Capiko 3
3
Whuowa Kemo Seyieko
1Siro Israelmia Kanan kijü nu terhü chü mo zocüko dojüshüketuo la Jihovae seyie kro puo khapie ba, 2(mu süusü Israelmia thiedzü terhü si mo zokecü phouko bu terhü do silieketuo la). 3Süko Filistinmia kedi pengouko, Kananko pete, mu Sidonko, tsiu Lebanon Kijüthou gei Hivko pete, Baal-hermon Kijüthou nunu vo Lebo-hamat ketso. 4Süko geinu Israel dojü di uko Jihovae Mosa geinu uko puonuoko ki diekhakeshüko zelietuo mo mo shikecü sishüketuo la. 5Siro Israelkoe Kananko, Hitko, Amorko, Perizko, Hivko mu Jebusko donu lhou bata; 6tsiu ukoe süko nuonuo thenuko lielie, mu uko nuonuo thenumia pie kekreiko nuonuo thepfuko ki penyi, idi terhuo kekreiko lie chü tuota.
Othniel
7Israelkoe Jihova mhinguki mha kesuo chüta, sidi Jihova uko Kepenuopfü rükra mota, mu ukoe Baalko tsiu Asherako lie chü tuota. 8Süla Jihova nouyieu Israel gei tu sieta, sidi puoe uko zepie Aram-naharaim kediu Kushan-rishathaim dzie nu shüwa; sidi Israelkoe cie thetha Kushan-rishathaim kituo chü. 9Derei Israelkoe Jihova ki uko mezhie rükhruoshü ru, puoe uko shüphrakelie puo piesieshü, süu Kaleb siezeu Kenaz nuo Othniel, puo bu sier di uko shüphralie. 10Jihova ruopfüu puo gei vorlie; sidi puo Israelko capiu chü di terhü nu pra. Siro Jihovae Aram kediu Khushan-rishathaim khapie Othniel dzie nu shü, sidi puo Aram kediu mho kuolie. 11Sidi cie hiedia we kijüu nu noune bu balie. Süsie Kenaz nuou Othniel siata.
Ehud
12Süsie rei Israelkoe Jihova mhinguki mha kesuo chü lata, mu ukoe Jihova neimo chüketa la Jihovae Moab kediu Eglon chü pekuopie Israel petsoushü. 13Sitse Eglon-e Ammon mu Amalek themia kiepie puo salie di ze kho Israel whuo, sidi ukoe kukuobo nadiu lielie. 14Sidi Israelkoe cie kerethetha Moab kediu Eglon kituo chü.
15Süsie Israelkoe Jihova ki rükhruo lashü ru, Jihovae uko shüphralieketuo puo piesie lashü, süu Benjaminnuomia puo, Gera nuo Ehud, puoe pevidzie puo, Israelkoe puo bu Moab kediu Eglon ki khezhanuo se vo. 16Tsiu Ehud-e zhietenuo puoü lutsahatsa hekecü u thu chiecü puo chü pielie, di süu khapie puodo puo zatsa puo pfhe khro shüpfülie. 17Sidi puoe khezhanuo se Moab kediu Eglon tsüshü. Eglon-e themia luo sekecü puo. 18Siro Ehud-e khezhanuo khashüwa tse, puoe khezhanuo pie kevorko ketsepie uko cha nu shüwa. 19Derei puo we Gilgal kepenuo terhuorhi tsie kinu rürei la vo di puo ki, “O kediu, a n ki pekhre die puketuo puo ba.” Sitse kediu sie, “Hienie bu hienie rübeitalie,” si, ru puo khieki ketha pete tuota. 20Sitse puoe kibou peso kemeku bouu nu puo rübei ba ru Ehud-e puo ki vor di sie, “A Kepenuopfü kinu n la dielie ngukelie puo tuolie,” ishü. Mu kediue puo ba nunu sielie tse, 21Ehud-e puo dzie puo vitsa pie puodo puo zatsa nu puo zhietenuo zou pie kediu vadi rhüwa; 22sidi zhietenuo peteu puoü mu puoto rei le phreta, mu puoshuo thuo zhietenuo whelieta, puoe puo vadi nunu zhietenuou shüzou mo, mu kerhu parta. 23Sitse Ehud-e kifükhro tuo parta, sidi kibou peso-u kikha pete cabi pie puo sa khawa.
24Ehud-e tuo prata tse, kituoko vor. Sidi ukoe kibou pesogei kikha khapie baketa ngulie tse ukoe lecü, “Kibou kemekuu nu puo kelei ba mecie,” itha. 25Ukoe pfhepfhe tha uko noumecata. Puoe kibou kikhako khrüshü mota tse, ukoe cabi se vor kikhako khrüshü. Ru sünu uko kediu tetsu kiluo nu siazhü ngulie.
26Ukoe menyho baluocü nu Ehud-e tase terhuorhi tsieko cie zo Seira nu vota. 27Puo Efraim kijüthou rüna nu vorlie tse, terhü chüketuo la ketsü puo khou pie Israelko kieshü, sidi puoe uko krüta chü di kijüthouko geinu uko ze tsur. 28Puo uko ki, “A siemedzilie; Jihovae nie ngumvümia Moabko pie nie dzie nu shüwate.” Süla ukoe puo siemedzi tsu, di ukoe Moabmiako Jordan nu cieprayakezha thechüko lie phrelie, uko mia puo bu rei pralie mo. 29Süu va ukoe Moabmia mia nyie ker geiwa, süko pete rei themia kekuo kethepfumia phre, miapuorei talie mo. 30Sidi sünhie Moab penyüpie Israel khroshülie. Sidi cie hiethetha we kijü nu noune bu balie.
Shamgar
31Ehud sie Anat nuou Shamgar sierlie, di puoe thuwhuosei puo pie Filistinmia krie sorou dukhriwa. Puo rei Israelmia shüphrashü.
Currently Selected:
Capiko 3: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More