Mathi 25
25
Rüümia Ker pie Kedievikeshü
1“Siro teigei kedi-e hakemhietuo. Rüümia#25:1 Gk Phousepfüko. ker u mitubouko pie yasau ze kesetuoü kevo mhie zo. 2Süko mia pengou mhale mo mu mia pengoue mhasi. 3Rüü mhalekemo pengouko u mitubouko pie tuo, derei tier we se tuo mo; 4derei mhakesi pengouko mhabouko nu tier tsiu mitubou sa pie tuo. 5Siro yasau vor menuota, süla rüüko rüngu ba di zeta. 6Derei khisoteiluo mia shiekhoui di, ‘Harie, Yasau sü! Par puo zeliecie.’ 7Sitse rüüko pete sielie di u mitubouko lo meza phrelie. 8Siru mhalekemoko sie, ‘Nie tier huoyo pie hie tsücie, kekreilamonyü hie mitubouko mhetatuoü zhüketa la.’ 9Derei mhakesiko sie ‘Chülie suote, siwa ro nieko la rei mu hie la rei tsatatuo. Nie thuo vo zeyakezhako kinu khrülietacie.’ 10Süla uko süu khrütuoü vota tse, yasau vorta, mu dojüpfü kebako sielie di yasau ze nuyie heu nu lelie, sitse kikhau khawata. 11Süsienu rüü kekreiko rei vor tsolie di sie, ‘Niepuu, niepuu, kikha khrüshü hie tsücie!’ 12Derei puo sie, ‘A nieko ki pu toushütuo, A nieko si mowe!’ 13Süla nieko pfheüla ba zolie, kekreilamonyü nieko puo teisozhau mu puo bavüdo-u si kemo la.
Kituomia Se pie Kedievikeshü
(Luk 19:11-27)
14“Sizomonyü mia puoe rüna kekrei puo nu votatuo üdi puo kituoko kieshü di puo vie pie süko dzie nu keshü mhie zo. 15Süko mia puopuo chülie kevi le di talent#25:15 Talent puoe mia puo teicie kerepengou mhakra ki kra. pengou pie mia puo tsüshü, siro kenie pie kekrei puo tsü mu puo pie mia puo tsüshü. Süsie puo tuota. 16Siro talent pengou ngukelieu kenourhei vo süko se mhachü di kekrei pengou pralie. 17Sütuoi kenie ngukelie kituou rei kekrei kenie pralie. 18Derei puo ngukelie kituou vo kijü thielie di puo niepuu rakau keviepie zhüwata. 19Siro puotei kekra sie kituo süko niepuu la vor di uko mhathoko lesie. 20Sitse talent pengou ngukelieu kekrei pengou sa se vor puo tsü di ‘Niepuu, no talent pengou pie a tsüshü, mu harie, a talent kekrei pengou pralietewe.’ 21Sitse puo niepuu sie, ‘Siyazemu, no kituo kevi kedietho-u; no mha keduoyo gei rei dietho baliete, a n bu mha kekra mhokezha chütuo; vor n niepuu ze n nei batalie.’ 22Siro talent kenie ngukelieu rei vor di sie, ‘Niepuu, no talent kenie pie a dzie nu shü, harie, a talent kekrei kenie praliete.’ 23Sitse puo niepuu puo ki, ‘Siyazemu, kituo kevi kedietho-u; no mha keduoyo gei rei dietho baliete, a n bu mha kekra mhokezha chütuo; vor n niepuu ze n nei batalie.’ 24Süsie talent puo ngukelieu rei vor di sie, ‘Niepuu, no themia n nou kere puocü a si ba; no tsia prushü kemora rei re tuoya, mu nyürieshü kemora rei pa kengu tuoyacü a si, 25süla a michieta di n talent-u khrupie zhüwate. N vie sü, harie,’ sita. 26Puo niepuu la sie puo ki, ‘No kerüzhü mu kemecü kituou! No a prushü kemora re tuoyacü, mu a nyürieshü kemora rei pa tuoyakecü no siluo le! 27Siüro no a raka pie vo rakaki nu rei pie zhülie ro, a la kevor ki a raka mu puo pra sa ngulietieciü. 28Süla puo kinu talent-u pielie di khapie talent ker kebau tsüwalie. 29Kekreilamonyü themia kehoupuorei mha kebau, khapie puo tsü sashütuo, sitse puo mhanyi philietuo; derei mhapuorei ba kemo-u puo kinu kebau rei chüsetatuo. 30Siro ziezhükemo kituou kelhoupie chazou kezei nu shüwalie, sünunu kra mu u hu thegeipie batuo.’
Seyieko Nyie Pepiketuo
31“Siro Themia Nuou zayie chü di puo dielieko pete sa puo ze tsurkecü ki, puoe puo zapuzayie kedibau gei batuo; 32siro seyie peteko puo mhodzünu kengu phretuo, süki puoe kuopfhemia puo temvüko donunu tekuoko kela kreiwayakezha tuoi puo themiako kho kekreiwatuo. 33Sidi puo tekuoko pie puo zatsashülie mu temvüko pie puo vitsashüwatuo. 34Süki kediu puo zatsa kethako üse, ‘A Puo japie nieko ketsüko, vorliecie, sidi kijüu chülie tsenu nie la kesepie baketa kedirüvieu weliecie; 35kekreilamonyü a merü tuo ru nieko mha pie a tsü, a terhü tuo ru nieko mha pie a bu krie, a rüso chü tuo ru nieko a pesolie; 36a methuo tuo ru nieko pfhemenei pie a wheshü, a mhachüzhü ru nieko vor a thekeshü, a kedie chü ba ru nieko a ki vor,’ isi sietuo. 37Süki kemiathoko la sie puo ki, ‘Niepuu hie kikecükipuo no merü ketuo ngu di mha pie n tsü ga? morei no terhü ketuo ngu di mha pie n bu krie ga? 38Mu hie kikecükipuo no rüso chü ketuo ngu di n pesolie morei no methuo tuo di pfhemenei pie n wheshü ga? 39Hie kikecükipuo no mhachüzhü morei kedieki nu ba di n ki vor ga?’ 40Sitse kediu sie uko ki, ‘A nieko ki pu toushütuo, nieko a siezedzürie hako donu kecütho-u gei rei chüshü ro, süu a gei chüshüta zo.’ 41Süsie puoe puo vitsa kethako ki, ‘Nieko rüse pfüketako, a kinu tuose satan mu puo dielieko la kesepie keba kechachie mi nu votaliecie; 42kekreilamonyü a merü tuo, derei nieko mha pie a tsü mo, a terhü tuo, derei nieko mha pie a bu krie mo, 43a rüso chü tuo, derei nieko a peso mo, a methuo tuo ru nieko mha pie a wheshü mo, a mhachüzhü mu kedieki nu ba, derei nieko a meho mo.’ 44Süki uko sie puo ki, ‘Niepuu, hie kikecükipuo no merü ketuo, morei terhü ketuo, morei rüso chü ketuo, morei methuo ketuo, morei mhachü, morei kedieki nu keba ngu di hie n meho mota ga?’ 45Sitse puo la sie uko ki, ‘A nieko ki pu toushütuo, nieko kecütho hako mia puo gei rei chüshü mota ro, a gei chüshü mota zo.’ 46Süsie uko kechachie siazha kechü nu votatuo; derei kemiathoko we kechachie kerhei nu votatuo.”
Currently Selected:
Mathi 25: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
