Capiko 2
2
Bokim nu Jihova Dielieu
1Siro Jihova dielieue Gilgal nunu Bokim nu khor di Israelko ki, “A Ijipt nunu nieko ze par di a khapie nie puonuoko tsütuo üdi rüsekeshü kijüu nu nieko ze vorshü. Sidi a nieko ki, ‘A nieko ze dietseidiekhokeshüu mhakipuorei varhuowalie lho. 2Siro niekoe rüna hau nu kelhouko ze dietseidiekho puorei chülie lho; niekoe uko ruosuobako bietshebietshawatuo.’ Derei nieko kiüdi a pfhe ze mo haita ga? Nieko kedipuo chüwata ga? 3Süla a tsie nieko ki puya, a nieko mhodzünu uko whuoshülie lho uko bu nieko ngumvümia chü, mu uko rhuoko bu nie la kebie puo chü tuotuo.” 4Jihova dielieue mha süko Israelko ki pushü tse, themiako kra shiekhouita. 5Sidi ukoe thechü süu za pie Bokim#2:5 Süu Krayakezhako. chüta, mu uko süu nunu Jihova ki ruosuo chüshü.
Joshua Siaketa
(Jos 24:29-31)
6Süsie Joshua Israelko khashüwa tse, ukoe u thetse nu kayie kijü pevielietuoü vota. 7Joshua kerhei chie mu puo ze kelhou phichüko, Jihovae Israel la mhachükeshü pete si mu ngukecüko kerhei ki we themiako Jihova lie chü vor. 8Siro Nun nuou Jihova kituou Joshua cie krie puo di ker lhoulie di siata. 9Sidi ukoe Gash kijüthou pesotsa, Efraim kijüthou rüna puo kayie vie Timnat-heres nu puo khruwa. 10Mu thephou süu sia theketa sie, Jihova si kemo morei puoe Israel la mhachükeshü si kemo phou kesa puo sierta.
Israel-e Jihova gei Dietho Moketa
11Siro Israelkoe Jihova mhinguki mha kesuo chüta, sidi uko Baalko lie chü tuota; 12mu Ijipt nunu uko ze parkeshü Jihova uko puonuoko Kepenuopfüu khawata; sidi ukoe uko houpfü keba themiako rhuo kekreiko medzi tsiu nerhutsu süko rüsuota, sidi ukoe Jihova nou va kemeyiewata. 13Ukoe Jihova khawa di Baal mu Ashtarot lie chüketa la. 14Jihova nouyieu Israel gei tusieketa geinu puoe uko khapie mhavakecüko dzie nu shüwa, sidi süko bu uko vie vata, puoe uko zepie ngumvümia uko houpfü kebako dzie nu shüwa, sidi ukoe uko ngumvümia mhodzü thalie kenjüta. 15Jihovae phrakeshü tuoi, Israelkoe kehourapuo terhü chü pra zorei, Jihova dzieu uko petsou mu uko penyüwawata; sidi ukoe kemezhie seta.
16Sitse Jihovae uko donu capimia pesieshü, sidi sükoe mhavakecüko dzie nunu uko kelashü. 17Sizorei Israel-e uko capimiako die rei rünyü mo; sidi terhuo kekreiko ze kepieü di nuketsu uko rüsuotuota. Ukoe uko puonuoko ze kevor chau nunu rürei mhata, Jihova diekhakeshüko dieze chü mota, ukoe uko zho medzi mota. 18Jihovae capimia pesieshü uko tsü ro, puoe capiu zetuo, mu capiu rhei ketuo chie uko ngumvümia dzie nunu uko kelalielie vor; mia uko pese mu kemvü chükecü la ukoe melokeba Jihovae sishü di puo nou mezhiekelie la. 19Derei capiu siata tse, ukoe rürei lata di terhuo kekrei medzi mu süko lie chü, mu nerhutsu uko rüsuo di, uko puonuoko ki rei suokuota. Ukoe uko nou kekhrü mu mha kesuo kechüko nunu rüdi mvüta. 20Süla Jihovae puo nou kerüpeu tu sier Israel petsouta di, “Seyie haue a uko puonuoko ki dietseidiekho khakeshüu varhuokewa mu a pfhe rünyü moketa la, 21a rei tsie yawinu Joshua siaketa ki seyie kro puo whuowa mokebako uko mhodzü nunu whuolie lhote.” 22A süko geinu Israel dojü di, uko puonuoko Jihova chau ze kevor tuoi süu zelietuo mo mo shi ikecü silieketuo la. 23Sidi Jihovae seyie süko whuo mhawa mo di uko khapie bata, mu puoe uko khapie Joshua dzie nu rei shü di süko whuokewa chü mo.
Currently Selected:
Capiko 2: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More