1Tawarikh Uram 14

Daud sienyi kiboka kuramwe ai dam ab er ai kobdoba ab deyok

14:1-7

(2Sam. 5:11-16; 1Taw. 3:5-9)

1Tirus mutuknyi si Hiram biryi Daud bisi ai don nang ninyi bokdonokmouci, yangamna co las ab, ai don nang ab, keil kiknin nang ab bokdonokmou. Ba, weik sienyi Daud ai dorbinmai. 2Ba, Daud biryi ato tenebmou, “Er Iya Erebdobnyi biryi Er mabwe Israel ninyi weik sienyi kibdeiboka erebdeibnou,” tenebmou.

3Ba, Daud bira Hebron dam yanmou ura, Yerusalem atei nerabwe ton yandoka dobmou. Ura, tubto mabwe ab, nermabwe ab deibmou. 4Ara, Yerusalem kuramwe talak aryi deibmou mabwe sun si ara: Syamua ab, Sobab ab, Natan ab, Salomo ab, 5Yibhar ab, Elisua ab, Elpelet ab, 6Nogah ab, Nefeg ab, Yafia ab, 7Elisama ab, Beelyada ab, Elifelet ab deibmou.

Daud biryi Filistin nang oboka erebdobmou deyok

14:8-17

(2Sam. 5:17-25)

8Sun Filistin ninyi kekenmai uca, “Daud bisi Israel ninyi talebkwande ati, me kisok dikeiboka weik sienyi tikeibmang,” en uram kekebmai. Ura, Filistin ninyi nirya anaboka, “Daud talebkwayeb,” tenen iyanmai. Uca, Daud bira a uram kekebmouci, anaboka sunsi mar bobmou. 9Ba, sun Filistin nang yandoka Refaim mutuk lu nirya ara sun asok akwe tangkalaklobmou. 10Ura, Daud biryi Er Iya Erebdobnyi bisi ato kuboka asibdenmou, “Nai, Iya Erebdobnyi niryi sun Filistin nang asi mar bobnyi ba, Kanci sunsi ni taruk dam karebkwamanirim do?” eboka asibmou. Uca, Er Iya Erebdobnyi biryi Daud bisi, ato ebmou, “Yo, diba, sun Filistin ninyi asi kan taruk dam karebkwamakin ati, ur mar ibirum,” ebmou. 11Ba, Daud bira mutuk si Baal-Perasim mutuk bindoka Filistin ninyi asi oboka erebdobmou. Ura, ato ebmou, “Er Iya Erebdobnyi biryi nitiboka, me obde siklirande to kuboka, ni mar ordan nang asi oboka kum dandeibde,” ebmou. Ato kubmou deyok aryi a mutuk si ara sun uram deib aryi, “Baal-Perasim,” eboka si dobmai. 12Ba, sun Filistin ninyi sun kwemdeina kiknibdeiboka moloramnyi dinyi ara sun atei o takloboka yanmaia asi Daud ab, er milin nang ab aminda binmaici, Daud ebmou to daluboka uk dabmai.

13Sun Filistin ninyi tubto mar iyanmaici, mutuk Refaim lu yandoka Filistin nang asok akwe tangkalaklobmou. 14Ura, Daud biryi Iya Erebdobnyi bisi tubto asibdenmou. Uca, Er Iya Erebdobnyi biryi ato ebmou, “Kanda menekoka mar ibana ara mem, eda kan yin doun nang nirya aryi aminda tam kuboka aknabdongobkwandarur. Ura, sun Filistin ninyi dongdeibmangnyi tam kuboka, co si kertau lomdarura kankan bisik iyandoka mar bobkwandarur. 15Bindoka kekebmunyi ba, co si kertau dubdub aryi ninyi mar ibangiryi yan bisal lilim erande to lilim ebkwaman. Ato enyi asi kekebmunyi ura, Filistin ninyi nirya obkiribkumunyi ati eniryi. Ati, a talak aryok mar ibinkundarur. Ni Iya Erebdobnyi sirya menekoka mar ibaniryi a lilim ebkunun,” ebmou. 16Ba, Iya Erebdobnyi biryi Daud ersi ebdeibmou to kuboka kunubmou. Ura, Daud biryi Filistin ninyi asi mutuk si Gibeon dam aryi kuboka obde binmou asi mutuk si Gezer dam bindoka nirya obkiribmou. 17Ura, im dangna tukwe dangna mutuk ninyi nirya Daud er si erebdeibmai. Tonda, Er Iya Erebdobnyi biryi a mutuk ninyi nirya Daud bisi ilil tenen kanya kibdeibmou.

Currently Selected:

1Tawarikh Uram 14: MTG

Highlight

Copy

Compare