1Tawarikh Uram 18

Daud biryi er mar ordana nang asi muna oboka ereroramwe deyok

18:1-13

(2Sam. 8:1-14)

1Ura, Daud biryi Filistin nang asi mar boboka erebdobmouci, weik atei Gat ab, mitik-mitik atei ab araboka sun mutuk kibdobmai. Ara, akatei minob kuramnyi nang Israel nang sun amwetam nang kibdeibmai.

2Ani, tonda Moab mutuk mar boboka erebdobmou ba, Moab mutuk ninyi ara luknubdeibmou. Ba, Daud biryi, “Tukwe dengna dengkwandum,” ebmou ba, tukwe dengna dengnamnyi.

3Ani, Daud biryi Efrat mutuk ara er mutuk kimbinmouci, mutuk si Hamat dam aryi Zoba sienyi si Hadadezer bisi mar boboka erebdobmou. 4Ura, Daud biryi akatei sienyi ab, akatei yin doun nang ab, sun kongkong ena yubwa 1.000 baryi dalubdobmou. Ani, ninyi kuda bon yin doun nang yubwa 7.000 baryi taleboka er atei boyanmou. Ani, tukwe bisik yiban yin doun nang yubwa 20.000 baryi taleboka er atei boyanmou. Ura, bisam kuda deici bukoka ninyi orban kuda 100 baryok taklobmou ura, da kuda yubwa ara kuda yan melmel sekoka bukeibnin yibinmou. 5Ba, Zoba mutuk sienyi Hadadezer bira Aram mutuk atei si Damsyik atei nang aryi lemdoryanmai. Uca, Daud biryi Aram mutuk yin doun nang yubwa 22.000 baryi nang ara obukmou. 6Ura, Aram nang Damsyik atei nang ara Daud biryi er atei yin doun nang ab, er atei ninyi ab asi arukmou. Ba, Damsyik atei dam kuboka kalingnamiryi, il dimnamnyi ba, luknubdongoboka tukwe dengna dengnamnyi. Ukuboka Er Iya Erebdobnyi biryi Daud bisi miliramwe ba, Daud dantam-dantam mar bobmana nirya sun muna oboka ereroramwe. 7Ura, Daud biryi Hadadezer Zoba sienyi ab er, yin doun nang ab boramnyi mar u lisingna ati mar u limdona yubwa emas aryi kikniamya daluboka Yerusalem atei bobde yanmou. 8Ani, Hadadezer taleamwe weik atei si Tibhat ab, Kun ab aryi dengna weik keil si tembaga ilinto dalubdobmouci, bobde yanmou. Daud biryi a boyanamwe tembaga aryi, er mi Salomo biryi weik me kwan deirina sangkol ton kikniamwe. Tonda abyokomna toto kiknibdanamwe, ani yuk-yuk dinyi ukuna ati kiknibminikamwe.

9Ura, Hamat sienyi si Tou kekenmou uca, “Daud biryi Zoba atei sienyi Hadadezer ab, er yin doun nang ab asi mar boboka erebdobmar,” en uram kekebmou. 10Ura, Tou biryi Daud bisi, “Ni kwit, teleb bitabmarim,” eboka er mi si Hadoram bisi uram deibmouci, bona emas toto, perak toto, tembaga toto deibmou ba, Daud dam boyanmou. Tou biryi ato kuboka kasubmou ara erci Hadadezer bisi mar boramwe uca, Tou ersi muna obdongoboka er ereroramwe deyok aryi ato kubmou. 11Ani, Daud biryi anda boyangaramnyi bona ara Er Imtamnyi biti dama deibmou. A deibmou bona ara yuk-yuk mutuk si Edom ab, Moab ab, Amon yala nang mutuk ab, Filistin mutuk ab, Amalek mutuk ab aryi boyangaramnyi bona Er Imtamnyi biti dama deibmou.

12Ani, Zeruya mi Abisai biryi Edom mutuk ninyi asi Asin Bakan dam aryi ninyi yubwa 18.000 baryi obmou. 13Ani, Daud yin doun nang Edom mutuk kuramunci, “Kalikdarur,” eamwe ba, kalikoka a mutuk ninyi asi il dimnamnyi. Akiryi Daud bisi Er Iya Erebdobnyi miliramwe deyok aryi dantam-dantam Daud biryi ninyi mar boramwe tok muna oboka ereroramwe.

Daud sienyi kiamwa amwetam wa iramnyi nang deyok

18:14-17

(2Sam. 8:15-18; 2Sam. 20:23-26)

14Ukuboka Daud biryi Israel mutuk nirya taleamuryi, sienyi kiamwe. Ura, Daud biryi mundu lobdobto teleb dinyi akwe kunuboka wa iramuryi, lilirdeiriramwe. 15Ura, a talak Zeruya mi Yoab bira Daud yin doun nang sienyi kiamwe. Ba, Ahilud mi si Yosafat bira co bok deirinanyi kiamwe. Ani, sienyi biryi uram ebdeibci ura, akatei ninyi asi erbindoka, akatei ninyi aryi ebmangnyi uram sienyi dam eryandoka kimnanyi kuramwe. 16Ba, Ahitub mi si Zadok ab, Abyatar mi si Ahimelekh ab ara Imtamnyi ai wa in nang imam kiandei. Ba, Sausa bira a mutuk si kerek sengnanyi kuramwe. 17Ba, Yoyada mi Benaya bira Kreti nang ab, Pleti nang ab yin doun nang sienyi kiamwe. Ba, Daud er mabwe kobdoba ara er sienyi kiamwe amwetam wa asi, erebdob wa akwe doboka wa iramnyi.

Currently Selected:

1Tawarikh Uram 18: MTG

Highlight

Copy

Compare