1Tawarikh Uram 13

Er Iya Erebdobnyi biryi, “Ukubdarur-ukuna mem,” ebmou uram kerek sengna deirin co sangkol Kiryat-Yearim aryi boboka Yerusalem atei deirirbinmai deyok

13:1-14

(2Sam. 6:1-11)

1Ura, weik sienyi Daud biryi er yin doun nang 1.000 baryi nang kalingnamnyi nang ab, yin doun nang 100 baryi kalingnamnyi nang ab uram sisikmou. 2Ba, Israel ninyi nirya asi ato ebmou, “Sunci, ‘Teleb,’ tenebmunyi ura, tonda Er Iya Erebdobnyi nun moloraminyi biryi, ‘Teleb,’ tenebminci, ninyi mikbaryi bokeibkwan. Sunsi, nun Israel yala nang nirya Israel mutuk dantam-dantam kubmangnyi nang ab, Er Imtamnyi wa in nang imam nang ab Lewi yala nang sun weik atei kum, sun bisam winin mutuk kum kubmangnyi nang ab asi, ‘Boyamunyi ba, nun ab kubkwayeb,’ eboka bokeibkwan. 3Ba, ‘Saul bira weik sienyi kiboka kalingnamwe talak aryi Er Imtamnyi co sangkol kum dibniliramoubwe. Ati, ukura nunci Er Iya Erebdobnyi biryi, “Ukuna mem-ukubdarur,” ebmou uram deirin co sangkol doboka nun atei bobinkwayeb,’ eboka bokeibkwan,” ebmou. 4Ba, Israel ninyi nirya, “Teleb,” tenebmunyi ura, “Ukubkwayeb,” ebmai.

5Ba, Daud biryi Israel ninyi nirya Mesir mutuk me si Sikhor youkwetam aryi kuboka, me utam Hamat kuboka atei si Hamat ban bisik dam kuramnyi ninyi nirya bulubdeibmou. Ara, Er Imtamnyi co sangkol boyanganmaia bisik diryanmaici bulubmai. 6Ura, Daud ab, Israel ninyi nirya ab anaboka Yehuda mutuk atei Kiryat-Yearim dam borbinmai. Ara, Imtamnyi co sangkol ara si bitinyi eramnyi. Yuma si ara, “Er Iya Erebdobnyi biryi, ‘Ukubdarur-ukuna mem,’ eamwe uram deirin co sangkol,” eramnyi. Bitinyi si ara, “Er Iya Erebdobnyi utotoa nirya kiknibunyi Er co sangkol,” eramnyi co sangkol borbinmai. 7Binmai ura, bisam asi tabwe biribdongoboka kongkong eryibaraming dinyi si kereta ukuryok kiknibmai dinyi asi, Abinadab ai mutuk kon dam aryi boyanmai. Ura, a co sangkol a kongkong ena deici deibdongobmai. Ura, Abinadab mabwe Uza ab, Ahyo ab, a kongkong ena dina-dina banmarei. 8Ba, Daud ab, sun Israel ninyi nirya ab ara Iya Erebdobnyi urasin dam menekoka mikib asa aryi sunukoka, luboka, merebde banmai. A merebde banmaici, douboka mot sebde banmai keica si ara: kecapi ab, gambus ab, rebana ab, kelentung ab, ceracap ab douboka sebde banmai.

9Banmai ani, ninyi si Kidon dinyi gandum du yalyi kweramnyi mutuk dam binmai. Ura, kongkong ena biribmai bisam lembu obmandanmou. Ba, Uza biryi taruk lakoka Er Iya Erebdobnyi co sangkol taruk talebmou. 10Talebmou ba, Uza bisi Er Iya Erebdobnyi biryi yu wekmou. Ba, Er Iya Erebdobnyi biryi, “Talena mem,” ebdeiamwe. Bok, mangkau teneirdena kumkum talebmou. Ba, ato kuboka dakbisibmou deyok aryi Uza bisi obmou ba, a co sangkol dam a dibmou. 11Ba, Iya Erebdobnyi biryi Uza bisi obmou ba, dibmou ati, Daud biryi Er Imtamnyi bisi kerebmou. Kerebmou deyok aryi a mutuk si ara, “Er Imtamnyi biryi Uza bisi obkabmou,” ena ati, “Peres-Uza,” eboka si doamnyi. A mutuk si ara ukubabyi tuba a si akwe enung. 12A talak ara Daud biryi Er Iya Erebdobnyi bisi ilil kubmou ura, ato ebmou, “Nai e, Kan co sangkol ara una kuboka bobinkwaman do?” ebmou. 13Ato ebmou ura, Daud er atei weik atei bobana ara dina ilil kubmou. Ba, a co sangkol er atei bobana kum kubmou. Eda, Gat yalanyi si Obed-Edom ai bobindoka deibmou. 14Ba, wala winiryi nirya a co sangkol Obed-Edom ai a bindoka deiamnyi. Ani, Er Imtamnyi biryi Obed-Edom mutuknyi ab, sun ai ninyi nirya ab, akai umbura kuramwe dinyi nirya ab kisal dangnamwe.

Currently Selected:

1Tawarikh Uram 13: MTG

Highlight

Copy

Compare