Mathi 12
12
Sabat Dze Ketsokecü
(Mark 2:23-28; Luk 6:1-5)
1Siro Jisu sabat zha puo nhie tuose lievu puo pfüthe vozhü, süki puoe pethakelieko merü tuota; süla uko telhakre merhelie di cü tuo. 2Siro Farisiko süu ngushü di sie Jisu ki, “Harie, noe pethakelieko sabat nhie chükecü hau thezho kemo puo chü tuote.” 3Sitse puo uko ki, “Nieko David mu puo ze ketuoko merüketa ki kedipuo chüte shikecü dze phrü mo zo me? 4Puo Kepenuopfü ki nu le di zievoko rübei sie kekreimia cüya kemo zho varhuo di Kepekieniekhrüda cü ze. 5Sizomonyü zievoko thuo zorei sabat nhie rüsuokiu nunu sabat perhuta zorei kejo jü ükecü nieko thezho-u phrü mo zo me? 6Derei a nieko ki pushütuo, rüsuokiu ki rei zhakuokecü puo haki tha. 7Sirei, ‘A ruosuou ki rei ngukemezhie a nei,’ ikecü dieu ca niekoe sikecü sie we jokemomia pejolie lheciü. 8Kekreilamonyü Themia Nuou sabat mho rei niepuu zokecü la.”
Dziesiamia Puo
(Mark 3:1-6; Luk 6:6-11)
9Siro puo thechü sünunu tuose uko sinagogko nu vota. 10Sitse sünu dziesiamia puo ba di ngulie. Süki uko puo pejo kenyü la puo ketso di, “Sabat nhie mia chü keshürhokecü thezho me?” ita. 11Derei puo sie “Mhanuü nieko huomia tekuo puo nyi di sabat nhie süu te kheho puo nu leta ro, puo süu merhashü par chazou shü motuo me? 12Di siro themia tekuo ki rei puoma re phi mo üme? Süla sabat nhie mha kevi chükecü puotou zo.” 13Sidi puo themiau ki, “N dzie petoshücie,” sitse puo chashü ru süu vi lapie kekreitsatie mhielieta. 14Derei Farisiko pra di kikemhie di puo biewatuo shiü rhüta.
Ukepenuopfü Kedakelie Kituou
15Sirei Jisu mha hau silie tse, puo sünunu tuota, siro mia kekra puo siemedzita; mu puo süko pete chü keshürhoshü, 16siro puo süko bu puo dze pu pesi hienu kekhawa. 17Hau Isaya siedzekesiue pukeshüu tseilieketuo la zo:
18“Harie, a kituou, a thuo puo kedakelieu,
a khrieu, a nou zorei puo neiyakezhau.
A a Ruopfü pie puo gei shütuo,
mu puoe kethoca se Judakemoko pesishütuo.
19Puoe mia ze keprüli tsiu shie zo tuolie lho,
morei chapfüchaüko nu miapuorei puo pfhe silie lho.
20Puo kethocau bu kuolie kemochie;
puoe tekhrie tsakezhü puorei bietshewa lho,
tsiu puoe mi kepetu lo khukezhüyo rei pemhewalie lho!
21Mu Judakemoko puo zau gei u kemerü batuo.”
Jisu mu Belzebul
(Mark 3:20-30; Luk 11:14-23)
22Süki mia terhuokesuo bu kebi ze ketuo puo mhicie mu liehuokecü puo ze puo ki vor; ru puo süu chü pevishü, sidi keliehuo süu bu die pulie mu mha ngulie. 23Sitse themia kroko pete u ngo di sie, “Hau David nuouta zo monyü?” sita. 24Derei Farisiko süu sishü di sie, “Hau terhuokesuoko kediu Belzebul la zo kemosie terhuokesuoko whuolieya mo,” sita. 25Süki Jisu uko noudoko silie di sie uko ki, “Kedi kehoupuorei puo thuo puo pfüphrota ro kataya, mu nadi morei kikru kehoupuorei puo thuo puo pfüphrota ro thalieya mo. 26Siro Satan thuo Satan whuota ro, puo thuo puo pfüphrote, siliro kikidi puo kedi thalie ta? 27Mhanuü a Belzebul se di terhuokesuoko whuota üro nieko nuonuoko supuo kekuo se di süko whuowa ga? Süla süko thuo nieko ketsotuo. 28Derei a Kepenuopfü Ruopfü kekuo se di terhuokesuoko whuoya liro, siro Kepenuopfü kedi vor nie tso bate. 29Morei mia puoe kekuomia puo phawa perie moro kikidi le süu kinu puo vieko chülie vi ta? Puo phakelie sie nu puo kinu vieko chüliecü zotuo. 30Kehoupuorei a kitsa kemomia a ngumvümia zo, mu kehoupuorei a ze mha kengukemo-u mha kezakeziwayakezha zo. 31Süla a nieko ki pushütuo, kephouma mu mia ketha kehoupuorei vapie themia tsütuo, derei Ruopfü ketha we vapie tsülie lho. 32Kehoupuorei Themia Nuou gei die kesuo pu ro vashü puo tsütuo; derei kehoupuorei Kemesa Ruopfüu gei die kesuo pu ro, tsiedo kelhou ki mu tsiesieu nu rei vashü puo tsülie lho.
Seibo mu Puo Si
(Luk 6:43-45)
33“Seibo-u theke pevishülie, siro puo si kevi vülietuo; moro seibo-u theke pesuoshülie, siro puo si kesuo vüshütuo; kekreilamonyü puo si geinu puo bo-u silieyakezha la. 34Nieko prielepfü seyieko, nieko vi mo di kikidi mha kevi pulie vi ta? Kekreilamonyü u nou mha kekra bakecü la u tie bu pu parya. 35Themia kevimiae puo kinyibou kevi nunu mha kevi hielashüya, mu themia kesuomia puo kinyibou kesuo nunu mha kesuo hielashüya. 36A nieko ki pushütuo, themia die pukezha diethuodieruo kheko la rei u rüli ketsokecü nhie pu la phre zotuo, 37kekreilamonyü n dieko la no mezhülietuo, mu n dieko la no jotatuokecü la.”
Zasi Puo Chakecü
(Mark 8:11-12; Luk 11:29-32)
38Süsie thezhokepethako mu Farisiko huomia la sie puo ki, “Kepethau, hie n bu zasi puo chüshü di ngu nyüyalie,” sita. 39Derei puo uko ki, “Kerüzhü mu pieüpiera phou hau zasi pfhüyakezha zo, derei siedzekesiu Jona geinu chükeshüu sie zasi kekrei kha lapie puo tsü salie lhote. 40Jona teisozha se mu teizeizha se khuo kezhau vadi nu kezhü tuoi Themia Nuou rei teisozha se mu teizeizha se kijü vadi nu zhütuo. 41Siro mia nyie kecüketuo zha nhie Ninevimiako themia phou hau ze sie di uko pejotuo, kekreilamonyü uko Jona kepetha die sikeshü ki u kephouma nunu thenoukedilie, mu harie Jona ki zhakuokecü puo haki tha zo! 42Mia nyie kecüketuo nhie Pekhrotsa kedipfü themia hako ze sie di uko pejotuo, puo kijü vala nunu Solomon mhasidie rünyütuoü vorkecü la, mu harie, Solomon ki zhakuokecü puo haki tha zo!
Mesa Kemo Ruopfü La Kevor
(Luk 11:24-26)
43“Siro mesa kemo ruopfüe mia puo geinu praketa ki süu puo rüleichü pfhü dzü kejüko nu voya, derei süu ngulieya mo. 44Sitse puo sie, ‘A thiedzü ba di praketa a kiu nu la votatuo.’ Sidi puo sünu vor tse ki süu methuo mu ketso kezivipie keba ngulieya. 45Sitse puo tuo la pra puo ki rei suokuokecü ruopfü kekrei thenie ze la vor di uko keze ki sünu bataya; sidi themia süu rüli kenuotsa therietsa ki rei suokuotaya. Tsiedo themia kesuo phouu rei sümhie zotuo.”
Jisu-nuo Zuo mu Puo Siezedzürieko
(Mark 3:31-35; Luk 8:19-21)
46Siro puo themiako ki mha pu tha zoluocü nu, puo zuo mu puo siezedzürieko puo ze kerüchütuoü puo pfhü vor kitie thata. 47Süki mia puoe puo ki, “Harie n zuo mu n siezedzürieko n ze kerüchütuoü n pfhü vor kitie thalie.” 48Derei Jisu la sie hau pukeshüu ki, “Supfüpuoe a zuo mu suomia a siezedzüriemia ga?” 49Sidi puoe puo dzie chapie puoe pethakelieko tha di, “A zuo mu a siezeko sü hakowe! 50Kekreilamonyü kehoupuorei teigei keba a Puou medo chüyakezhamia sü a siezemia, a üpfünuo mu a zuonuo zo.”
Currently Selected:
Mathi 12: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
