Mathi 11
11
1Siro Jisu die hako pie puoe pethakelie kerekenieko tarhokeshü sie, puo sünunu tuo uko nadiko nu mia petha mu puo dielieu pupie mia kietuoü vota.
Johan Mia Dzülukepfüu Dielieko
(Luk 7:18-35)
2Siro Johan kedieki nunu Khristau mhathoko sikelie ki, puoe#11:2 Leshü kewe huo nu ro mia kenie. pethakelieko huo ketsepie puo ki shü, 3mu uko puo ki, “Mia puo vortuoü ketuou no me? Mo hie bu kekrei puo merü batuo ga?” 4Sitse Jisu sie uko ki, “Nieko vo di Johan ki nie kerünyü mu kenguko pushücie: 5Mhiciemia mha ngulie bate, phiyhomia chatuolie bate, mpa kechüko#11:5 Leper mu leprosy icü die hanie ro kechü neiünei pulie vi. chü kemesalie bate, nyievümia mhapfhe silie bate, kesiamia rhei lalie bate, tsiu dieliekeviu pupie kejümia kieshü bate. 6Mu kehoupuorei a gei jata kemomia thejakepfütho.”
Jisu Johan Mia Dzülukepfüu Ketshe
7Siro süko tuotazhü tse, Jisue Johan dze pu themia krodiko kie di: “Nieko rayha nu kedipuo mehotuoü pra ga? Teikhrie bu he kenie keba tekhriebo puo me? 8Mo, nieko kedipuo mehotuoü vo ga? Pfhenei puolo kemenepfü sekezhamia puo me? Pfhenei puolo kemene seyakezhamia kedimia kinu baya! 9Di siro nieko kedipuo mehotuoü pra ga? Siedzekesimia puo me? U, mu sizomonyü siedzekesimia ki rei zhakuokecü puo zo. 10Themia hau dze thupie ketuo,
“ ‘Harie, a n mhodzü a dielieu ketseshüzhie,
puo n mhodzünu n chau kesetuo,’ isi pie kezhüu zo.
11A nieko ki pu toushütuo, thenumia geinu lhou keparko donu Johan mia dzülukepfüu ki kezha puorei lhou sier mo; derei teigei kedi nu we kecütho-u zorei puo ki zhakuo. 12Johan mia dzülukepfüu teiki nu vor tsie ketso mia teigei kedi pfhü mvürümvü tuote, mu mvürümvü ketuomia süu pie u vie chüliezhie. 13Siro Johan kevor mhodzü siedzekesiko pete mu thezho-u rei siedzedie pu vor zo; 14tsiu nieko süu lietuo üro, puoe vortuo üdi pupie kezhü Elijau zo. 15U nyie kenyimia bu rünyüliecie!
16“Derei a bu tsiedo nuoko pie kedipuo ze kemejülie vituo ga? Sükosü nhicumia lhithochüko nu huoniehuo kie di,
17“ ‘Hie luoü khou nie kie, sirei nie nie dowhuolie mo;
hie thekrü chüshü,
derei nie kralie mo,’ ikeba mhie zo.
18Kekreilamonyü Johan vorkecü ki mhacümhakrie mo ru ukoe sie, ‘Puo terhuokesuo zeya!’ si. 19Themia Nuou vor mhacümhakrie ru, uko puo ki, ‘Harie, cahuocayau mu kemezeu, khezhanuo kekhruoko siro kephoumako khrietho-u!’ ite. Derei mhasi zo we puo mhatho geinu puo mezhüko tha toushüya!”
Pele Kemvü Rünako
(Luk 10:13-15)
20Siro puoe ungomhatho kekra chükeshü rünako nu themiako thenoukedilie moketa la süko kerhieta. 21Sidi sie, “Ce, Korasin! no we chülietie! Ce, Bethsaida! no we chülietie! Mhanuü nnie kinu chükeshü ungomhathoko Tur tsiu Sidon nunu chüshü ükecü we, uko gakhropfhe dzie mu mige pie u kenhepfü di thiedzütho nu uko nou kedilietatieciü! 22Derei a nieko ki pushütuo, mia ketsoketuo zhanhie nieko ki rei Tur mu Sidon-nie we hielie rüükuotuo. 23Siro no Kapernaum,
n chü kerükrie kho tei thutuoü ba me?
Mo, n chü kerünuopie tsu Hades nu shüwatuo.
Kekreilamonyü n geinu chükeshü ungomhathoko Sodom nu chüshü ücüwe, thie ketso rei süu ba zotieciü! 24Siro a n ki pushütuo, mia ketsoketuo zhanhie n ki Sodom kijüu we hielie rüükuotuo.”
A Ki Vor di Rüleilie
(Luk 10:21-22)
25Süteiki Jisu sie, “He-i, a Puo, tei mu kijü Niepuu, a n tsheya, kekreilamonyü no mhakesikeleko ki we mha hako keviepie tuo di pie nuoranuoko pesipengukeshü la. 26Ketho, Apuo, sikecü n neikecü la.#11:26 Moro sikecü n mhodzüki ngu n neikecü la. 27A Puo thuo mha pete pie a dzie nu shüwate; mu Puou thuo zo kemosie miapuorei Nuou siya mo, sütuoi Nuou mu Nuou thuo süu thapie kieshüketuoko zo kemosie miapuorei Puou siya mo.
28“Kemezhie mu nie pie mesikezha khe a ki vorliecie, siro a kerülei pie nie tsütuo. 29Nieko a vocie pfülie, mu a kinu mhasilie; kekreilamonyü a zho vi mu a nou ko mocü la; silie liro nieko nie nou kerülei ngulietuo. 30Kekreilamonyü a vocie pfü rüü mu a pieu rei medza.”
Currently Selected:
Mathi 11: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
