1Tawarikh Uram 10
10
Weik sienyi Saul dibmou deyok
10:1-14
(1Sam. 31:1-13)
1A talak ara Filistin nang aryi Israel nang asi mar bobmai. Ura, Filistin nang aryi Israel nang asi mutuk kon si Gilboa dam aryi ninyi mitik kum obmai. Ba, Israel ninyi ton nang ara cukoka bindobmai. 2Uca, Filistin nang aryi Saul ab er mabwe ab asi aminda domyandoka weik sienyi Saul er mabwe Abinadab ab, Malkisua ab ani, Yonatan ab obmai. 3Ani, Saul dam ara ilinto yandoka onmaici, Saul er mar bisik en nang ab ebdandoka ordanmai uca, Saul bisi mar yariboka dilaka weik sakeibmai. 4Uca, Saul biryi er ninyi on ya doubmounyi bisi ato ebmou, “Den bam sengna kum ninyi aryi malyi keica asi oraming to kuboka obningnyei ati, kanci ni mining ya aryi lukeiboknurum,” ebmou. Ucab, a ninyi on ya doubmounyi bira, “Ni nai bisi niryi ona ara ni li,” tenen aryi kum obmou. Ba, Saul a ya lebtaleboka, erdamnyi ikeiboka lumubdandobmou. 5Ba, er ninyi on ya doubmounyi bira Saul ato kubmouci, dibmou asi eibmou ura, erbabyi neik ya urub akwe tubto lumubdandobmou. Ba, Saul ab, anyi ab sun neika dibmarei. 6Akiryi Saul ab, er mabwe winiryi ab a tum aryi obmai ba, dibsekmai. Ani, Saul deibdoba aryi ersi unuboka weik sienyi kibkwandanyi ton kum kubmou. 7Ba, sun Israel nang a mutuk lu otam wekmai nang aryi dinmai uca, “Israel yin doun nang ara cukoka bai bukoka bindobing ba, Saul ab, er mabwe ab asi obing,” tenebmai. Ura, sun kuramnyi atei deibloboka yuk-yuk binsekdobmai. Ato kubmai ba, Filistin nang yandoka akatei arabdobmai.
8Ambutum berekmou ura, Filistin nang Gilboa kon yandoka, Israel yin doun nang a obmai ba, dibmai nang sun bona-bona taklobmai dinyi bumdoryanmai. Yandoka anda bona bumdonmaici, dinmai uca, Saul ab er mabwe winiryi ab ababyi, a oblobmai ba, a dibmai asi asing eibmai. 9Yandoka Saul ya ngang dakmaici, er ninyi on dinyi nirya dalubdobmai. Ura, “Filistin mutuk nirya kwemdeina molon ai babyi, ninyi dam babyi, ‘Israel sienyi Saul obmab,’ ebde yibindarur,” eboka arukmai. 10Ura, Saul douramwe ninyi on dinyi nirya ara kwemdeina molon ai si Asytoret ai deibmai. Ba, Saul er dibmoua kisok ara sun kwemdeina Dagon molon ai abilinga deici laboka bing dakmai.
11Uca, mutuk si Yabesh-Gilead nang kekenmai uca, “Filistin nang aryi Saul ab, er mabwe ab asi ukuboka obmang,” ena kekebmai. 12Ura, “Filistin nang aryi Saul oboka kwemdeina si Dagon ai abilinga deici bing dakmang,” ena kekebmai. Ura, ninyi ordana co biriamwe nang akwe bulunmai ani, barmurunmai ani, bindoka Saul tukwi ab, er mabwe tukwi ab doboka boyanmai. Boyanmai ura, Yabesh dam yandoka weik co deyok dam tukwe aliboka dongobmai. Ura, uki tabaryi si teboka bukmai.
13-14Ara, Saul biryi Er Iya Erebdobnyi uram kekeboka Er ebdeibmou to kum kunubmou. Ura, Er Iya Erebdobnyi bisi, “Una kuboka ukubkwan,” ena kum kubmou, eda ninyi dibdob nang kanya asi naboka, “Una kuboka ukubkwan,” ebmaci ura, Er Iya Erebdobnyi biryi ersi obmou ba, Isai mi Daud bisi weik sienyi kibmou.
Currently Selected:
1Tawarikh Uram 10: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
