1Tawarikh Uram 12

Daud mutuk Ziklag dam kuramwe asi, er milin nang yandoka milibmai deyok

12:1-22

1Ura, Daud bisi Kish mi Saul biryi obmanto kuramwe ba, Daud bira Ziklag mutuk inirorbinamuryi, kuramwe. Kuramwe asi er mar bormilinkwamnyi nang Daud dam binmai. 2A nang ara ninyi ordana co biribdob nang akwe kuramnyi aryi yin bisik ena ab, keil aryi dona ab ara kwanimtam aryi dona babyi, siriktam aryi mar dona babyi ara co biriamwe nang akwe Daud milin nang kibmai. A nang ara Benyamin yala nang bok, Saul du weit yabwe kuramnyi. 3Ara, sun du yabwe Gibea atei nang Semaa mabwe Abiezer ab Yoas ab, Azmawet mabwe Yeziel ab Pelet ab, Anatot atei nang Berakha ab Yehu ab, 4Gibeon ateinyi Yismaya ab Daud miliramnyi. Yismaya bira Daud miliramnyi nang 30 baryi nang kankan dabub weiknyi kuramuryi, sun menengnanyi kuramwe. Tonda, Gedera atei nang Yeremia ab, Yehaziel ab, Yohanan ab, Yozabad ab, 5Harufi deibdoba Eluzai ab, Yerimot ab, Bealya ab, Semarya ab, Sefaca ab, 6Korah deibdoba Elkana ab, Yisia ab, Azareel ab, Yoezer ab, Yasobam ab, 7ani Gedor ateinyi Yeroham mabwe Yoela ab, Zebaja ab Daud miliramnyi.

8Ani, tonda Gad yala nang ababyi, meici kukoka Daud yini mutuk kuramuryi, ninyi mar ibana ati sasiboka kalingnamwe dam bindoka Daud tam nang kibdobmai. A nang ara ninyi ordana co biriamwe aryi, mar u limdona douboka ordana babyi, te balang douboka ninyi ona babyi co biriamwe. Akiryi a nang ara cungna ol weik nang kuramnyi. A nang aryi ninyi orbana ara yu kam si singa aryi ngururu erande to kuboka, bisam si kijang aryi mutuk kon dam ola cungnande to cukoka ninyi orban nang kuramnyi. 9A nang sun si ara: Yanduanyi Ezer ab, aramnyi Obaja ab, winirinyi Eliab ab, 10dumunyi Mismana ab, amunyi Yeremia ab, 11nabnyi Atai ab, tanyi Eliel ab, 12inyi Yohanan, toubnanyi Elzabad ab, 13takunyi Yeremia ab, koklomnyi Makhbanai ab ukuboka Daud tam nang kibmai. 14A Gad yala nang ara Daud tam yin doun nang olong yuk-yuk menengna nang kibmai. A nang sun mikib dabub ara ninyi tentok mitiktonyi biryi ninyi yubwa 100 baryi nang asi ordana kikiman nang kuramnyi. Ba, ninyi tentok weiknyi bira ninyi yubwa 1.000 baryi nang ab ordana kikiman nang kuramnyi. 15Akiryi a nang aryi yuma wala ara me Yordan onmou bok, kouboka otam kitingbantam kuramnyi ninyi babyi, atam yaletam kuramnyi ninyi babyi asi oboka mutuk arabdobmai.

16Ani, Benyamin yala nang babyi, Yehuda yala nang babyi meici kukoka Daud tam nang kibkwamai ati, Daud kuramwe dam yanganmai. 17Ba, Daud biryi sakoka bisik diryanmou. Ura, Daud biryi a nang asi ato ebmou, “Sun ni dam yanganmarum ara dib ni tam nang kibkwamanurumci, yanganmarum do? Ba, nisi taleboka ni mar ordananyi dam bobinkwamanurumci, tola ati, ‘Nun kan tam nang yanmab,’ eboka, ablangyanmanurum do? Nira malyito dinyi ton kununa kum kunman. Ati, tola ati inina dongmanumunyi ura, nun molonubnyi, Er Iya Erebdobnyi sun kanya dam bikmasir. Tola ati ebmamunyi ura, Imtamnyi biryi sunsi obkwamasir,” ebmou. 18Uca, yin doun nang yubwa 30 baryi nang menengnanyi si Amasai biryi Imtamnyi Kanya Roh er kanya dam wa ibmou ba, ato ebmou.

“Isai mi Daud se! Nunda kan tam nang kibkwankib ati yanmab.

Nunda kan tam nang kibkwankib ati yanmab!

Kan babyi, kan tam nang babyi iya teleb akwe kubkwandum.

Kan milibkwankiranyi bira,

kan molorumnyi, Er Iya Erebdobnyi biryi kansi milibkwankir!” ebmou.

Ura, Daud biryi a nang asi kibdobmou ura, a nang asi yin doun nang olong yuk-yuk menengna nang tikeibnin yibinmou.

19Ura, Daud ab, er yin doun nang ab ara Filistin nang ab antanibmaici, Saul bisi mar bobmai noutam aryi, Manasye yala nang ton meici kukoka Daud tam kimdoryanmai. Uca, Daud ab er yin doun nang ab ara Filistin nang mar dib mar bormilina kum kubmai. Ara, Filistin nang uram sisikoka, “Daud bira dib nun tam kiboka mar bormilina kum kubmasir. Sangkuna Saul tam kibdobdiryi nun mar bobkwansici, miliansir. Ati, Kan kurum atei Ziklag atei dam birum,” ebmai. 20Ura, Daud iniboka Ziklag atei yanganmaici, bisik noutam aryi, Manasye yala nang ton meici kukoka Daud tam kibmai. A nang sun si ara Adnah ab, Yozabad ab, Yediael ab, Mikhael ab, ton yuk Yozabad ab, Elihu ab, Ziletai ab Daud tam kibmai. A nang ara yin doun nang yubwa olong 1.000 baryi menengna nang asi Daud tam kibmai. 21A nang aryi ninyi talyi obde yiban nang asi mar bobkwamnyi ati, Daud milibmai. A milibmai nang nirya ara ninyi mar boboka ordana co biriamwe nang akwe kuramnyi. Akiryi Daud yin doun nang olong yuk-yuk bomenengna nang kibmai. 22Ani, Daud tam yin doun nang ara tumu tabangyanman ani-tumu tabangyanman ani, kimnamnyi uca, Daud tam yin doun nang ilinto kuboka, Imtamnyi yin doun nang yubwa kuraming to kubmou.

Daud tam yin doun nang Hebron mutuk mar bobmai deyok

12:23-40

23Ura, mar ordan keica boboka yin doun nang aryi Hebron atei dam Daud bisi yanmai. Ara, sunci Er Iya Erebdobnyi ebmou to, “Daud bira sienyi Saul unuboka weik sienyi tikeibkwamab,” tenen yanmai. 24Ara, Yehuda yala nang aryi 6.800 baryi yin doun nang mar lisirona co las ab, te balang ab douboka yanmai. 25Ba, Simeon yala nang aryi 7.100 yin doun nang mar ordana iya co biriamnyi nang yanmai. 26Ba, Lewi yala nang aryi 4.600 baryi yin doun nang mar ordana co biriamnyi nang yanmai. 27Tonda, Harun deibdoba menengnanyi Yoyada ab, er ab tonkwa 3.700 baryi yin doun nang ab Daud bisi yanmai. 28Ani, dabub weik kabirnyi si Zadok ab, er ab tonkwa sun ai ninyi kalingna nang 22 baryi nang yanmai. 29Ba, Benyamin yala nang Saul er du weit yabwe aryi 3.000 baryi nang yanmai. Ara, a talak kabul talak aryi sunci tuba-tuba Saul tam nang kuramnyi. 30Ba, Efraim yala nang aryi 22.800 baryi dabub weik yin doun nang mar ordana iya co biriamwe nang yanmai. A nang ara sun ai ninyi kankan si erebdob nang kuramnyi. 31Ura, Manasye yala nang si semeboka wibmaici, meici kukoka, ton nang ninyi yubwa 18.000 baryi nang ara, “Daud bisi sienyi tikeibkwayeb,” eboka yanmai. 32Ba, Isakhar yala nang ara, “Aminda ara telebto dinyi aminda ukubkwande,” tenen bingna bingnamnyi nang kuramnyi. A deyok aryi, Israel ninyi aminda ukubkwamnyi to minob bikamnyi. Akiryi sunci arukmai ba, sien nang yubwa 200 baryi nang wibmai. 33Ba, Zebulon yala nang ara ninyi mar bona co biriamwe nang akwe kanya kankana kum kubmou nang yubwa 50.000 baryi wiboka kiknibmai. A nang ara ninyi on keica yala nirya douboka ninyi ona co biriamwe nang akwe kuramnyi. 34Ba, Naftali yala nang ara ninyi yubwa 30 baryi nang sun menengna nang kibmai ura, mar u liliron keica douboka, te balang doun yin doun nang yubwa ara 37.000 baryi kiknibmai. 35Ba, Dan yala nang ara ninyi mar ordan yin doun nang yubwa 28.600 baryi nang kiknibmai. 36Ba, Asyer yala nang ara ninyi mar bona co biriamwe nang akwe yubwa 40.000 baryi nang wibmai. 37Ba, me Yordan kouboka otam kuramnyi yala nang Ruben yala nang ab, Gad yala nang ab, Manasye yala nang meici kukoka dinatam nang ab ninyi ordan keica yala ilinto kuboka boyanmai. A nang yubwa ara 120.000 baryi nang yanmai.

38Ura, anda yin doun nang nirya antaniboka, “Daud bisi sienyi kiboka, Israel yala nang mutuk nirya talebkwansir,” tenebmaici, anaboka mutuk si Hebron dam binmai. Ani, Israel yala nang ton tam nang ababyi, sun kanya nirya koubtaleboka, “Daud bikwe sienyi kibkwansir,” tenebmai. 39Ba, uki winiryi ara a kunmaici, sun kwit yabwe Israel yala nang ton tam nang aryi, yina toto, me toto kiknirdeirinmai ba, karyi asa aryi Daud ab yibde kunmai. 40Ani, Israel yala nang a mutuk dam kuramnyi atei nang ara Isakhar yala nang ab, Zebulon yala nang ab, Naftali yala nang ab aryi bisam keledai toto, unta toto, bagal toto, lembu toto deici aryi yina boyanmai. Ara, tepung toto, co si ara aryi kiknin kue toto, kue kismis toto, anggur du toto, zaitun yung toto, bisam sapi toto, lembu toto, bisam kambing toto, domba toto, yubwa ilinto boyanmai. A talak ara Israel mutuk sun kilkil weik kubmou deyok aryi ukuboka bulubmai.

Currently Selected:

1Tawarikh Uram 12: MTG

Highlight

Copy

Compare