Mhakechüko 28
28
Paul Malta nu Kevo
1Hieko ta sünu pralie tse, kijü rüchütsokemo süu üse Malta ücü silie. 2Siro sünu keba khenumiako hieko gei vi phishü. Siro teirüta di meku phiketa la uko mi chüpie hieko bu peguo. 3Süki Paul rei sei khro puo pie vor mi mho shü tha ru mi kele ze tinyhü puo rüka par puo bou reipfülie. 4Süki khenumiako tinyhü hau, puo bou reipfükelie ngushü di sie huoniehuo ki, “Themia hau mia kedukhrimia puo toute, dzükezha nunu puo se kelashü zorei puo bu rheilieketuo theruo we tuo mote,” si. 5Derei puo khunuo süu kegepie mi nu shüwata, mu puo gei mhapuorei mo zo. 6Uko puoe rümie mha zo partaketuo morei tetsu siazhütaketuo le, derei pfhe zo tha rei puo gei mhapuorei kreita mokecü ngu tse, uko kele rüdi lata di, puo üse terhuomia puo üta.
7Siro thechü süu kepenuoki lie kro puo kijü rüchütsokemo sünu rüna peyuu Publio ükecüu lie, puoe puo nei siei di hieko zelie mu zha se hieko puo so chü. 8Süki Publio-nuo puou ruki mu thezie buo di suo phizhü. Paul vo puo la chashü mu puo dzienie pie puo gei shü di puo chü keshürhoshü. 9Mha hau chüketa sie, kijü rüchütsokemo nu kechükenyümiako ze vor mu süko chü keshürholie. 10Siro uko mha kekra pie hieko tsü, tsiu hieko rou ze tuo lakeshü ki, hieko rüve la rei se morokesuo pete pie hieko tsü.
Malta nunu Rom nu Vorkelie
11Siro khrü se sie nu hieko Alexandra nunu vor keba rou puoe puo za Nuobinie üdi thukepfü puo teisei ki vor kijü rüchütsokemo hau nu rülei kebau gei pfülie. 12Sidi hieko vor Sarakus tsolie mu zha se sünu bata. 13Süsie hieko rou ze rüwhi vo Rhegium tsolie. Siro süsienhie pekhrotsa nu teikhrie puo rükhrie vorlie, mu hieko bu zha kenie nu Puteoli nu vorlie. 14Mu hieko sünu kepelemia#28:14 Gk Siezedzürie. huo ba di ngulie ru hieko bu zha thenie uko ze bashünuta. Hai di hieko Rom nu vorlie. 15Rom nu keba kepelemiakoe hieko vorkezhü dze silie di Apius Lhithochü mu Rüsoki Seko nu ketso vor di hie zelie. Süko ngushü tse, Paul Ukepenuopfü tshe mu thepfu reilie.
16Süsie hieko Rom nu vor tsolie tse, chüpahimia puo bu Paul pfhe baketuou thoü puo bu puo ki krei di balieketuo chüshü.
Paul mu Rom nu Judamia Krütako
17Siro zha se sie puoe Judamia krütako kie kengulie. Sidi uko vor kengulie tse puo uko ki, “A kezeko, ae u themia kepetsou morei u puonuo zhoko kepetsou puorei chü mo zo ürei, Jerusalem nunu a telie di a pie Rommia dzie nu shüwate. 18Siro uko a ketsokewa sie Rommiako a kha lashüwa nyü sie, kekreilamonyü uko a bu sia kezhü mhatho puorei ngulie mo. 19Derei Judako hau chü mvüketa ki a a seyieu pejoketuo puorei ba mo zo ürei, a Kaisar ki a nyie kecüketuo cha molie kenjüta. 20Hau la a nieko kieshü di nieko ze kerüchüketuo leliete, Israelmia kemerüu la thegiro hau pie a phapfütuo zocü la.” 21Sitse uko sie, “Hieko zowe Judia nunu n dze leshü puorei ngulie mo, siro u kezeko miapuorei thedze hau pukeshü morei n dze pu pesuokecü puorei si mo. 22Derei hie n kinu n kele puo sishü nyü ba, kekreilamonyü lukihaki themiako hau zeyakezha kro-u dze pu pesuo phi phre tuoketa la.”
Paul Rom nu Zhapu Kechü
23Süla uko khunhie puo vor puo ze keseketuo zhau chielie tse sünhie uko themia kekra puo bayakezha kiu nu vorlie. Siru puo khise nu vo theva ketso Ukepenuopfü kedi dze pu menuopie uko kieshü, mu puo uko bu Jisu dze si toulieketuo la Mosa zho-u nunu mu siedzekesiko leshüko nu kepu cako vatsha menuoshü. 24Siro puo dieko la huomia bu pelelie derei kekreimia huowe pele mota. 25Sitse uko thuo uko donunu kedierhe mota di tuota, süsie Paul sie mha pu sa di: “Kemesa Ruopfüu thiedzü Isaya siedzekesiu tie nunu nie puonuoko ki pu toupie zhü zo,
26“ ‘Themia hako ki vo di pushüliecie,
nieko kerünyü we rünyütuo, derei mhakipuorei puocapuola silie lho;
nieko kemeho we mehotuo,
derei mhakipuorei lelie lho.
27Kekreilamonyü themia hako u melou rüvo tuote,
siro u nyie rei kenyiebite,
uko mhiko mhimiete,
sidi ukoe uko mhipie meho molieketuo la,
mu u nyie pie rünyü kelho la,
tsiu uko melou pie mha silie mu rüreilie di a bu uko chü keshürhoshü kelho la.’
28Süla Ukepenuopfü kelakelie dieu khapie Judakemoko ki shüwaketa nieko hau siliecie; uko rünyülie zotuo.” 29Puo hau pukeshü sie, Judako u thuo u donunu keprüli phi di tuota.
30Sidi puo ciete kenie puo thuo mia ki nyiekelie puo nu ba, di mia puo ki kevor kheko ze kese, 31siro puo thepfu se di Ukepenuopfü kedi dze pupie mia kie tsiu Niepuu Jisu Khrista dze pie mia petha ba tso mu miapuorei puo kha mo.
Currently Selected:
Mhakechüko 28: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
