Mathi 7
7
Mia Le Pejokecü
(Luk 6:37-38,41-42)
1“Mia kejo pfhü hie, siliro mia rei nie pejo molietuo. 2Kekreilamonyü nie mia pejo ro sümhie nie pejoketuo la, tsiu nie mia gei chükeshü tuoi mia rei nie gei chü lashü zotuokecü la. 3Kiüdi n thuo n mhi nu seipe kebau le mo di n siezeu#7:3 Gk Siezedzürie. mhi nu puochuyo mehoya ga? 4Morei n mhi nu seipe kebau biewa mo di n siezeu ki, ‘A bu n mhi nu puochuyo kawacie’ iya ga? 5No ketherakezhau, n thuo n mhi nu seipeu chüwa periecie, silie liro n siezeu mhi nu puochuyo ngu meyiemeluo di kawatuo.
6“Mha mesakecüu khapie tefü tsü hiecie mu cümenyie puoma kerepfü kelhoupie thevo mhodzünu shü hie, süko u phi khronu kedewa mu rei par di nie mekhawa rei silie lhomu.
Cha, Pfhü mu Ketoukecü
(Luk 11:9-13)
7“Chacie, siro khapie nie tsütuo; pfhüya zocie, siro nie ngulietuo; ketouya zocie, siro khrüshü nie tsütuo. 8Kekreilamonyü kehoupuorei chayakezhamia ngulieya, mu kehoupuorei pfhüyakezhamia ngulieya, tsiu kikha khrüpie ketouyakezhamia tsüya. 9Siro nie donu supuonie puo nuoe niekhrüda cha ro, ketsie pie puo tsüya ga? 10Morei puo khuo cha ro tinyhü chüpie puo tsüya ga? 11Nieko themia kesuomia zorei mha kevi pie nie nuonuo ketsü do siya ro teigei keba nie Puoue mha kevi pie mia puo ki chayakezhako tsü sa phi motuo me?
12“Süla mia nie gei kedipuo chüshü ro nie nei shiü nie rei mia gei sükemhie chüliecie; kekreilamonyü thezho-u mu siedzekesiko sü hauha zocü la.
Kharu Kemereu
(Luk 13:24)
13“Nieko kharu kemereu ze lelie; kekreilamonyü keka nu voyakezha kharuu meya mu cha süu rüü, tsiu themia kekra süu ze voya. 14Derei kerhei nu kevo kharuu mere tsiu sünu voketuo chau re, mu mia huoyo rübei süu ngulieyakezha zo.
Seibo mu Puosi
(Luk 6:43-44)
15“Ketijü siedzekesiko la nie kireiliecie, süko tekuo pfhenei se di nie ki vorzhie, derei uko nou we mha tekecü socie kro puo zo. 16Nieko uko si geinu uko silietuo. Zohubo geinu khubesi rielie, morei kikhahubo geinu chiedesi rielieya me? 17Sütuoi sei kevi kheko puo si kevi vülieya, derei sei kesuo khe puo si kesuo vütaya. 18Seibo kevi puorei puosi kesuo vütalie kenjü, mu sei kesuo puorei puosi kevi vülie kenjü. 19Seibo kehoupuorei puosi kevi vülieyakemo-u wiwa di kelhoupie mi nu shüwaya. 20Sükemhie uko si geinu nie uko silietuo.
A Mhakipuorei Nie Si Mowe
(Luk 13:25-27)
21“A üse, ‘Niepuu, Niepuu’ idi kieyakezha pete teigei kedi nu le phrelie lho, derei teigei keba a Puou medoko chüyakezhamia zotuo. 22Teisozha sünhie mia kekra a ki, ‘Niepuu, Niepuu hie n za se siedzedie pu mo me? Mu hie n za se terhuokesuoko whuo mo me? Mu hie n za se kekuo kezha chü phi mo me?’ isi sietuo. 23Sitse a uko ki, ‘A mhakipuorei nie si mowe; nieko mha kesuo kechüko, tuo a therhietacie’, sitatuo.”
Kerünyü mu Chüüzekelie
(Luk 6:47-49)
24“Süla kehoupuorei a die hako rünyülie di süko chüüzeyakezhamia sü mhakesikelemia puoe tsiekrie geinu puo ki chükelieu mhie zo. 25Süsie teirü tsur, dzü di sier, mu tei rei rükhrie vor ki süu va, derei puo vatsholie mota, kekreilamonyü ki süu tsiekrie geinu puo mvüdzekelie la. 26Derei kehoupuorei a die hako rünyülie di süko chüüzeya kemomia sü mhalekemomia puo huocanyo geinu puo ki chükelieu mhie zo. 27Teirü tsur, mu dzü di sier, tsiu tei rei rükhrie vor ki süu va; sidi süu vatshopie kerhepha zopie zhüwata.”
28Siro Jisu süko pu theshü tse themia krokoe puo kepetha die la u ngota, 29kekreilamonyü puo uko donu thezhokepethamia mhie monyü u kekuo kenyimia mhie uko pethatakecü la.
Currently Selected:
Mathi 7: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
