1Tawarikh Uram 21

A mutuk ninyi si kerek sekmai deyok ati, ikin dinyi karebmou deyok

21:1-17

(2Sam. 24:1-17)

1Ura, sun Israel ninyi asi isa sienyi biryi mar boboka obminikwamouci, sienyi Daud bisi, “ ‘Sun Israel ninyi kunung tok nirya asi nungbindarur!’ eboka arukminyi ba, nungbinkwaming,” ebmou. 2Ba, weik sienyi Daud biryi er yin doun sienyi Yoab ab, yuk yin doun nang menengna nang ab asi ato ebmou. “Sunci, ‘Israel mutuk a kunung ninyi nirya ara ukubaryi kunung,’ eboka bikwaman ati Israel mutuk ninyi nirya nukde bindarur. Ara, Dan yala nang kunung mutuk aryi kuboka Bersyeba mutuk nirya kerek sekde yibindarur,” ebmou. 3Uca, Yoab biryi sienyi Daud bisi ato ebmou. “Er Iya Erebdobnyi biryi nun Israel ninyi yin doun nang a kunub ninyi yubwa ato akwe tubto yubwa seratus baryi tabakdongoboka weik kimdeirisina teleb. Nai sienyi, sun Israel ninyi nirya kan uram asi kekeboka, kan ebmaminyi to kunubde banung. Bok, unato ati, ‘Sun Israel ninyi kunung tok tubto bindarur,’ ebmasirim ba, nungbinkwamab do? Nai, nunci ato kunmabyi deyok aryi sun Israel ninyi nirya ikin dinyi takubdobingnyei,” ebmou. 4Uca, sienyi Daud biryi Yoab a ebmou uram kekena kum kubmouci, “Ni ebman to akwe kunubdarur,” ebmou. Ba, sienyi Daud ebmou to kuboka Yoab biryi, “Israel mutuk ninyi ukubaryi kunung,” eboka sun si sengbinmou ani, tubto sienyi Daud dam Yerusalem atei tamuryanmou. 5Sirya tamuryanmouci, sienyi Daud bisi, “Nai, sun Israel mutuk ninyi ara ukubaryi kunung,” eboka sekmou dinyi yandoka ato ebmou. Ara, sun Israel mutuk yin doun nang ara ninyi 1.100.000 baryi kunung. Ba, sun Yehuda mutuk yin doun nang ara ninyi 470.000 baryi kunung. 6Ba, Yoab biryi, “Sun Lewi yala ninyi ab, sun Benyamin yala ninyi ab ara ukubaryi kunung,” eboka si kerek sekoka kum boyanmou. Ara, weik sienyi biryi, “Ukubkwandum,” ebmou dinyi ara duknasito dinyi asi ebmou ati, er arukmou to kum kunubmou.

7Ato kuboka sun Israel ninyi ara ukubaryi kunung eboka lak ena ara Er Imtamnyi urasintam asi yu dinyi kibdeibmou. Ba, sun Israel ninyi nirya asi Er Imtamnyi biryi ikin dinyi karebmou. 8Ba, sienyi Daud biryi Er Imtamnyi bisi ato eboka molobmou. “Nai Imtamnyi, ato kubman dinyi aryi niryi sirya iya malyito dinyi kunubman ati Nai ni malyi kubman dinyi kilibnurum,” eboka molobmou. 9Uca, Er Iya Erebdobnyi biryi Er Imtamnyi uram ermurunanyi nabi Gad deici asi ato ebdeibmou. 10Ara, “Daud bisi ato erbirum, ‘Ni Iya Erebdobnyi biryi sienyi Daud kansi ikin dinyi winiryi karebkwamakin asi kanci wibdobkwamarum. Ba, kanci a wibdobminyi ikin dinyi asi Niryi karebkwankin,’ ati kanci, ‘Er Iya Erebdobnyi bira ato ebdeibmakir,’ erbirum,” ebmou. 11Ura, Gad biryi sienyi Daud dam yanmouci, “Er Iya Erebdobnyi bira, ‘Niryi kansi ikin dinyi winiryi karebkwaman asi wibdobkwandim,’ ebmakir. 12A winiryi karebkwankin ebmakir ikin dinyi ara kwalina winiryi asi akatei kwaning utana don dinyi wibdobkwandim do? Kan mar ordana nang aryi wala winiryi dobkirikwanking dinyi asi wibdobkwandim do? Ni Iya Erebdobnyi biryi ninyi on ya si pedang aryi sun Israel ninyi nirya asi orminingsin youn kum asi wibdobkwandim do? Ato ebmakir dinyi asi kanci, ‘A dinyi wibdobman,’ ebminyi ba, niryi tamuboka Er Imtamnyi bisi, ‘A dinyi asi wibdobmar,’ erbinkwan,” ebmou. 13Uca, sienyi Daud biryi Er Imtamnyi uram ermurunanyi nabi Gad bisi ato ebmou. “Ni kanya aryi anda ikin dinyi wibman kumto kubmanir. Ato kubmanir deyok aryi ninyi aryi onina ara malyito ati Er Iya Erebdobnyi ni boukwe boboka kalingnururnyi biryi obkwanir,” ebmou.

14Ba, Er Iya Erebdobnyi biryi sun Israel ninyi asi orminingsin youn karebmou. Ba, sun Israel ninyi 70.000 baryi nirya dibsekmai. 15Ani, Er Imtamnyi biryi Er uram eryuryangananyi malaikat tentok asi, “Yerusalem atei ninyi nirya orbirum,” eboka arukoka bokeibmou. Ba, a malaikat ara Yerusalem ninyi orbauci, Yebus ateinyi si Ornan gandum yalyi kwemni dam tingyangau ura, Er Iya Erebdobnyi biryi tubto dinmou uca, boukwe tenebmou. Ura, malaikat asi ato ebmou, “Yerusalem nang orbindum,” ebmou to kumci, “Sirya obdim e! Ura, taruk irongmarima taklobdum,” ebmou ba, deiblobmai. 16Ba, sienyi Daud bira dirwelenmou uca, malaikat ara Yerusalem atei ninyi asi obkwamouci, ninyi on ya douboka im karin tukwe karin asi tikmou asi asing eibmou. Ura, Daud ab akatei weik nang ab ninyi bita deibmangiryi ongoraming aling kolo ongobmaici, tukwe deici kisok dumuboka molobmou. 17Ato kunmou asi eibmouci, ato ebmou, “Nai Imtamnyi, sun Yerusalem ninyi aryi malyi dinyi kunubmongwe kuma eda, niryi malyi dinyi kunubmonwe. Nai Iya Erebdobnyi, nun molonanyi sun akatei ninyi asi ikin dinyi karebminyei. Eda, ni ab ni ai ninyi ab asi ikin dinyi karebsurum.” Ara, sienyi Daud biryi Er Imtamnyi bisi ato ebmou.

Dama deirin keil lamna Yerusalem atei dam dobmai deyok

21:18–22:1

(2Sam. 24:18-25)

18Ura, Er Iya Erebdobnyi uram eryuryangananyi malaikat biryi sienyi Daud biti nabi Gad deici asi ato ebdeibmou. “Sienyi Daud biryi Yebus ateinyi Ornan gandum yalyi kwemni dam asi bindoka Er Iya Erebdobnyi biti dama deirin keil lamna bindoka dobdur,” ebdeibmou. 19Ba, sienyi Daud bira Er Iya Erebdobnyi biryi Gad deici asi ebdeibmou to kuboka anabdobmou. 20Ura, a gandum yalyi kwemni dam ara Ornan ab, er mabwe dumbaryi ab gandum du yalyi kwemai. Ani, sun a dumbaryi mabwe ara malaikat eibmaici, cukoka inirorbinmai. 21Ura, sun nai Ornan biryi dinmou uca, sienyi Daud yanganmou asi eibmou. Eibmouci, er kisok tukwe ai luknubdongoboka kibdobmou. 22Ato kuboka sirya kibdobmou ura, sienyi Daud biryi Ornan bisi ato ebmou. “Ornan, kan gandum yalyi kwerum tukwe ara niti karebnurum. Ba, niryi Er Iya Erebdobnyi biti dama deirin keil lamna dobnyi ba, a eibmasir youn loboka kum dankwande. Ati, a tukwe ara kanci, ‘Ukubaryi deknurum,’ ebminyi tok dekwamakin,” ebmou. 23Uca, Ornan biryi sienyi Daud bisi ato ebmou, “Ni nai, teleb aryi ur a tukwe dobminci, kan tenebmaminyi to kuboka da kubdum. Ani, a keil dungna dobminci, dama deiboka uk dabkwandim bisam sapi ara a deibse bisam aryi doboka dama deibminci, uk dabkwandum. Ba, a bisam dama dabkwandim co ara gandum yalyi kwemnunci, deirinun co las aryi dabkwandim. Ani, gandum ababyi a keil dungna dub dama deibkwandim. A karebkin dinyi nirya ara nai sienyi, kanci nisi dengna kum kubkwamanirim eda, niryi ur karebmakin,” ebmou. 24Uca, sienyi Daud biryi Ornan bisi ato ebmou, “Kan tukwe babyi, kan ukutotoa nirya babyi ara ur karerloning kum eda, niryi kansi dekwankin. Er Iya Erebdobnyi dinyi ati niryi kan ukutotoa babyi, kan tukwe ur kum dobdobkwaman. Ani, niryi kan dinyi asi kum dekmakiniryok Er Imtamnyi biti dama deiboka uk kum dabkwaman,” ebmou. 25Ato ebmouci, sienyi Daud biryi Ornan bisi emas dekmou. Ara, emas ikin ara 7 kilogram baryi dengdaming to kuboka dekmou. 26Sienyi Daud biryi Ornan tukwe asi ato kuboka dekmouci, Er Iya Erebdobnyi biti dama deirin keil lamna dobmou. Sirya dobmou ura, Er Imtamnyi biti sienyi Daud biryi bisam sapi yim oboka dama deibmouci, nong nirya uk dabmou. Ani, Er Imtamnyi ab sun ninyi ab antanirdana ati dama deiboka molobmou. Ato kuboka dama deibmouci, molobmou ba, Er Iya Erebdobnyi biryi ersi uk imtam aryi karebmou. A karebmou uk ara a dama deirin keil lamna deici asi dobkwetebmou. 27Ura, Er Iya Erebdobnyi biryi, “Yerusalem ninyi oryurbirum,” eboka arukmou malaikat asi ato ebmou. “Yerusalem ninyi nirya orbirum eboka karebmonwe ninyi on ya ya kin bisik tubto kibdongobdum,” ebmou. Ba, a malaikat aryi Er Imtamnyi biryi ebmou to kuboka, a ninyi on ya kin aling kibdongobmou.

28Ura, sienyi Daud biryi ato kuboka dama deirin keil lamna sirya dobmouci, dama deiboka molobmou. Ba, Er Iya Erebdobnyi biryi er molona kekeboka karebmou. 29A talak ara er Musa biryi Er Imtamnyi keis ol ai si Kemah Suci ara yini mutuk doamwe ai ab, Er Imtamnyi biti dama deirin keil lamna kikniboka deiamwe ab asi Gibeon mutuk kon dam bobinamwe ara tuba a kuamwe. 30Bok asi, sienyi Daud biryi a mutuk bindoka Er Imtamnyi bisi uram sisingbana kum kubmou. Ara, Er Iya Erebdobnyi uram eryuryangananyi ninyi on ya ati a mutuk dam kum binmou.

Currently Selected:

1Tawarikh Uram 21: MTG

Highlight

Copy

Compare