Mathi 9
9
1Süsie Jisu rou nu lelie di dzükezhau cie puo thuo puo ra vota.
Jisu Kerünyiemia Puo Chü Keshürhokeshü
(Mark 2:1-12; Luk 5:17-26)
2Sitse mia thezhü geinu kerünyiemia puo toupie vor. Süki Jisu uko kepele ngushü di kerünyieu ki, “A nuo, n dzüzieliecie; n kephoumako vapie n tsüwate ho.” 3Sitse thezhokepethako huoniehuo noupu di sie, “Themia hau Ukepenuopfü ketha die pute!” sita. 4Derei Jisu uko nouleko silie di sie, “Nieko kiüdi nie nou mha kesuo leya ga? 5‘N kephoumako vapie n tsüwate ho,’ idi kepuu rüükuotuo mo, ‘No sielie di chatuoliecie,’ isi di kepuu rüükuotuo ga? 6Derei nieko bu Themia Nuou kijü nu kephoumako valie kevi kekuo ba ükecü silieketuo la zo,” sishü di puo kerünyieu ki, “Sielie di n zhü chü pielie di tuo n kinu voliecie!” 7Sitse themia süu sielie di tuo puo kinu vota. 8Süki themia krodiko süu ngu di michieta, tsiu kekuo sükemhie khapie themianuo tsüshüketa la Ukepenuopfü tsheta.
Jisu Mathi Kiekelie
(Mark 2:13-17; Luk 5:27-32)
9Siro Jisu tuo vozhü ru puo za Mathi ükecü puo khezhanuo kekhruo ki nu ba di ngulie; sitse puo sie puo ki, “A siemedziliecie,” siru puo sielie di puo siemedzita.
10Süsie puo mhacütuo üdi le kinu balie#9:10 Gk Vakhriepfü. tse, khezhanuo kekhruomia mu kephoumamia kekra vor Jisu mu puoe pethakelieko ze balie. 11Siro Farisiko hau ngushü di sie puoe pethakelieko ki, “Kiüdi nieko kepethau khezhanuo kekhruoko mu kephoumako ze mhacüya mu?” sita. 12Derei puo süu sikeshü ki sie, “Keshürhomia darukesimia se morei vi, derei kechümia thuo zo. 13Nieko vo di ‘Ae ruosuou monyü ngukemezhie a neiya’ isi pie ketuo dieu ca siliecie. Kekreilamonyü a miathoko monyü kephoumako kietuoü vor zokecü la.”
Mevokecü Dze Ketsokecü
(Mark 2:18-22; Luk 5:33-39)
14Sitse Johan siedziko puo ki vor di sie, “Hieko mu Farisiko tsiemelie mevoya, sirei kiüdi noe pethakelieko mevoya mo ga?” 15Sitse Jisu sie, “Nuyie he nu yasau uko ze keba chie puo khriethoko thenousuo balie vi me? Derei uko kinu yasau zetaketuo teisozhako vortuo, süsie uko mevotuo. 16Siro miapuorei pfhe rütatakemo pie vo pfhekra pekhuoya mo; kekreilamonyü pie vo pekhuoshü ro u pfheyo pfhe luu shürhapfütataya, mu rürha kechütayacü la. 17Siro miapuorei khubezu kerünyie üse chüzhüsü kewe nu shüya mo; sishü ümharo chüzhüsü pfü phawatuo, sidi khubezu bu krutatuo, mu chüzhüsü rei suotatuo; derei mia khubezu kerünyie pie chüzhüsü kesa nu shüya; sitse kenienie rei krulieya,” sita.
Pehümia Puo Nuopfü mu Jisu Pfhephrie Biekeliepfü
(Mark 5:21-43; Luk 8:40-56)
18Siro puo uko ki die hako pu ketha nu, sinagog nu krütamia puoe puo ki vor di tsu puo mhodzünu khoutoupfülie di, “A nuopfü tsieki nu siate; derei no vor n dzie yhapie puo gei shücie, siro puo rheilietuo,” si. 19Süla Jisu sielie di tuo puo siemedzi vota, mu puoe pethakelieko rei puo ze vo. 20Siro süki cie kerekenie thezie kru di kemezhie tuoketamiapfü puoe Jisu sietsa vor di puo pfhephrie bie, 21kekreilamonyü süpfü puo thuo puo nou nu, “A puo pfhe bielie zorei shürholietuo,” isi tuo. 22Süki Jisu reipra süpfü ngulie di puo ki, “A nuopfü, n dzüzieliecie! N kepele thuo n chü keshürhoshüwate ho.” Siru thenupfü shürho mhalieta. 23Siro Jisu tuo vor krütau ki tsokelie ki luoü kekhouko mu krodiu bouübi keba ngushü tse, 24puoe sie, “Nieko tuo rüdeitacie; unuopfü siata mo derei zekezhü zo.” Sitse uko puo krenyüta. 25Derei themiako bu kitie prata tse, puo le puo dzie teshüshü ru rüüpfü sierlieta. 26Sitse thedze hau kijü sütsatie thechü pete nu pu keza vota.
Jisu Mhiciemia Kenie Chü Pevikeshü
27Süsie Jisu thechü sünunu tuo vozhü tse, mhiciemia kenie puo siemedzi vor shiekhoui di sie, “David nuou, no hienie ngumezhieshücie!” sita. 28Siro puo tuo kinu le tse, mhicienie puo ki vor, süla Jisu sie unie ki, “A hau chülie vi ükecü nnie peleya me?” Sitse unie sie puo ki, “Uwe, Niepuu.” 29Siru Jisu unie mhi bie di sie, “Nnie gei nnie kepele kemhie chüliecie.” 30Sitse unie mhi mha ngu parta. Ru Jisu unie kha bei di sie, “Mia puo bu rei hau si hiecie,” ishü. 31Derei unie pra di kijü sütsatie thechü pete nu puo dze puwata.
Jisu Keliehuomia Puo Chü Pevikeshü
32Siro uko tuotazhü tse mia terhuokesuo bu puo ze tuoketa keliehuo puo ze puo ki vor. 33Siro terhuokesuou whuowa tse keliehuou die pu lalieta; süla themia kroko u ngo di sie, “Thiedzü mhakipuorei Israel nu hakemhie ngu chie mo,” si. 34Derei Farisiko sie, “Puo terhuokesuoko kediu ze di terhuokesuo whuoketuo zo,” sita.
Jisu Themia Ngumezhieketa
35Süsie Jisue nadiko mu socüsonuo peteko nu vo, sidi uko sinagogko nu le mia petha, mu kedi dieliekeviu pu mia kie, tsiu kechükenyü mu kesuokemezie neiüko chü keshürhoshü. 36Siro puo themia krodiko ngu tse, puo süko ngumezhie phita, kekreilamonyü sükoe tekuo u kepfhe kejü tuoi kemezhie mu cüre tuoketa la. 37Süla puo sie puoe pethakelieko ki, “Lieyie kra phizhü, derei mhathomia we tsa, 38süla lieyie Niepuu bu mhathomia ketsepie puo lie nu shülieketuo la chaliecie,” sishü.
Currently Selected:
Mathi 9: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
