyi bira Yakhin eboka wibmai ba, 22 baryanyi bira Gamul eboka wibmai. 18Ba, 23 baryanyi bira Delaya eboka wibmai ba, 24 baryanyi bira Maazya eboka wibmai. 19Ara, sun Er Iya Erebdobnyi ai Bait Allah ai wa inkwamnyi ati wa karebmou. Ara, Er Iya Erebdobnyi sun Israel nang molonanyi biryi sun abwe Harun deici asi ebdeiamwe to kuboka wa karebmou. Sienyi Daud ab, sun Israel yuk weik sien nang ab aryi sun a bitinyi yala nang asi wiboka wa karebnin yibinmai.

Sun Lewi yala ninyi deyok

24:20-31

20Ura, sun Lewi yala nang asi, ton tam nang Amram biryi yaldakamwe ba, deibdanin baramnyi nang sun si kerek sengna kum kubmai. A nang sun si ara Amram biryi Subael deiamwe. Ba, Subael biryi deiamwe mi si ara Yehdeya deiamwe. 21Ba, Rehabya bira Yisia deiamwe ba, kurorandei. 22Yizhar biryi Selomot deiamwe ba, Selomot er mi si ara Yahat deibdamwe. 23Ba, Hebron mabwe si ara yumanyi si Yeria ab, aramnyi si Amarya ab, winirinyi si Yahaziel ab, dumunyi si Yekameam ab deiamwe ba, kuramnyi. 24Ba, Uziel mi si ara Mikha deiamwe. Ba, Mikha biryi Samir ab deibdamwe ba, kuroramnyi. 25Ba, Mikha er kwit si ara Yisia kuramwe. Ba, Yisia mi si ara Zakharia deiamwe ba, kurorandei. 26Ba, Merari yala nang sun si ara Mahli ab, Musi ab deiamwe. Yaazia mabwe ababyi sun ai ninyi du nang kuramnyi. 27Ba, Merari yala nang bok asi Yaazia biryi deiamwe mabwe si ara Syoham ab, Zakur ab Hibri ab deiamwe ba, kuramnyi. 28Ba, Mahli bira Eleazar deiamwe. Ba, Eleazar bira sal ton deirina kum kuamwe. 29Ba, Kish bira mi tentok deibdamwe ara Yerahmeel deibdamwe ba, kurorandei. 30Ba, Musi bira mabwe winiryi deibdamwe. Sun si ara Mahli ab, Eder ab Yerimot ab deibdamwe ba, kuroramnyi. Ara, sun Lewi yala nang sun ai ninyi kuramnyi to ati liliboka kerek sekeibwe. 31Sun Harun mabwe ababyi sun kwit yabwe kubmai to kuboka sun si sekyi ura, “Unanyi bisi wibkwamab do?” eboka yamin deibmai. Ara, sienyi Daud ab, imam Zadok ab, imam Ahimelekh ab, sun yala yuk-yuk sien nang ab, Lewi yang nang dinmaia dam aryi sun si sekoka yamin deiboka wibmai. A wibmaici wa bokmai ara dunyi yala yukto, weitnyi yala yukto kiboka wimna kum kubmai. Eda, neikto akwe wiboka wa karebdanmai.

Currently Selected:

1Tawarikh Uram 24: MTG

Highlight

Copy

Compare