Mhakechüko 27
27
Paul Rom nu Kevo
1Süsie hieko bu rou geinu Itali nu voketuo pepilieta tse, uko Paul mu kediemia kekrei huo sa pie Julio ükecü kriemhokezhau Agustu Kro-u nu Rüpfhünuo dzie nu shüwa. 2Hieko Adramutium rou puo gei pfülie, süu Asiatsa dzükezha khie rou rüleichüko nu votuo üzhü; sidi hieko tuoshü, sükisü Thesalonia nunu kevor Makedoniamia Aristarka rei hieko ze tuo. 3Siro süsienhie hieko vo Sidon tsolie; mu Julioe Paul gei viya mu puo bu vo puo zeko ze keselie kevi chüshü di rüleilie. 4Sünunu ta lashü derei teikhrie hie petsouketa la, hieko rou thu kijülote Saipras khrotsatie merhie vo. 5Sidi hie rou thu se Kilikia mu Pamfilia mhodzütsa kezhü dzükezha pfüthese Lisia kijü Mura nu vorlie. 6Sünu krie mhokezhaue Alexandramia rou Itali nu vortuo ükeba puo ngulie, süla puoe hie bu süu gei pfülie. 7Hieko zha huo rüli phi di rou thu vozhü mu re se di thu Knida mhodzünu volie, derei teikhrie hie petsouketa la tuo sashülie kenjüta di hie rou ze Kreta khro merhie zo Salmone mhodzünu vota. 8Hie kemezhie phi di dzükezha khie merhie vor Lisia nadiu kepenuoki Kenei Rüleichü ücüu tsolie.
9Puotei kekra pevowata mu dzükezha rüve chükecü kemichie nyita, Kemevonyi teiu rei vota, süla Paul uko tarho, 10di sie, “Kezhako, úko rüve tsieu va kemichie se tsiu ka rei philie vi, siro úko mha pfüketuoko mu rouu zomonyü uphou rei sa katalie vite,” sishü. 11Derei kriemhokezhau Paul-e pukeshü dieu ki rei rou mhokezhau mu rou niepuu die zeta. 12Siro rou rüleichüu nunu teisei teiu pevoketuo vi zo mota; süla themiako pete khre rei tuo lashü di Foiniko nu volie di sünunu teisei teiu pevoketuo u nei phreta. Süu pesopekhro valie kevi Kreta nu rou rüleichü puo.
Dzükezha nunu Khriedi Dzükelie
13Pekhrotsa nu teirükhrie zaza vor mu themiako u kele mhie volieketuo medo di uko rou phreilie di rou thuse Kreta khie merhie vozhü. 14Derei pecha kemonu Kreta nunu Pesotsa Khriedi ücüu tsurta. 15Sidi süu vor rouu heta, mu rou thu teikhrie petsoulie kenjüta tse, hie süu khawa di teikhrie bu rouu hepfü tuota. 16Sidi kijü rüchütsokemo Klauda#27:16 Leshü kewe huo nu Klauda iya. khro kinu zie se di rou kecüyo pha kemeteipie bawa. 17Sitse uko süu teshü se sierlie di rou kezhau pha kemeteilie, siro uko rouu vo Sirti nu huocanyo thukewa prei di rou pfheu lhe kerünuo tsurwa, sidi teikhrie bu rouu hepfü tuota. 18Siro khriediu rükhrie ba zota tse süsienhie uko rouu geinu mhanya huo keta kelhou sedevüta, 19si ba zha se nhie u dzie pie rou gei mhanyako keta kelhouta. 20Siro hieko zha kekra niaki rei themvü rei ngu mota mu hie he petsa moketa la hie rheikelie puorei merü mota.
21Siro puotei kecha themiakoe mhacü mo di tuoketa la Paul uko donu sie thalie di, “Themiako, nieko a die ze di Kreta nunu rou bu tuoshü mo ücüwe mha kepeka mu pejükewa hako chü molietieciü. 22Derei a tsie nieko bu thepfulienu puya, nieko mia puo kerheiro rei pevowalie lho; rouu rübei pekakewa zotuo. 23Kekreilamonyü a puo vie mu puo rüsuoyakezhau Ukepenuopfü dieliemia puo n zhü vor a khieki thalie, 24sidi puoe sie, ‘Paul, michie hiecie; no kediu mhodzünu vo morosuo; mu ketho zo, Ukepenuopfü n ze di rou gei ketuoko pete kerheiro kelashüte,’ si. 25Süla thepfuliecie, themiako, kekreilamonyü a ki pukeshü tuoi chülie zoketuo a Ukepenuopfü pele tou ba zo. 26Derei úko hepfü dzükezha khie kijü rüchütsokemo huora vo zotuo.”
27Siro teizeizha keredia zhü khriediu bu hieko hepfü Adria dzükezha nu vota, mu khisoteiluo ki roukethukoe kijü penuo votazhü nhiecü leta. 28Süla uko keropie mha kemesi puo khelie di dzü kesou mejü ru thu krie di mepfü bacü ngulie; süsie sa za phi di mejü lashü ru thu hiethepfü zoketa ngulie. 29Sitse hieko rouu vo tsiekrie huo thukecü preita, süla uko roucawi dia pie rou sietsa kheshü di teiso mengu kelho chü bata. 30Derei routhuko rouu geinu taketa le di rou kecüu petepie dzü nu shülie di rou mhodzütsa rei roucawi huo kheshüketuo meviva bata tse, 31Paul sie kriemhokezhau mu chüpahiko ki, “Themia hako rou gei ba zo kemosie, nieko kelalie kenjü,” sita. 32Süla chüpahiko rou kecüu khepie keba roko dathewa di süu petawa.
33Siro teisotie ki Paul sie uko pete bu kecüca huo cülienu di sie, “Nieko tsie ketso zha kerediako kecüca puorei cü mo di tuote. 34Süla a nieko bu mha huo cülienuya; rhei balieketuo la nieko süu cülie; kekreilamonyü nieko tsü geinu nie thaprü yopuorei pekawalie lho.” 35Siro puo hau pukeshü sie, puo niekhrüda chü pielie di uko pete mhodzü nunu kethezie khapie Ukepenuopfü tsüshü di süu bietshiepie cülie. 36Sitse uko rei thepfulie mu uko pete rei kecüca huo cülie. 37(Hieko rou gei ketuoko pete kesa mia krie kenie di hietheniesorou.) 38Siro uko pete mhacü chüsechülieketa sie, thoulha pfüketuoko pete kelhoupie dzükezha nu shüwa di rouu pie chü kemedzalie.
Rou Suoketa
39Teiso parlie tse, ukoe kijüu silie mota, derei dzükezha khietsatie kijü rükou puo ngulie di, chülie vi ro rouu thuse sünu lekelie leta. 40Süla uko rou gei roucawi khepie kebako dathepie dzü nu shüwa, süsie routhusei phapie keba keroko phreishü; siro rou mhodzütsa pfheu lha kerükrieshü di teikhrie bu rouu hepfü pedzü dzükezha khietsatie va vozhü. 41Derei rou vo ketsie puo#27:41 Gk Dzükezha kenie nu thechü iya. thuta mu rou mhodzütsa mapfülie di kelelie suota, tsiu rou sietsa dzü rüpfhü kereu bu hetshehetshawa. 42Süki chüpahikoe kedieko bu dzüvü puo khie pra di tata molieketuo la uko pete dukhriwaketuo rhüta. 43Derei kriemhokezhau Paul kelalie nyü di uko bu uko mharhüu chüketuo khawata; sizomonyü puo themiako dzüvülie kevi peteko bu kelie di kijü keso nu pralienuta; 44mu kekreiko bu melako morei rouu ketsa coko geinu pralienuwa. Hamhiei peteko rei kru di keso nu pra phrelie.
Currently Selected:
Mhakechüko 27: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
