Isaya 7
7
Isayae Kediu Ahaz Chü Kethepfukeshü
1Uzia nuo Jotham, Jotham nuou Ahaz-e Juda mho kedi chü keba ki, Aram kediu Rezin mu Remalia nuou Pekae Israel kediu Jerusalem whuotuoü khor, derei puo whuolie mota. 2Siro Siriae Efraim ze kezhawhe ketha David kiue sishü tse, Ahaz mu puo themiako melou#7:2 Ibri Puo melou. rüniepie ketsa nu seiboko teikhrie bu uko he keniekeshü tuoita.
3Sitse Jihovae Isaya ki pu di, no mu n nuou Shear-Jashub#7:3 Puoca Lhiekelieko puo la vortuo. nnie pra rüzie peso-u dzüyie thela ki Pfhekemenyi Lieu nu kevo chau nunu Ahaz ze kesecie, 4di puo ki hakemhie pushücie, Menuolie, sei mu zei balie, michie hie, siro mi bu thekecü do hanieha la n melou thachüta hie, Rezin mu Aram siro Remalia nuou nouyie thuo kemerie chü ba zo rei. 5Kekreilamonyü Aram-e Efraim mu Remalia nuou zelie di n ngukemvü mha kesuo rhü di sie, 6“Úko kho Juda petsou mu Jerusalem dathewa khe, sidi puo penyüpie u vie chülie di Tabil nuou bu sünu kedi chüshü khe iba;” 7süla Niepuu, Jihovae pucü:
Süu thalie lho,
mu süu chü vorlie lho,
8Aram tsüu sü Damaska,
mu Damaska tsüu sü Rezin zo eru.
(Cie hiesorouepengou nu Efraim-e pro phata di themia chü ba motatuo.)
9Siro Efraim tsüu sü Samaria,
mu Samaria tsüu sü Remalia nuou zo.
Niekoe peletsa thalie moro,
nie mhakipuorei thalie lho zo.
Isayae Immanuel Dze Kepu
10Jihovae Ahaz ki pu la di sie, 11Jihova nie Kepenuopfü ki zasi puo chalie; süu bu Sheol kesou de soulie morei teigei de rükrielie. 12Derei Ahaz-e pu di, a chalie lho, mu a Jihova kedolie lho, si. 13Sitse Isayae sie, “Siro rünyüliecie, David kiu! Nie themia keyhukecü we mhatho mo üdi, nie Ukepenuopfü rei keyhuya me? 14Süla Niepuu puo thuo zasi puo pie nie tsütuo. Harie, rüümiapfü#7:14 Gk Phousepfü. puoe nuonipfü tuote mu thepfunuomia puo penuoshütuo, mu puo za thopie Immanuel chütuo. 15Puoe kesuou melie mu keviu keda si kepar ki, puoe thunudzükhie mu mepfhidzü cütuo. 16Kekreilamonyü u nuoyoe kesuou melie mu keviu keda silie kemonu, noe prei keba kedinie kijü ruotatuo. 17Jihovae no mu n themiako tsiu n puotsanuo kiu gei, Efraim-e Juda ze kekhoketa sie vor mo zoluokecü teisozha puo, Asiria kediu ze vorshütuo,” sita.
18Sünhie Jihovae Ijipt nu kerüboko nu keba teizieko mu Asiria kijü nu keba mepfhi la mesushütuo. 19Sitse uko pete vor koure kesouko nu mu tsiekrie kerükoko nu mu ronyhoko pete nu mu perituoko pete nu batatuo.
20Sünhie Jihovae Asiria kediu ze di Kerü lutsakhie nu tsüpfü nyiekelieu pie u tsütha tsiu u phimie thiewatuo, mu süu u tiemie rei thie juwatuo.
21Sünhie mia puo thuü yopuo mu tekuo kenie perituo, 22mu sükoe thunudzü kha phikeshü la, puo dohi cütuo; kijüu nu lhiepie keba kehoupuorei thunudzükhie mu mepfhidzü cütuo.
23Sünhie khubero nyie puo keba raka shekel nyie puo ma kijüko, huphienuo mu zohunyho chütatuo. 24Mia puo theü mu theütsie pie di sünu vortuo, kijü pete huphienuo mu zohunyho chütaketuo la. 25Siro kejü pie cieyakecü kijükhru peteko nu huphienuo mu zohu keprei la nie vo motatuo; sidi peri bu tuo mu tekuo bu kedekecü kijü chütatuo.
Currently Selected:
Isaya 7: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
