Mathi 28
28
Jisu Rheilasieketa
(Mark 16:1-10; Luk 24:1-12; Joh 20:1-10)
1Siro sabat tseita di zhadoudo zha therie nhie teisotie ki Magdalapfü Maria mu Maria kekreipfü unie mekhru mehotuoü vo. 2Sitse süki kiükishü kemerie chü mhai vorta; siro Niepuu dieliemia puo teigei nu tsur di ketsieu phou ketouwa di sügei bata. 3Puo ngupie teikemela tuoi mu puo pfhenei krapie pekrie tuoi. 4Siro rükhouko u michie pfü pe zo di kesiamia mhiepfü zhüta. 5Derei teigeidielieu thenunie ki, “Michie hiecie; a nnie-e mia puo gouwaketau Jisu pfhü tuokecü si ba. 6Puo haki zhü mote; kekreilamonyü puo pukeshü tuoi rheilasiete. Vor di puo kezhü chüu mehocie. 7Sidi rükri vo puoe pethakelieko ki, ‘Puo kesia nunu rheilasiete, mu puo nieko mhodzü rie tuo Galil nu votazhie; mu nieko sünunu puo ngulietuo ho,’ sishücie. Harie, a nnie ki pushüte ho.” 8Süla unie michie mu unie neipie mhapuochü di tuo kenourhei mekhru cie pra di süko pie puoe pethakelieko ki putuoü ta vota. 9Sitse Jisu unie ze keselie di sie, “Keviu chüliecie!” Sitse unie puo ki phir puo phi bie di puo rüsuota. 10Siro Jisu sie unie ki, “Nnie michie hiecie; vo a siezeko bu Galil nu volienushücie, uko sünunu a ngulietuo ho,” sita.
Rükhoumia Kinu Dielie
11Siro unie cha nu tuoluocü nu, rükhouko huomia rünau nu vo di zievokezhako ki mhachüketa pete puwata. 12Süki zievoko vo phichüko ze kepfhülie, sidi raka kekra pie chüpahiko tsüwaketuo kerüchülie, 13sidi sie uko ki, “Nieko sie, ‘Puoe pethakelieko thuo theva ze vor di hie zekezhü nu puo rügupietewe,’ iliecie. 14Mu die hau kezhau nyie nu volie liro, hie thuo puo rüchülietuo; sidi nie bu nie nou kemezhie molietuo,” sishü. 15Süla uko rakako lielie di uko ki pukeshü kemhie chüta; siro thedze hau thie ketso rei Judamia donu kepu vorzhü zo.
Jisue Pethakelieko Pengu Lakeshü
(Mark 16:14-18; Luk 24:36-49; Joh 20:19-23; Mhak 1:6-8)
16Sirei pethakelie kerepuokrüko Galil nu vo, sidi Jisue uko ki kepu tuoi kijüthouu gei vota. 17Siro uko puo ngulie tse uko puo rüsuota, derei huomia kenoudota. 18Ru Jisu vor di sie uko ki, “Teigei rei mu kijü rei kekuo pete pie a tsüwate. 19Süla tuo vo di seyie neiüko pete chüpie pethakeliemia chüliecie, Puou mu Nuou, mu Kemesa Ruopfüu za nunu süko dzülu khashü, 20di uko bu a nieko ki pukeshüko pete chüüzelieketuo la uko pethashüliecie. Siro harie, a puotei thela ketso rei nieko ze sei tuo zotuowe!”#28:20 Leshü kewe huo nu Amen saya. sita.
Currently Selected:
Mathi 28: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
