Mathi 24
24
Jisu Rüsuokiu Kataketuo Pukeshü
(Mark 13:1-2; Luk 21:5-6)
1Siro Jisu rüsuokiu nunu par di tuotazhü tse, puoe pethakelieko rüsuokiu nu kiko thapie puo kietuoü vor. 2Sitse puo uko ki “Nieko mha hako pete ngu tha zo mo? A nieko ki pu toushütuo, hako pete vawa di ketsie puo bu rei kemhosepfü ba motatuo,” sita.
Thela Teiki Zasiko
(Mark 13:3-13; Luk 21:7-19)
3Süsie puo vo Oliv Kijüthou gei ba ru pethakelieko pekhre puo ki vor di sie, “Mha hako kedikechükipuo chü ta, mu kedipuo pie n kevor tsiu puotei thelaketa zasiu chüshütuo shi se hie ki pucie?” 4Sitse Jisu sie uko ki, “Miapuorei bu nieko sewa molieketuo la nie kireilie. 5Kekreilamonyü themia kekra a za se vor di, ‘A Khristau zowe!’ idi themia kekra se zetatuo. 6Süki nieko terhü kechü dzeko, tsiu terhü dze diekrie si phituo, derei süla nie noukemezhieta hie. Mha süko chü molie lho, derei süu thelau mo. 7Siro seyie puo seyie kekrei puo ze kegei tsiu kediko huoniehuo perhie sietuo, siro lukihaki pekrie mu kiükishütuo: 8derei mha süko pete kemezhieketuo therieko zo.
Kepechü Vorketuo
9“Siro mia bu nie tepie mia dzie nu shü di nie pechü mu dukhrituo, siro seyie pete rei a za la nieko ngumecütuo. 10Süki mia kekra kepele khawatuo#24:10 Moro tetsutatuo., mu huohuo tepie mia tsütuo, tsiu huoniehuo mecütatuo. 11Siro siedzekesi ketijü kekra sier di themia kekra se ketsi zetatuo. 12Siro thezho sanyü kemo kra phiketa la mia kekra kekhrie meku miemietatuo. 13Derei hie zo tha thela tsokelieu kelalietuo. 14Siro kijü pete nu zhapu puo chüshüketuo la kedi dze dieliekevi hau pupie seyie pete petsoshütuo; sidi puotei thelau vortuo.
Kemezhie Phiketuo
(Mark 13:14-23; Luk 21:20-24)
15“Süla nieko Daniel siedzekesiue thiedzü pupie kezhü mha va perhu se zoketuo kemecü chü zokecüu vor kemesa chüu nu ketha ngukelie ki (kephrümiako bu leliecie), 16süki Judia nu kebamia bu ta kijüthou gei votalie; 17mu ki tsüle gei kebamia bu ki nunu mha chülietuoü la ke hie; 18tsiu lie nu ketuou bu puo pfhenei chülietuoü la vo hie. 19Süteiki nuonipfü ketuoko mu u nuonuo nuyakecüko we kemezhiepie kedipfü chütie shi! 20Nieko ketau bu teisei ki morei sabat nhie molieketuo la chaliecie. 21Kekreilamonyü kemezhiekecü süu re phi zotuo, kijü chülie tse nunu vor tsie ketso sükemhie chü mo mu sükemhie chü lalie lho. 22Siro teisozha süko chü pedzüshü kemosie we miapuorei kelalie lho; derei kedakelieko la teisozha süko chü pedzüwatuo. 23Sükisü mia nieko ki, ‘Harie, Khrista haki ba!’ morei ‘Puo luki ba!’ isi shierei pele hie. 24Kekreilamonyü ketijü Khrista mu siedzekesi ketijü sier ungomhatho kezhako mu zasiko chüpie mia pekie di chülie kevisie kedalieketako rei se ketsi zetatuokecü la. 25Harie, a pedzüperie nieko ki pushüwate ho. 26Süla uko sie nieko ki, ‘Lere-i, puo rayha nu tuo,’ idi pu rei vo hie; morei, ‘Harie, puo kinutshekou ba ho,’ isi rei pele hie. 27Kekreilamonyü niathutsa nu teimelashü ro, niakratsa rei ngu voyakezha tuoi, Themia Nuou kevor rei sümhie zotuokecü la. 28Kehourapuorei kesiamo kezhüra chürhaüko rei vo sünu kengutuo.
Themia Nuou La Kevor
(Mark 13:24-27; Luk 21:25-28)
29“Siro kemezhiekecü teisozha süko tseita mumetha niaki zeitatuo,
“tsiu khrü zieshü motatuo;
themvüko teigei nu rürietatuo,
mu teigei kekuoko shü keniewatuo.
30Süsie Themia Nuou zasi teigei nu ngu partuo, sitse kijü nu seyie pete kratatuo, mu ukoe ‘Themia Nuou teigei kimhouko geinu’ kekuo mu zapuzayie chü di tsurkezhü ngutuo. 31Süki ketsü khou kemerie chü di puoe puo dielieko ketseshütuo, sidi uko teigei tietsapuo nu vo kekreitsa ketso ke diako nunu puoe kedakelieko pfhü kengulietuo.
Chiedebo-u geinu Kepethadie
(Mark 13:28-31; Luk 21:29-33)
32“Siro nieko chiedebo-u geinu kepetha dieu siliecie: puo co medzüvü di puo nyü kesa the kepar ki teiletieta ükecü nieko silieya. 33Sütuoi nieko mha hako pete ngukeshü ki, puo penuo vor kikha ki thata ükecü siliecie. 34A nieko ki pu toushütuo, mha süko pete chü tseiwa kemochie thephou hau jütalie lho. 35Tei mu kijü jütatuo, derei a dieko we jütalie lho zo.
Miapuorei Si kemo Teisozhau mu Bavüdo-u
(Mark 13:32-37; Luk 17:26-30,34-36)
36“Derei teisozha süu mu bavüdo süu dze we a Puou rübei sie, miapuorei teigeidielieko rei morei Nuou rei siya mo. 37Siro Noah kelhou ki tuoi Themia Nuou kevor ki rei sümhie zotuo. 38Dzüdi sierketa mhodzü themiako mhacümhakrie, thenu lie mu nyhü zo ba Noah rou nu leketa nhie tso. 39Sidi dzüdi vor uko pete vupfülie kemochie mhapuorei si ba mo, sütuoi Themia Nuou kevor ki rei sümhie tou zotuo. 40Sükisü mia kenie keze lie nu tuotuo, mia puo chüsetatuo, mu mia puo khawatuo. 41Thenumia kenie keze kecü ge batuo; miapfü puo chüsetatuo mu kekreipfü khawatuo. 42Süla pfheüla ba zolie, kekreilamonyü nieko nie Niepuu vorketuo teisozhau si kemo la.#24:42 Leshü kewe huo nu bavüdo kicüpuo. 43Derei mha hau siliecie: mhanuü ki niepuu kicükipuo kerügumia vortuo shicü si ba ro, puo pfhe balie di kerügumia bu ler puo ki rhie molietuo. 44Süla nieko rei dojü balie, kekreilamonyü nieko le mo keba bavüdo puo nunu Themia Nuou vor zotuokecü la.
Kedietho mu Kerüzhü Kituo
(Luk 12:41-48)
45“Siro supuo kedietho mu mhakesi kituou chü di, puo niepuu bu puo chüpie puo kinu kezha chü di puotei touki mha khapie kituo kekreiko#24:45 Gk Pie uko tsü. tsütuo ga? 46Puo niepuu kevor ki mhachü ba di ngulieketuo kituo süu thejakepfütho zo. 47A nieko ki pu toushütuo, puo themia süu bu puo vienya pete kemeho-u chü zotuo. 48Derei kerüzhü kituo süu puo nou nu, ‘A niepuu vor menuotuo’ 49idi puo dziese kituoko vü, sidi kemezemia ze mhacümhakrie bata ro, 50kituo süu niepuu puo le mokeba puo nu vor di, 51puo da phawa#24:51 Moro puo dathewa. di puo khapie ketherakezhako kro nu shüwatuo; sünu kra mu u hu thegeipie batuo.
Currently Selected:
Mathi 24: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
