1Tawarikh Uram 22

1Ura, sienyi Daud biryi sun Israel ninyi asi ato ebmou. “Nun Nai Iya Erebdobnyi nun molonanyi ai ara a dikum asi dobkwayeb. Dobibiryi, nun Israel ninyi aryi Er Imtamnyi biti dama deiboka uk dan keil dungna ara a dikum asi dobkwayeb,” ebmou.

Er Imtamnyi ai dobkwamwe ati kiknirminingdamwe deyok

22:2-19

2Ura, uki tentok tum aryi sienyi Daud biryi, “Sun Israel mutuk tingyandoka kunung ninyi asi bulubdeibdarur,” ebmou. Ba, naboka sirya bulubdeibmai ura, sienyi Daud biryi sun anda tingyangan ninyi asi wa karebmou. Ara, “Er Imtamnyi ai dobkwan ati keil asi utururminingni nang kibdarur,” eboka wa karebmou. 3Ba, akai er weik bisik bublan kiknibkwamwe ati dangna bing paku ab, engsel ab ara sienyi Daud biryi besi weikanun doboka bulubminikmou. Ani, tembaga ababyi ilinto doboka bulubminikmou ara er ikin bikoka nukman kumto kubmou. 4Ani, co keibyal boboka bulubminikmou ara er ikin bikoka nukman kumto kubmou. A co aras ara sun Sidon nang ab Tirus nang ab aryi sienyi Daud biti boyanmai ara nukman kumto kubmou. 5Er sienyi Daud biryi akai dona ati a nirya kiknibminikmou ara ato tenebmouci, kiknibminikmou. “Ni mi Salomo bira ukuryok neronmararyi ukutotoa nirya kum bikmar. Aminda erci Er Iya Erebdobnyi ai dobkwande ara ilila ai dobkwande ba, sun tukwe dangna mutuk ninyi aryi akai weik ati ngalukoka si erebdeibkwaming. Ati, ni er nai biryi a dobkwande dinyi nirya kiknibminikwan,” teneamwe. Ato kuboka teneamuryi, dina kum kuamwe talak aryi er mi Salomo biryi akai dobkwamwe dinyi nirya kiknibminikmou.

6Ato kuboka sirya kiknibminikmou ura, er mi Salomo bisi, “Er Iya Erebdobnyi nun Israel ninyi molonanyi ai dobdum,” ebkwamou ati nabmouci, ato ebmou. 7#2Sam. 7:1-16; 1Taw. 17:1-14“A mi, nira minob uca, ‘Er Iya Erebdobnyi nun molonanyi ai dobkwan,’ teneansiryi akai don dinyi nirya minikde kunun. 8Bok asi, Er Iya Erebdobnyi biryi nisi ato ebdeibmanir, ‘Daud kanda, tukwe dangna mutuk nang asi weik mar bobokabminci, sun ninyi nirya orsengdum ba, ining weik sangdur. Ara, Ni Imtamnyi urasintam asi ato kunurum deyok aryi Ni ai ara kanci kum dobkwanirim,’ ebnou. 9Er Imtamnyi biryi ato eanou cok asi, tubto, ‘Ato dinyi karebkwankin,’ eanou. Ara, ‘Daud, kanci mi tentok deibdobkwandim mi aryi teleb asa kuboka sun Israel nang sienyi kiboka talebkwande. Ani, sun yuk mutuk nang aryi ersi mar ton boboka kum obdenkwaming. Ara, Ni Imtamnyi biryi ersi iya kalikmurubde binkwan. A karebkinyi ba, deibkwandim mi si ara Salomo eboka dobkwandum. Ba, erci sun Israel sienyi kiboka talebkwande talak ara mangkau asa akwe kubokabingiryi, ukutotoa nirya sun dam kubkwande dinyi karebkwan. 10Akiryi, sienyi Daud, kan mi si Salomo biryi Ni Imtamnyi ai dobkwanir. Ba, Ni Imtamnyi bira er Nai kibnyi ura, erda iya Ni Imtamnyi mi kibkwande. Ba, Israel atei sienyi kiboka talen dinyi ara er deibdoba aryok sienyi kiboka Israel atei iya talebde binkwaming,’ ebnou. 11A mi Salomo, kan deyok ati Er Imtamnyi biryi, ‘Kansi ukubkwankin,’ ebdeibkou to kuboka aminda kan dam kunubdeibkwankir. Ara, Salomo, kanci Israel mutuk sienyi kibminci, talebkwandim tam babyi, Er Imtamnyi ai dobde binkwandim tam babyi nirya ara Er Iya Erebdobnyi biryi kalikoka milibde binkwankir. 12Akiryi Er Iya Erebdobnyi biryi kansi bukdob bingna dinyi ab, teneiboka kunun dinyi ab karekina teleb. Ani, Er Imtamnyi biryi kansi Israel mutuk talenanyi kibdeibkwankir. Ba, kanci Er Iya Erebdobnyi nun molonanyi biryi, ‘Ukubdarur,’ ebdeibsou uram kalikde binkwandim. 13Ati, Er Iya Erebdobnyi biryi Musa deici asi nun Israel ninyi asi, ‘Ato ukubdarur,’ eboka yan memebdeibsouci, iya kibdeibsou dinyi asi kunubde binkwandum. Anda dinyi asi kunubde biminyi ura, kansi, ‘Ukubkwankin,’ ebkou dinyi karebkwankir. Ati, kan kanya wisibdobminci, mikib kibdobdum. Ani, kanci ukutotoa ukubde binkwandima nirya ara ilil kukina mem!

14Ba, kanci Er Iya Erebdobnyi ai dobkwandim tam ara niryi sirya a dobkwandim dinyi nirya kiknibdeibse. Ara, emas 3.400.000 kilogram baryi ab, perak 34.000.000 kilogram baryi ab, tembaga ab, besi ab ara nukman kumto kuboka sirya kiknibdeibse. Ba, a kiknibdeibse ai don dinyi er ikin ara nukoka bikman kumto asi kiknibdeibse. Ani, akai don co babyi, keil babyi ara sirya kiknibdeibse. Ato kuboka sirya kiknibdeibse bok, kanci tubto tabakoka minikminci, dobkwandum. 15Ani, kanti miliboka akai dobkwaming nang ara sirya ilinto kiknibdeibse. Sun anda nang ara keil utururminingni nang ab, keil kiknirminingni nang ab, co kiknirminingni nang ab, yuk-yuk ai don dinyi kiknina diboka bingni nang ababyi nirya bobminikse. 16Ani, sun emas kiknirminingni nang ab, perak kiknirminingni nang ab, tembaga kiknirminingni nang ab, besi ab ara nukman kumto kuboka sirya kiknibminikse. Ati, a mi, kanci Er Imtamnyi ai ur dobdum! Akai dobde binkwandim tam ara Er Iya Erebdobnyi biryi kansi kalikoka milibde binkwankir.” Sienyi Daud biryi er mi Salomo bisi, “Ato kuboka Er Imtamnyi ai dobde birum,” ebdeibmou.

17Ura, tubto Daud biryi sun Israel yuk weik sien nang asi, “Salomo biryi Er Imtamnyi ai dobkwande ati, sunci ato kuboka milibdarur,” ebkwamouci, ato ebmou. 18“Er Iya Erebdobnyi nun molonanyi biryi sunsi sirya milibdansou. Sirya miliansouci, nun mutuk dam teleb asa akwe kubde ban dinyi karebsou. Ani, Er Imtamnyi biryi sun Kanaan mutuk yoka nang nirya asi muna kirdongon dinyi kareansou ba, niryi sun nirya asi oboka muna kirdongoranse. Ara, sun yuk mutuk nang bok, nun atei kuramnyi nang asi nirya oboka muna kirdongoranse. Akiryi uku talak ara akatei ninyi nirya ara Er Iya Erebdobnyi urasintam asi nun ilil tenebokabingiryi, kuraming. 19Akiryi uku talak ara sun kanya babyi, sun nong babyi nirya ara Er Iya Erebdobnyi nun molonanyi bikwe ingkirikde bindarur! Ara, sunci Er Iya Erebdobnyi kun ai dobsindarur. Ba, Er Imtamnyi biryi, ‘Ukubdarur-ukuna mem,’ en uram deirin co sangkol ab, Er Imtamnyi ai deirin lek dinyi ab ara, ‘Er Iya Erebdobnyi ai,’ eboka doamunyi ai deibkwandarur.” Er sienyi Daud biryi sun Israel weik nang ab, er mi Salomo ab asi, “Ato kuboka Er Imtamnyi ai dobkwandarur,” ebmou.

Currently Selected:

1Tawarikh Uram 22: MTG

Highlight

Copy

Compare