1Tawarikh Uram 11

Daud Israel sienyi kibmou deyok

11:1-3

(2Sam. 5:1-5)

1Ura, sun Israel ninyi yala sien nang nirya Hebron atei dam Daud bisi yanmaici, ato ebmai, “Nai sienyi, nunda, kan yala nang kunub. 2Saul biryi weik sienyi kiamuryi, taleansou talak ara Daud kanci, Israel yin doun nang a nirya bobde menengdamoumwe. Ba, Er Iya Erebdobnyi biryi kansi ato ebdeiankou, ‘Kanci, Ni mabwe Israel nang sun weik sienyi kiboka kalingkwandim,’ eankou,” ebmai. 3Ura, Israel sien nang nirya Daud bisi Hebron dam yanmai. Ura, Daud ab, Israel sien nang ab Iya Erebdobnyi urasin dam aryi, “Ukubkwansin-ukubkwanurum,” eboka uram sisikmai. Ura, Er Iya Erebdobnyi biryi Samuel deici ebdeibmou to Daud bisi me kisok likeiboka Israel weik sienyi tikeibmai.

Daud Yerusalem atei mar boboka arabdobmouci, kuroramwe deyok

11:4-9

(2Sam. 5:6-10)

4Weik sienyi Daud ab, er miliramnyi Israel nang nirya ab Hebron aryi anaboka Yerusalem dam binmai ura, Yebus yala ninyi, a mutuk yoka nang asi mar bobmai. 5Uca, a mutuk ninyi aryi Daud bisi ato ebmai. “Kanda a mutuk wengyangana kikiman kum,” ebmai. Bok, Daud biryi a sasibdob atei Sion arabdobmou. 6Minob ura Daud biryi er yin doun nang asi ato ebmou, “Unanyi biryi yuma kobdob aryi Yebus ninyi obminyi ura, ni yin doun nang sienyi kibkwan,” ebmou. Ba, Zeruya mi Yoab biryi Yebus atei yuma kobdob ibinmaci ura, yin doun nang sienyi kibmou. 7Ba, Daud biryi sasibdob atei Sion dam kuramwe ba, Kota Daud eboka si dobmou. 8Ani, Daud biryi Yerusalem atei sasiboka Milo#11:8 Daud biryi Yebus nang atei lika doamnyi asi, keil toto tukwe toto tabtabukoka, lika baitam sasirdongobde binamwe ati Milo enung. Ani, lika umbura tam weik atei dobmou. dam tam aryi lika dobde binamwe ani, ai umbura tam kuboka dobde yibinamwe ani, antanabdongobmou. Ba, Yoab biryi akatei nirya asi tamuboka dobmou. 9Ura, Er Iya Erebdobnyi, imtam yin doun nang sienyi biryi er Daud bisi miliramwe. A deyok aryi Daud weik sienyi kiamwe talak ara uki weikto kubde baramuryi, mikib ababyi tabakdongobnin baramwe.

Daud yin doun nang deyok

11:10-47

(2Sam. 23:8-39)

10Ura, Er Iya Erebdobnyi ebmou to Daud er miliramnyi yin doun nang dabub ilinto nang ab, Israel ninyi nirya ab ersi mikib asa aryi amakoka sienyi tikeibmai. 11Daud er miliramnyi yin doun nang dabub ilinto nang obmai nang sun si ara ato. Yasobam mi Hakhmoni bira winiryi dinyi olong yin doun nang sienyi kiamwe. Anyi biryi tentok ordanmai tum aryi ninyi on balang aryi ninyi yubwa 300 baryi lukoka obmou. 12Ba, Ahohi yalanyi Dodo mi si Eleazar bira olong winiryi dinyi nang tamnyi kibmou. 13-14Ura, Eleazar bira Pas-Damim mutuk dam Filistin nang mar obdankwamaici, kikninmai bok asi, Daud bisi milibmou. Pas-Damim mutuk dam ara roti kiknin dinyi si jelai weik wa kuramwe. Ba, Filistin yin doun nang urasintam aryi cungdorbinmaici, a jelai wa noutam sasiboka tikmaici, Filistin nang asi nirya oboka erebdobmou. Ato kuboka Er Iya Erebdobnyi biryi sunsi weik muna kirdongon dinyi karebmou.

15Tonda, yuk tum ara yin doun nang olong winiryi bomenengnamnyi nang winiryi Daud bisi Adulam mutuk keil siling um kuramwe asi binmai. Ba, a talak aryok sun mar ordan nang Filistin nang ababyi Refaim lu yandoka keis ol ai doboka mabmai. 16A tum ara Daud bira mutuk kon ninyi iyangana sasiboka dibde tingni dikum kunmou. Ba, Filistin nang ara Betlehem dam kunmai. 17Ba, Daud er kanya ato wengyanmou ura ato ebmou, “Betlehem dam lika bisik bublan dam me lokya sangkol aryi kweboka ton karebniting ba, yibtinyi se!” ebmou. 18Ba, Israel nang a winiryi yin doun nang sien nang yanmai nang ara Filistin nang keis ol ai Betlehem dam yandoka ai dobmai dam kuboka tingyanmai. Ura, Betlehem atei lika bublan dam me kwena sangkol deiamnya asi me kweboka Daud bisi boyanmai. Bok, a me ara Daud kum yibmou, eda Er Iya Erebdobnyi biti, me dama deiboka dikeibmou. 19Ura, ato ebmou, “Nai Iya Erebdobnyi, a me ni kum yibkun. A me ara, ‘Nun da obsunung,’ tenen dabub deiraming nang ining yibnyob,” ebmou. Ura, Daud a me kum yibmou.

20Ba, Zeruya mi Yoab er weit Abisai bira yin doun nang 30 baryi nang sun sienyi kiamwe. Uki tentok tum ara Abisai biryi ninyi on balang aryi ninyi yubwa 300 baryi lukoka obmou. Ato kuboka obmou deyok aryi 30 baryi nang kankan aryi Abisai bisi si erebdeibmai. 21Ninyi 30 baryi nang kankan aryi Abisai bisi si ererdeiriramnyi. Anyi bisi noutam deiboka sun kisal dangnamnyi bok, olong winiryi nang ara ersi mangkikibman kum tonyinun kuramwe.

22Ba, Kabzeel atei Yoyada mi Benaya bira dabub yin dounanyi yaldangni mi kuramwe ba, erbabyi co biriamwe yin dounanyi kuramwe. Erci Moab atei nang bitinyi mikib weik yin doun nang asi abmou. Ba, uki tentok tum lumtaia sangnamwe tum aryi tukwe um wengyurbindoka yu kam singa asi obmou. 23Ani, tonda minob ton Mesirnyi ninyi ona dabub ilintonyi nun obmou. Ara, Mesirnyi er nong cang ara 2 meter baryi bisibkaboka er taruk aryi ongon aling wiraming co las atoanun te balang doubmou. Ba, Benaya biryi kama akwe aryi ersi iyanmaci ura, anyi on balang asi lebtaleboka er mining balang aryi lukoka oamwe. 24Yoyada mi Benaya biryi ato kuboka obmou. Ba, Benaya er yin doun nang 30 baryi nang kankan aryi ersi si erebdeibmai. 25A 30 baryi yin doun nang kankan dam aryi Benaya bisi erebdobnyi kibdeibmai. Bok, weik yin doun nang sien nang winiryi erebdobto kum kibmou. Ba, Daud biryi Benaya bisi er kalingna nang sienyi tikeibmou.

26Ba, dabub weik yin doun nang ton nang si ara Yoab er weit Asael ab, Betlehem ateinyi Dodo mi Elhanan ab, 27Harod ateinyi si Samot ab, Peloni ateinyi si Heles ab, 28Tekoa ateinyi Ikesh mi Ira ab, Anatot ateinyi Abiezer ab, 29Husa ateinyi si Sibkhai ab, Ahohi ateinyi Ilai ab, 30Netofa ateinyi si Maharai ab, Netofa ateinyi Baana mi si Heled ab, 31Benyamin yalanyi Gibea ateinyi Ribai mi si Itai ab, Piraton ateinyi Benaya ab, 32Gaas mutuk lu ateinyi Hurai ab, Bet-Araba ateinyi si Abiel ab, 33Bahurim ateinyi si Azmawet ab, Saalbon ateinyi si Elyahba ab, 34Gizon ateinyi si Hasyem ab, Harari ateinyi Sage mi si Yonatan ab, 35Harari ateinyi Sakhar mi si Ahiam ab, Ur mi Elifal ab, 36Mekherati ateinyi si Hefer ab, Peloni ateinyi si Ahia ab, 37Karmel ateinyi si Hezro ab, Esbai mi Naarai ab, 38Natan er weit Yoel ab, Hagri mi Mibhar ab, 39Amon mutuknyi Zelek ab, Beerot ateinyi si Naharai ara Zeruya mi Yoab yin dobmounyi ab, 40Yetri ateinyi si Ira ab, Yetri ateinyi si Gareb ab, 41Het yalanyi si Uria ab, Ahlai mi Zabad ab, 42Ruben yalanyi Siza mi Adina ara Ruben yala nang du nang er milibmai nang 30 baryi ab, 43Maakha mi Hanan ab, Mitni ateinyi si Yosafat ab, 44Asytarot ateinyi si Uzia ab, Yeiel mi Syama ab, Aroer atei nang Hotam mabwe ab, 45Simri mi Yediael ab, er weit Yoha ab, er kwit Tizi ateinyi si Simri ab, 46Mahawim ateinyi si Eliel ab, Elnaam mabwe bitinyi si Yeribai ab Yosawya ab, Moab mutuknyi Yitma ab, 47Mezobaya atei nang Eliel ab, Obed ab, Yaasiel ab weik sienyi Daud er dabub weik yin doun nang kuramnyi.

Currently Selected:

1Tawarikh Uram 11: MTG

Highlight

Copy

Compare