Mathi 26
26
Jisu gei Ngumvü do Rhükecü
(Mark 14:1-2; Luk 22:1-2; Joh 11:45-53)
1Siro Jisu mha hako pete pie mia pethashükewa sie, puoe sie pethakelieko ki, 2“Zha kenie sie Ciekevonyi nyitaketuo nieko rei si ba, mu mia bu puo gouwaketuo la Themia Nuou tepie mia dzie nu shüwatuo.” 3Süki zievokezhako mu thezhokepethako, siro phichüko keze vo Kaifa ükecü zievokezhatho-u kitiezha nu kengulie; 4sidi uko pekhre di Jisu tepie dukhriwaketuo do rhü. 5Derei uko sie, “Thenyi ki suo, themiako mha kebvü sierta rei silie lhomu.”
Bethani nu Tier pie Jisu Kenhekecü
(Mark 14:3-9; Joh 12:1-8)
6Siro Jisu vo Bethani nu mpa kechüu Simon kinu ba, 7süki puo mhacütuoü ba ru thenumiapfü puo tier puoma kerethopfü, alabaster bou puo ketshu se vor, di süu rupie puo tsügei shü. 8Sitse pethakelieko süu ngu di uko nou kekrüta, di sie, “Kiüdi mha haicü pekaya ga? 9Kekreilamonyü tier hau puoma vi phicü nu zelie di raka süko pie kejüketsopfhümia tsülie vi ze!” 10Derei Jisu süu silie di sie uko ki, “Nieko kiüdi thenu hapfü kebvüya ga? Puo a gei mha kevi phi puo chüshü zo. 11Kejümia nie ze sei batuo, derei nieko a ze sei balie lho. 12Puo tier hau rupie a mo-u gei shükecü ha a kekhru nyieu keseshüwata zo. 13A nieko ki pu toushütuo, kijü pete nu dieliekevi hau pu mia kiekecü kheko nu thenu hapfü rükra tuoketuo la puo chükeshü dze rei sa pu tuo zotuo.”
Judas Jisu Tekeshü Puo Medokelie
(Mark 14:10-11; Luk 22:3-6)
14Siro kerekenieko donu mia puo, Judas Iskariot üyakezhau, zievokezhako ki vo; 15sidi sie, “A puo tepie nieko dzie nu shü ro nieko kedipuo pie a tsütuo ga?” Sitse uko raka ser phrüpie puo tsüwa. 16Siro süyawinu puoe puo tepie uko dzie nu shütuo ükecü rü terü tuota.
Pethakelieko Ze Ciekevonyi Nyikecü
(Mark 14:12-21; Luk 22:7-13,21-23; Joh 13:21-30)
17Siro Khreiüshükemo Niekhrüdanyiu zha therie nhie pethakelieko Jisu ki vor di sie, “No hieko bu n la kirapuo nu Ciekevonyiu nyiketuo la mha kese nyüya ga?” 18Sitse puo sie, “Nieko nadiu nu mia puo ki vo di puo ki, ‘Kepethaue puya, A teiu penuo bate; a ae pethakelieko ze di n ki nu Ciekevonyi nyitieyalie,’ isicie.” 19Sitse pethakelieko Jisu uko ki pukeshü tuoi di Ciekevonyiu la mha keselie.
20Siro thevatieta tse, puoe kerekenieko ze balie; 21sidi uko mhacü keba ki, puo sie, “A nieko ki pu toushütuo, nieko mia puo a teshütuo.” 22Sitse uko u nousuo phi di sie, “Niepuu, süu a me?” isi phreta. 23Sitse puo la sie, “Mia puo a ze puo dzie pie mekhou nu keshüu thuo a teshütuo. 24Themia Nuou sü puo dze thupie kezhü tuoi tuotatuo üzhie, derei Themia Nuou tepie mia dzie nu keshüu we ce, chülietie! Themia süu la we penuo vor kemoe puo dze vikuotuo.” 25Sitse puo teshütuoü kebau Judas sie puo ki, “Rabi, süu a me?” Sitse puo sie, “No pushüwata zo.”
Niepuu Kerükra Ca
(Mark 14:22-26; Luk 22:14-20; 1 Kor 11:23-25)
26Siro uko mhacü keba nu Jisu niekhrüda chülie di jashü mu bietshielie, di khapie pethakelieko tsü di sie, “Liepie cücie; hauha a mo zo,” si. 27Süsie puo tehieu rei pielie, di jashü di khapie uko tsü di sie, “Nieko hau krie phrecie; 28kekreilamonyü hauha themia kekra kephouma valieketuo la kru kepar dietseidiekhokelie a zie#26:28 Leshü kewe huo nu kesa icüu saya. zo. 29A nieko ki pushütuo, a a Puou kedi nu nieko ze di khubedzü kesa krieketuo zhau tsolie kemochie mhakipuorei a khubedzü hau krie salie lhote,” sita.
30Süsie uko keze tsali puo chülie di tuo Oliv Kijüthou gei vota.
Jisu Pedzü Pitor Puo Melietaketuo Pukeshü
(Mark 14:27-31; Luk 22:31-34; Joh 13:36-38)
31Siro Jisu uko ki, “Tsiezhü nieko pete a khawa di tatatuo; kekreilamonyü süu dze,
‘A kuopfheu vüshütuo,
sitse tekuokro-u ta cüretatuo,’
isikecü thupie kezhü la. 32Derei a rhei lakelie sie, a nieko mhodzü rie Galil nu votatuo.” 33Sitse Pitor sie puo ki, “Mia pete n khawa di tata zorei, a we silie lho zo!” 34Sitse Jisu sie puo ki, “A n ki pu toushütuo, tsiezhü thevü kekhou mhodzü no va se a melietatuo.” 35Sitse Pitor sie, “A bu n ze siatuo ürei a n melietalie lho zo.” Siru pethakelie kekreiko pete rei sükemhie pu phreta.
Jisu Gethsemane nunu Chakecü
(Mark 14:32-42; Luk 22:39-46)
36Süsie Jisu uko ze Gethsemane ükecü thechü puo nu vo di puoe pethakelieko ki, “A luki phi kecha chü keba ki nieko haki balie.” 37Sidi puo Pitor tsiu Zebedi nuonie ze vota, di puo nou kemezhie mu puo nou kehoukeruo chüta. 38Sitse puo sie uko ki, “A nou kemezhiepie siatatuoü batemu, nieko haki ba di a ze pfhe baliecie.” 39Sidi puo tuo za phi di zeretsu kecha chü di, “A Puo, chülie vituo liro, tehie hau bu a thertacie; derei a medo kemhie monyü n medo-u chüliecie,” si. 40Süsie puo tuo pethakelieko ki phir ru uko zezhü di ngulie, sitse puo sie Pitor ki, “Nieko bavüdo puo la rei a ze pfhe balie lhote me? 41Nieko dophi nu leta molieketuo la cha mu pfheüla ba zoliecie; ruopfü kitsa we chü nyü tuo zo, derei chüüphou we thachü,” sita. 42Siro puo süsieu va rei tuo la phi kecha chü di, “A Puo, mhanuü a bu hau krie molie lho üro, n medo-u chüliecie.” 43Sidi puo tuo la phir ru uko ze ba di ngulie; uko mhirholie lho ba zoketa la. 44Süsie puo uko khawa di va seu chatuoü la phi di khinyhü die kemhieko se cha lashü. 45Sitse puo tuo pethakelieko ki phir di sie, “Nieko tsie rei ze mu rülei ba zo me? Harie, puotei tsote, mu Themia Nuou tepie kephoumako dzie nu shüwatuoü bate. 46Sielie, di úko tuota khe. Harie a teshüketuou vor haki thate!” sishü.
Jisu Tekelie
(Mark 14:43-50; Luk 22:47-53; Joh 18:3-12)
47Siro puo die pu ketha nu, kerekenieko donu mia puo Judas-e zievokezhako tsiu phichükoe ketsekeshü zhiecha mu seideko piekecü mia krodi puo ze vorta. 48Siro puo teshüketuou zasi puo pie uko tsü di sie, “A puo meboshüketuou süu puo zo ho; puo teliecie.” 49Sitse puo mha zo Jisu ki phi di sie, “Keviu chüliecie, Rabi!” sishü di puo meboshü. 50Sitse Jisu sie puo ki, “A zeu, no chütuoü kevor-u chüliecie,” si. Süsie uko vor Jisu merhashülie di puo telie. 51Süki Jisu ze ketuoko mia puoe puo zhiecha zou mhai sie zievokezhatho-u kituou du di puo nyieto metakreiwa. 52Sitse Jisu sie puo ki, “N zhiecha pie puo kou nu shüwalie! Kekreilamonyü zhiecha pieyakezhamia pete zhiecha geinu katatuo. 53A a Puou ki cha ro puoe dieliemia legion kerekenie kezie rei ketseshülieketuo no si mo me? 54Derei süu sita ro, kikidi Kethodieko nu hau chü morosuo üdi pupie kezhüu chü tseilietuo di mu?” ita. 55Sümeseki Jisu themia kroko üse, “Nieko a ü mia vie sekecümia puo tuoi zhiecha mu seideko pie di a tetuoü vorzhü te le? A teisonhie rüsuoki nu ba di mia petha baya zo, nieko süki a te mo ze. 56Derei mha hako pete chüketa ha siedzekesikoe Kethodieko nu thupie kezhüko chü tseilieketuo la zo.” Süsie pethakelieko pete puo khawa di tata.
Mechükehouu nu Jisu Ketsokecü
(Mark 14:53-65; Luk 22:54-55,63-71; Joh 18:13-14,19-24)
57Süsie Jisu tekeliekoe puo ze thezhokepethako mu phichüko vo kengu keba zievokezhatho-u Kaifa kinu vota. 58Siro Pitor puo tso penuo mo di puo siemedzi zo zievokezhatho-u kifükhro ketso vo, tsiu puo thela nu kedipuo chütatuo shicüko mehotuoü le kepfhemiako ze balie. 59Süki zievokezhako mu phichüko kehou pete rei Jisu dukhriwaketuo la puo gei ketijü zhapu pfhü sie, 60derei ketijü zhapu kekra vor zorei die puotou puorei ngulie mota. Si ba di kenuotsa mia kenie vor, 61sidi sie, “Themia hau pukecü, ‘A Ukepenuopfü rüsuokiu bierhuowa di zha se nu chü lalie vi,’ isiwe.” 62Sitse zievokezhatho-u siethalie di sie, “No mhapuorei pu lho me? Hako kedipuopuo pu n pejo tha ga?” 63Derei Jisu kemekrieta. Sitse zievokezhatho-u sie puo ki, “A tsie rhei tuoyakezha Ukepenuopfü za nu n bu rüse di putuo, no Khristau, Ukepenuopfü Nuou zo me?” 64Sitse Jisu sie puo ki, “No pushüwata zo. Derei a nieko ki puya,
Nieko tsie yawinu Themia Nuou vo kekuotho-u zatsa baketa,
mu teigei kimhouko geinu tsurkezhü ngulietuo.”
65Sitse zievokezhatho-u puo pfhenei cierha di sie, “Puo Ukepenuopfü ketha die pute! Kiüdi úko zhapu kekrei pfhü sa ta? Nieko puo tsie nu Ukepenuopfü ketha die kepu siliete. 66Nieko kedipuo le ga?” Sitse uko sie, “Puo siata sü zo.” 67Süsie uko puo mho mhitsie tsiu puo vü, mu huomia dziezhü shüpie puo vü, 68sidi sie, “No Khrista sü, hie ki siedzedie pushüthie! Supuonie n vü ga?”
Pitor Jisu Melieketa
(Mark 14:66-72; Luk 22:56-62; Joh 18:15-18,25-27)
69Süki Pitor chazou kitiezha nu ba. Sitse rüümiapfü puoe puo ki phir di sie, “No rei Jisu Galil-u ze tuo ze!” 70Derei puo süko pete mhodzü nunu mo üdi sie, “No kedipuo pu tha shi a si mo.” 71Sidi puo tuo kifükhro pra tse rüümia kekreipfü puoe puo ngu di sie, süki kethako ki, “Themia hau rei Nazaret Jisu ze tuo zo.” 72Sitse Pitor moü rüse di sie, “A themia hau si mo zo!” 73Süsie rei süki ketha kro puo Pitor ki phir di sie, “No rei uko mia puotouta zo; n diepu nunu n telieta ze ru!” 74Sitse Pitor rüse khubou zo di sie, “A themiau si mo zo!” Siru sütei touki thevü khou parta. 75Sitse Pitor-e Jisu puo ki, “No thevü kekhou mhodzü va se a melietatuo,” isikeshüu rükralie. Sidi puo tuo pra di krapie mhapuochüta.
Currently Selected:
Mathi 26: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
