Capiko 4
4
Debora mu Barak
1Ehud se sie, Israelkoe Jihova mhinguki mha kesuo chü lata. 2Süla Jihovae uko zepie Hazor nu di keba Kanan Kediu Jabin dzie nu shüwa. Puo rüpfhünuo mhokezhau Sisera, süue Haroshet-ha-goim nu ba. 3Jabin-e thegi bagei krie thepfü ba mu puo zho suo se di cie mepfü Israelko pese vor, süla Israelkoe Jihova ki kekhruo cha mu meloshü.
4Siro sükisü Debora, Lapidot kimiapfü siedzekesi chü di Israel capi chü ba. 5Puoe Efraim kijüthou rüna nu Rama mu Bethel unie donu kukuobo puo khro baya, sidi Israelko bu puo capi pfhü puo ki khorya. 6Puoe Naftali nu keba Kedesh rüna nu Abinoam nuou Barak kelieshü di puo ki, “Jihova, Israel Kepenuopfüe n ki puya, ‘Tuo volie di Naftali mu Zebulun unie themia nyie ker ze n salie di Tabor Kijüthou gei volie. 7Sitse ae Jabin rüpfhünuo mhokezhau Sisera meshü ze parshütuo, sidi puo bu puo kierbageiko mu rüpfhünuo krodi ze par Kishon Rüu nu shü di khapie n dzie nu shütuo,’ ” sishü.
8Barak-e puo ki, “No a ze votuo üro a votuo, derei no a ze vo lho üro a volie lho.” 9Sitse hapfü sie, “A n ze votuo, derei noe hakemhie di votuo üketa la, kuokelie theza keviu n vie chülie lhote, Jihovae Sisera pie thenumiapfü puo dzie nu shüwatatuokecü la.” Sidi Deborae sie di Barak ze Kedesh nu kho. 10Siro Barak-e Zebulun tsiu Naftali seyieko kiepie Kedesh nu shülie mu terhümiavimia mia nyie ker pie puo salie di kho, mu Debora rei puo ze kho. 11Tsiu Kenmia#4:11 Ibri Kain geinu kevor. Heber-e vo Kedesh khieki Elon-bezananim nu keba phriebo-u khieki nu puo razhü chülie. Puoe Mosa meiu Hobab yie Kenmia kekreiko khawa di tuo kreita.
12Abinoam nuou Barak-e Tabor Kijüthou gei khota ükecü Siserae silie tse, 13Siserae puo thegi bagei kriethepfüko mu puo themiako pete kieshü, di Haroshet-ha-goim nunu Kishon Rüu nu vo.
14Sitse Deborae Barak ki, “Sielie, Jihovae n ze tuotuo, mu thie Jihovae Sisera penyüpie n dzie nu shüwatuo,” sishü. Süla Barak-e Tabor kijüthou geinu themia nyie ker ze di puo siemedzi tsu. 15Siro Barak-e puo rüpfhünuo ze uko bievü tse, Jihovae Sisera mu puo bageiko tsiu themiako pete chüpie kebvükebie phrewa; siro Sisera puo bagei geinu kerlie di pephi tata, 16derei Barak-e bageiko mu rüpfhünuoko whuo zo tsu Haroshet-ha-goim tso. Sidi Sisera rüpfhünuo krodi pete geiwa, miapuorei lhieshü mo.
17Siro Siserae pephi tase Kenmia Heber kimia Jael pfheki nu lelie, kekreilamonyü Hazor nu Jabin Kediu mu Kenmia Heber kinumiako donu kezekevi bakecü la. 18Jael-e Sisera ze kesetuoü par di, puo ki, “Lerliecie, a niepuu, michie hiecie,” ishü. Süla puoe tuo lelie, sitse Jael-e pfhe pie puo whewa. 19Siru puo hapfü ki, “Dzü pie a bu kriecie, a terhüte,” isi. Ru puo chüzhü nu mithunudzü rupie puo bu krielie di puo whe lawa. 20Siro puoe hapfü ki, “No pfheki kikha ki thalie, di themia kehoupuo vor n ketso di, ‘Mia huo hanu ba me?’ iro, no ‘Molie,’ iwacie,” sishü. 21Siserae puo kenyiepfü ze pesou phi zhüta tse Jael-e pesikhuoi di puo pfheki kezhie seithie mu seivü pielie di pie puo nyieti nu zhietsu kijü tsowa, sitse puo siata. 22Tsiu Barak-e Sisera whuo vor tse, Jael-e par puo ze kese di puo ki, “Haki lerlie, no puo pfhü ketuou pie n pekieshütuo.” Süla puoe le ru Sisera sü kijü nu siazhü di ngulie, mu pfheki kezhie seithieu rei puo nyieti nu zhiepfüzhü.
23Sünhie Ukepenuopfü Israelko bu Kananmia kediu Jabin mho kuokelie khashü. 24Ukoe Kanan kediu Jabin peka tseiwa kemochie puo pesüpemvü di kuo miemieta.
Currently Selected:
Capiko 4: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More