Mathi 8
8
Jisu Mpa Kechümia Puo Chü Pevikeshü
(Mark 1:40-45; Luk 5:12-16)
1Siro Jisu kijüthou geinu kerlie tse mia krodi puo siemedzi tuota, 2süki mpa kechümia puo puo ki vor puo mhodzünu khoutoulie di sie, “Niepuu, no n medo ro, a chü kemesashülie vi zo.” 3Sitse puo puo dzie yhapie themia süu bie di sie, “A medowe, no mesaliecie.” Mu sishü tse puo gei mpa kechüu vilieta. 4Sitse Jisu puo ki, “Harie, no mia puo ki rei pu hiecie, derei mezhü zievo-u ki vo di puo bu n mehowacie; sidi mia bu no vilieketa silieketuo la Mosae chünukeshü ruosuou khashüwacie.”
Jisu Kriemhokezhau Kituou Chü Keshürhokeshü
(Luk 7:1-10)
5Süsie Jisu Kapernaum nu vorlie tse, kriemhokezhamia puo vor puo mezhiemelo di, 6“Niepuu, a kituou rünyie di kemezhie se di kinu zhüya zolie.” 7Sitse Jisu puo ki, “A vor puo chü keshürhoshütuo.” 8Siru kriemhokezhau la sie, “Niepuu a n bu a ki khrükhro ler sü mo, derei no dieca puo pushü zorei, a kituou shürholietuo. 9Kekreilamonyü a rei kezhamia khrükhro tuokezhamia zo; a khro rei chüpahimia ba. Siro a mia puo ki, ‘No tuo vocie,’ isi ro puo voya; mu kekreimia puo bu ‘Vorcie,’ isi ro, puorei vorya; mu a kituou ki, ‘No mha hau chüshücie,’ isi ro, puo süu chüshüya.” 10Sitse Jisu die hau sikeshü ki puo ngota di puo siemedziketuoko ki, “A nieko ki pu toushütuo, a Israelmia donu themia hau kepele decü mhakipuorei ngulie mo. 11A nieko ki pushütuo, niathutsa mu niakratsa nu themia kekra vor teigei kedi nu Abraham mu Isak tsiu Jakob ze hietuo, 12derei kedinuonuoko we kelhoupie chazou kezei nu shüwatuo, sünu kra mu u hu thegeipie batuo.” 13Sidi Jisu sie kriemhokezhau ki, “Tuo volie, mu n kepele kemhie chüpie n tsükelieu chücie.” Sitse bavüdo süu nu kituou shürholieta.
Jisu Themia Kekra Chü Keshürhokeshü
(Mark 1:29-34; Luk 4:38-41)
14Süsie Jisu tuo Pitor kinu le ru, Pitor kimianuo zuo rukizhü di ngulie. 15Sitse puoe puo dzie bieshü ru puo ruki mota, di sie mha kesepie puo tsü bata. 16Siro sünhie thevatie mia terhuokesuoko bu u kebi ze tuoketa kekra ze Jisu ki vor, sitse puo die pushü di ruopfü süko whuowa, mu kechümiako pete chü keshürhoshü. 17Siro mha hau chükeshü geinu thiedzü siedzekesiu Isaya pukeshü, “Puo u kesuo kemezieko mu kechükenyüko toupfüliete,” isikeshüu chü tseilie.
Pethakelie Kethomia Zasi
(Luk 9:57-62)
18Süsie Jisue themia krodi vor puo houpfü ketha ngulie tse, dzükezha khie kekreitsa volienu di puo diekhashü. 19Sitse thezhokepethamia puo vor di sie, “Kepethau, no kehourapuo vo rei a n siemedzituo.” 20Siru Jisu sie puo ki, “Meseruko u ki nyi mu teirako rei u kru nyi, derei Themia Nuou we puo tsü se kezhü chü rei jü,” sita. 21Siro pethakelie kekreimia puo rei, “Niepuu a bu vo a puo khruwa periecie,” isi. 22Derei Jisu sie, “A siemedzilie, mu kesiako bu kesiako khruwacie,” sita.
Jisu Teikhrie Kechü Zeikewa
(Mark 4:35-41; Luk 8:22-25)
23Siro Jisu rou nu le balie tse, puoe pethakelieko puo siemedzita. 24Sitse khriedi puo dzükezhau nu sierta, di rouu bu rületatuoüta, derei Jisu we zezhü zo. 25Süla pethakelieko vo puo kesou di sie, “Niepuu, hieko kelashücie! Hieko katatuoüzhie!” 26Sitse puo uko ki, “Harie nie kepele ketsako nieko kiüdi michieya ga?” Sidi puo sielie di teikhrie mu dzükezha kechüshü; sitse la zeita. 27Süla uko ngo di sie, “Hau themia kikecüpuota mu? Teikhrie mu dzükezha thuo rei puo die zeketa ha!” sita.
Jisue Mia Kenie geinu Terhuokesuo Whuokewa
(Mark 5:1-20; Luk 8:26-39)
28Süsie puo dzükezha khie kekreitsa Gadara#8:28 Leshü kewe kevi huo nu Gergesenes! kekrei huo, Gerasenes. kijü nu vorlie tse, terhuokesuo bu u kebi ze ketuo kenie mekhru nunu par puo ze keselie. Hanie u zho suo kemerie chü di miapuorei bu cha sütsa volieya mo. 29Süki unie shiekhoui di, “No Kepenuopfü Nuou, hienie pie kedipuo chütieya ga? No puoteiu tso kemonu hienie pechütuoü hanu vorya me?” sita. 30Süki thevo krodi puo uko ze kepeciekecü nu mha nge cütuo, 31sitse terhuokesuoko puo ki cha di, “No hie whuowatuo üliro, hie ketsepie thevo kro-u nu shücie.” 32Sitse Jisu sie uko ki, “Votalie,” ru süko ta thevoko gei leta; siro thevo kro-u ta tsiekhie geinu rüsou dzükezha nu tsu di sia phreta. 33Süki thevo kepfheko ta rünau nu vo terhuokesuo bu u kebi ze ketuonie gei kedipuo chüte shikecü dze pete pie mia ki pushü. 34Süla rünau pete Jisu ze kesetuoü par; mu uko puo ngulie tse, Puo bu uko kijü therhietanu di chata.
Currently Selected:
Mathi 8: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
