Mathi 27
27
Jisu Ze Pilat Mhodzünu Kevo
(Mark 15:1; Luk 23:1-2; Joh 18:28-32)
1Siro teisolie tse zievokezhako mu phichüko pete Jisu ngumvü di puo dukhriwaketuo doko rhüta. 2Sidi uko puo phalie di puo ze vo ahng Pilat dzie nu shüwata.
Judas Se
(Mhak 1:18-19)
3Siro Judas, puo tekeshüu, mia Jisu pejowaketa ngu di puo nou rüdita sidi raka serko toupie zievokezhako mu phichüko ki la vor. 4Sidi sie, “Kejo kejümia puo zie ma pielieketa ha a phoumawate!” sita. Derei uko sie, “Süu hieko la kedipuo mu! N thuo leliecie.” 5Sitse puo rakako kelhoupie rüsuoki nu shüwa, sidi tuota; sidi puo thuo vo kerüchakhriwa. 6Siro zievokezhako rakako chülie di sie, “Hako thezie ma zokecü la khapie kinyibouu nu shüketuo puotou mote.” 7Sidi uko kerüchü di süko pie litho-u kijü khrülie di sünunu chazoumia kekhru chü chüwa. 8Süla thie ketso rei lie süu üse Thezie Lieu ütuota. 9Sidi thiedzü siedzekesiu Jeremia#27:9 Leshü kewe huo nu ro Zekaria morei Isaya. pukeshü, “Israelmiako mia puoma mejükeshü tuoi, 10sidi Niepuu pukeshü tuoi, uko raka serko se vo litho-u lie khrülie,” ikeshüu chü tseilie.
Pilat Jisu Ketsokecü
(Mark 15:2-5; Luk 23:3-5; Joh 18:33-38)
11Siro Jisu ze vo ahng mhodzünu thalie tse, süu puo ki, “No Judako kediu me?” Sitse Jisu sie “No pushüwata zo,” si. 12Derei puo zievokezhako mu phichüko puo kepejotsa la mhapuorei pu mo. 13Sitse Pilat sie, “Mia mha hathede se n pejo ketha no si mo me?” 14Derei puo dieca puorei pu süu kelashü mota, süla ahng bu puo ngo seta.
Jisu Dukhriwanukeshü
(Mark 15:6-15; Luk 23:13-15; Joh 18:39—19:16)
15Siro thenyi süu nu ahng bu mechüue kediemia puo chaketau khakeshü zho puo nyiya. 16Süki Barabas ükecü kediemia mechü si puo ba. 17Süla uko vo kengulie tse, Pilat sie uko ki, “A bu supuo khashü nieko tsü nyüya ga? Barabas tuo mo, Khrista ükezha Jisu tuo ga?” 18Kekreilamonyü uko puo ngu u rokecü la puo khapie sünu shü zokecü puo si keba la. 19Siro puo dienya bau gei keba ki, puo kimia dielie ketsepie puo ki shü di, “No themia kemezhü hau gei mhapuorei chü hiecie, kekreilamonyü a puo pema di thie kemezhie phi baketa la,” si. 20Siro zievokezhako mu phichüko themia krodiu ketshüpie uko bu Barabas chalie mu Jisu dukhriwanushü. 21Derei ahng sie uko ki, “A bu hanie kiu khashü nieko ketsü nie medo ga?” si lashü. Sitse uko sie, “Barabas tuo.” 22Sitse Pilat sie, uko ki, “Siüro a bu Khrista üyakezha Jisu pie kedipuo chü ta?” Sitse uko pete sie, “Puo gouwalie!” ita. 23Siro Pilat la sie, “Puo mha kesuo kikecüpuo chüwata di ga?” Derei uko shie u rhiechükuo di sie, “Puo gouwalie!” ita.
24Siro Pilat mhapuorei chü salie kenjüketa ngulie, tsiu mha kebvü kra miemie sierketa la krodiu mhodzü nunu dzü pie puo dzie metei di sie, “A themia hau zie tsatie#27:24 Leshü kewe huo nu ro kemiatho hau zie, morei themia kemiatho hau zie. la we jo mo zo ho; hau nie thuo leliecie.” 25Sitse themia peteko puo die kela di sie, “Puo zie bu hie gei mu hie nuonuoko gei rei pfürtacie!” sita. 26Süla puo Barabas khapie uko tsüwa; mu Jisu vüwa di gouwaketuo la khashü uko tsüwa.
Chüpahiko Jisu pie Kethekrekecü
(Mark 15:16-20; Joh 19:2-3)
27Sitse ahng chüpahikoe Jisu ze mechübouu nu leta, sidi uko kro-u pete vor puo houpfülie. 28Sidi uko puo pfheneiu lhewa di puo bu pfhenei kemerie puo selie, 29siro zohu kechiepie tsüre chülie di süu pie puotsü gei shü. Siro uko tekhriethe pie puo dzie puo zatsa shü, sidi puo mhodzünu khoutoutsu, puo kre di sie, “Judako kediu bu keviu chüliecie!” sita. 30Siro uko puo mho mhitsie, tsiu tekhriethe pie puo tsü vü. 31Sidi uko puo pie kethekre lotsowa tse pfheu lhewa di puo pfheneiu pie puo whe lashü. Süsie uko puo gouwatuo üdi puo ze tuota.
Jisu pie Goukewa
(Mark 15:21-32; Luk 23:26-43; Joh 19:17-27)
32Sidi uko tuo prazhü tse, Kurinmia puo puo za Simon ükecü puo ngulie, sitse uko puo kemvü chüpie puo bu krus-u pielie. 33Süsie uko Golgatha (puoca mia Tsütsoru) ükecü thechü puo nu vorlie, 34siro uko puo bu krienu di mha kepfhü sa pie zu reilie di pie puo tsü; derei puo süu methakeshü sie krie mvüta. 35Siro uko krus geinu puo gouwa di dape di puo pfheneiko kezalieta; 36süsie uko süki ba di puo pfhe bata. 37Siro uko puo tsü ki puo kepejo die puo thu sakeshü, “Hauha Judako kediu Jisu,” isi. 38Siro mia vie sekecümia kenie, mia puoe puo vitsa mu mia puo puo zatsa idi gou. 39Siro süu ciekevoko tsüge puo kenga#27:39 Moro mele., 40di sie, “No rüsuokiu bierhuowa di zha se donu chü lashüketuou, n thuo n kelaliecie; no Ukepenuopfü Nuou üro, krus geinu kerlie!” ita. 41Sükemhie zievokezhako mu thezhokepethako, tsiu phichüko rei puo pie kethekre di sie, 42“Puo kekreimia we kelalie, derei puo thuo puo kelalie kenjüte ha! Puo Israelko kediu mo üme? Puo bu krus geinu kerlie ro, hie rei puo pelelietuo. 43Puoe Ukepenuopfü pele vor; süla tsie Ukepenuopfü bu puo kelaliecie; puo medotuo üro, kekreilamonyü puoe sie, ‘A Kepenuopfü Nuou,’ iya.” 44Siro puo sa goukewa mia vie sekecünie rei süsütuoi puo kenga.
Jisu Se
(Mark 15:33-41; Luk 23:44-49; Joh 19:28-30)
45Siro sünhiesü khinhieluo keba kerekenie nunu vo thehesie keba se ketso kijü pete zeiboui bata. 46Siro bavüdo seu meseki Jisu shiekhoui di, “Eloi, Eloi, lama sabakthani?” sita, süu ca, “A Kepenuopfü, a Kepenuopfü no kiüdi a khawata ga?” 47Sitse süki ketha huomia süu si di sie, “Puo Elija kiezhie!” 48Sitse uko mia puo ta mha vo sponj puo nu kekhrodzü petselie, di süu pie tekhrie puo gei shülie di puo bu krienu pie puo tsü. 49Derei kekreiko sie, “Hieluo, Elija vor di puo kelashütuo mo lhe shiü meho ba khe,” sita. 50Sirei Jisu melie shiekhoui lashü di puo ruopfü khashüwa. 51Süsie rüsuoki nu pfhe lhapiekezhau puo tsügei nu rürha tsu puo thotsü tso di rürha kenie chüta. Tsiu kiükishüta mu ketsie rei prokrakrata. 52Siro mekhruko cie parta; mu siakezhü kemesako mo kekra rheilasieta. 53Siro puo rheilasieketa sie süko mekhru nunu par di tuose kemesa nadi nu le di mia kekra bu uko ngu. 54Siro süki kriemhokezhau mu puo ze Jisu pfhe ketha chüpahiko kiükishüketa mu mhachüketako pete ngu di michie phita, di sie, “Hau Ukepenuopfü Nuou ketho zo!” sita. 55Siro sükisü Galil nunu Jisu siemedzi di puo khruohi tuoketa thenumia kekra rei kepecie nu mha süko meho tha. 56Süko donu Magdalapfü Maria, Jakob mu Josef unie zuo Maria mu Zebedi nuonie zuopfü rei sa tha.
Jisu pie Khrukewa
(Mark 15:42-47; Luk 23:50-56; Joh 19:38-42)
57Thevatieta tse Arimathia nunu kevor puo za Josef ükecü kenyimia puo vor, puo rei Jisue pethalieketamia puo. 58Puo Pilat ki vo di Jisu mo-u cha; sitse Pilat mia bu themo-u pie puo tsünushü. 59Süsie Josef themo-u pielie di linen pfhe kemesa puo pie süu kezülie. 60Sidi puoe süu pie puo thuo puo mekhru kesa puo ketsie ho di chüpie kezhüu nu shüwa. Sidi puo ketsie kezha puo ketoupie mekhru süu kikha nu mekawa di tuota. 61Siro Magdalapfü Maria, mu Maria kekreipfü rei vo mekhru süu mhodzütsa ba.
Rükhoumia bu Mekhru Pfhe Keba
62Siro süsienhie, puoca Mhakesekezhau sienhie zievokezhako mu Farisiko keze vo Pilat ze kese, 63di sie, “Kezhau, mha setuoyakezha hau puo kerhei ki pukecü ‘A zha se sie rheilasielietuo,’ icü dieu hie rükraliete. 64Süla, zha se ketso puo mekhruu pfhe menuo balieketuo la, no die khashüwacie, sidi puoe pethakelieko bu themo-u rügupieta di themiako ki, ‘Puo kesia nunu rheilasiete,’ ita molieketuo la, moro kemeda thela hau therieu ki rei suokuotatie ru.” 65Sitse Pilat uko ki, “Nieko thuo rükhoumia khapie bawalie di pfhe menuolie kevi chie pfhe menuoliecie,” sita. 66Süla uko vo di ketsieu gei zasi vüwa mu rükhoumia khapie mekhruu pfhe bata.
Currently Selected:
Mathi 27: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
