Mathi 10
10
Apostel Kerekenieko
(Mark 3:13-19; Luk 6:12-16)
1Süsie Jisue puo thuo pethakelie kerekenieko kie kengulie di uko bu mesa kemo ruopfüko whuolieketuo, mu kechükenyü tsiu kesuokemezie neiüko chü keshürholieketuo kekuo khapie uko tsüshü. 2Siro apostel kerekenieko za hako: kerieu, Pitor ükezha Simon mu puo siezeu Andria, Zebedi nuo Jakob mu puo siezeu Johan, 3Filip mu Bartholoma; Thoma mu khezhanuo khruoyakezhau Mathi; Alfia nuou Jakob siro Thadia#10:3 Leshü kewe huo nu ro Lebbaeus, morei Thaddaeus üyakecü Lebbaeus.; 4Kananmia Simon, mu Jisu tekeshü Judas Iskariot rei sa.
Kerekenieko Ketsekeshü
(Mark 6:7-13; Luk 9:1-6)
5Jisu mia kerekenie hako tarhoshü di uko ketse di sie, “Nieko Judakemoko kijü morei Samariamia rüna puo nu rei vo hie, 6derei Israel seyiemia jüketa tekuoko ki vocie. 7Nieko vokecü ki, ‘Teigei kedi vor penuoteitewe,#10:7 Moro u dzieki bate.’ idi dieliekeviu pushüliecie. 8Kechümia chü keshürhoshülie, kesiamia chü perheishülie, mpa kechümia chü kemeneshülie, mu terhuokesuoko whuowalie. Nie methuo ngulie zeru, methuo zashücie. 9Nieko priesabou nu suna, rakachü morei mese pie kechü priesa puorei pfü hie, 10nie rüve likhuo, morei boulie kenie morei phikou morei kethe puorei se hie. Kekreilamonyü mhachüyakezhau puo va ngu cü zhükecü la. 11Nieko tuo rüna kecü morei kezha kehoupuo nu le rei supuonie sünu puotou ba shikecü pfhüliecie, sidi nie tuo lata kemochie ki sünu balie. 12Nieko tuo ki puo nu lekelie ki süu kelushülie. 13Mhanuü ki süu puotou ro nie jakeshüu bu sünu balie, derei ngulie sü mo üro nie theja bu nie gei la vortaliecie. 14Mu kehoupuorei nie zelie mo, morei nie die rei rünyü moro, ki sünu morei rüna sünunu tuotaketuo ki nie phi gei nyophe rei kepfhüshüwalie. 15A nieko ki pu toushütuo, mia ketsoketuo zhanhie rüna süu ki rei Sodom mu Gomora rünanie rüli we hielie rüükuotuo.
Kepechü Vorketuoko
(Mark 13:9-13; Luk 21:12-17)
16“Harie, tekuo socie donu kevo tuoi a nie ketseshüzhü ho; süla nie do vipie tinyhü tuoilie mu nie zho menepie mekhru tuoilie. 17Themia süko gei we nieko kireilie; kekreilamonyü uko nie tepie khenu kehouko nu shütuo, mu uko sinagogko nunu nie vütuo. 18A za la mia bu nie teze ahngko mu kediko mhodzünu rei votuo, sügeisünu nieko bu süko mu Judakemoko ki zhapu chülietuo. 19Mia nie tekeshü ki kikidi mha puta morei kedipuo puta, ikecü le nieko nou kemezhie hie, süteiki nie bu kedipuo putie shikecü khapie nieko tsü zotuokecü la, 20kekreilamonyü nie thuo mha pu lho, derei nieko Puou Ruopfüu thuo nie nou nu pushü zotuokecü la. 21Siro siezedzürie thuo siezedzürie tepie mia bu dukhrituo, tsiu miapuonuoko rei unuonuo gei sükemhie chütuo, mu unuonuo thuo ukrü ngumvü sie di kedukhrituo. 22Themia pete rei a za la nieko ngumecütuo. Derei kehoupuorei hiepfü zo tha thela tsokelieu kelalietuo. 23Siro rüna puo nu mia nie pechüketa ki, ta rüna kekrei puo nu votaliecie. A nieko ki pu toushütuo, Themia Nuou kevor mhodzü nieko Israel rünako nu vo ketso phrelie lho.
24“Kepethau ki pethakelieu zha mo; morei niepuu ki puo kituomia zha mo, 25süla pethakelieu puo kepethau mhielie mu kituomia puo niepumia mhiekelie sie vi zo. Mia ki niepuu thuo rei üse Belzebul üdi kieya liro, puo kikruko zo we süu ki rei pesekuotuo.
Supuo Prei Zhü Shikecü
(Luk 12:2-7)
26“Süla nieko süko prei hiecie, kekreilamonyü mhapuorei se mia pesipengulie lhoü whepie keba jü; tsiu mia bu si motuo üdi keviepie kezhü rei jü zo. 27A kezei nunu nie ki pukeshüko, kezie nunu pushülie; mu nie noupukeshüko ki tsüleko geinu shieshülie. 28Siro themo-u dukhriwa, derei ruopfüu dukhriwalie kenjükecüko prei hiecie; sirei Gehena nunu themo-u mu ruopfüu rei pekawalie keviu preikuoliecie. 29Ciekhrienuo kenie pie priesa puo nu zeya mo me? Sirei nie Puou medo zo kemosie süko puorei te kijü tsutalie lho. 30Nie la we nie tsütha pete rei phrü phreliete. 31Süla michie hiecie; nieko ciekhrie kekra ki rei puoma rekuo eru!
Khrista Phra mu Kemo
(Luk 12:8-9)
32“Süla themia kehoupuorei mia kenguki a phra liro, a rei teigei a Puou mhodzünu puo za pie putuo. 33Derei kehoupuorei themia mhodzünu a phra mvü ro, a rei teigei a Puou mhodzünu puo phra mvütatuo.
Kezekevi mo Derei Zhiecha
(Luk 12:51-53; 14:26-27)
34“A kijü gei kezekevi khashütuoü vor ücü le hiecie; a kezekeviu monyü zhiecha khashütuo üdi vor zo.
35“Kekreilamonyü puo nuou bu puo puo ngumvü,
puo nuopfü bu puo zuo ngumvü,
tsiu puo miepfü bu puo niapfü ngumvüketuo la kevor zo;
36Siro mia puoe puo kikru thuo puo ngumvümia chütatuo.
37Kehoupuorei a ki puo puo morei puo zuo khriekuota liro, puo a themia chülie sü mo; mu kehoupuorei a ki puo nuou morei puo nuopfü khriekuoya liro, puo a themia chülie sü mo. 38Mu kehoupuorei puo thuo puo krus pie di a siemedzi moro a themia chü sü mo. 39Siro kehoupuorei puo phou pekrukelieu süu pejüwatuo; derei kehoupuorei a la puo phou pejükeshüu süu ngu lalietuo.
Zhakhrako
(Mark 9:41)
40“Kehoupuorei nieko zelieyakezhau a zelieya; mu kehoupuorei a zelieyakezhau a ketsekeshüu rei zelieya. 41Kehoupuorei siedzekesimia puo za nunu siedzekesimia puo zelieyakezhau siedzekesimia zhakhra ngulietuo; mu themia kehoupuorei kemiathomia za nunu kemiathomia puo zelie ro kemiathomia zhakhra ngulietuo. 42Siro kehoupuorei pethakeliemia za nunu dzüku hie puo rei pie kecütho hako yopuo zorei dieshü ro: a nieko ki pu toushütuo, süko puorei u zhakhra jütalie lho zo.”
Currently Selected:
Mathi 10: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
