Mhakechüko 26
26
Paul Agripa Mhodzünu Puo Mezhü Kepu
1Agripa sie Paul ki, “N thuo tsie we n mezhü pushülie rei vite.” Sitse Paul puo dzie chasie di puo thuo puo mezhü pukeshü hamhie:
2“Kediu Agripa, a thie n mhodzü nunu Judako a pejoketako pete la a mezhü pushütuo ükecü a nei phi tha, 3noe Judamia zhoko mu dienyako si pevi phi ba, süla a n bu shügeshühiepfü di a die rünyüshünu chaya.
4“Judamia pete rei a khriesaki nu a kelhou rüli sü si phre, sietsenu a themia donu Jerusalem nunu lhou sier. 5Uko hadzütho nu a rüli si phre ba, ukoe ketho-u putuo üro, ae sietsenu nu uko nanyü nu kepecütho Farisimia puo chü di lhou. 6Mu a tsie haki tha di mia bu a nyie kecütuo üketa ha Ukepenuopfü u puonuoko ki phrakeshüu gei a kemerü baketau la zo, 7mu u seyie kerekeniekoe süu ngulieketuo merü di teizeiteiso u teitsochü Ukepenuopfü rüsuotuoya zo. Mu harie kediu, kemerü hau la Judako a pejo thate! 8Kiüdi nieko haki kebakoe Ukepenuopfü kesiamia chü perheilieya ükecü pelelie kenjüte mu?
9“Ketho, a thuo zorei mha kekra nu Nazaret#26:9 Gk Nazor-u. Jisu petsou sie zo. 10Mu sükemhie di a Jerusalem nu chü zo; ae zievokezhako kinu kekuo chalie di kemesako kekra tepie kedie chüwa; mu mia bu süko dukhrikecü ki, a rei a medota zo. 11A va kekra sinagog nunu uko pechü tsiu uko bu uko kepeleu khawaketuo la thehiechü; mu a süko ngu a nou rüpethorcüpfü uko pechüketuo la uko pfhü mia rünako nu rei vo zo.
Paul Puo Nou Kedikelie Dze Kepu
12“Mha hau chüketuo la a zievokezhako ki kekuo mu chülie kevi chalie di Damaska nu kezhü, 13siro kediu, a rüvecha nu khinhieluo niaki ki rei ziekuokecü kezie puo teigei nu tsur a mu a ze ketuoko khie lutsahatsa vata. 14Sidi hieko pete te kijü tsuta tse, mhapfhe puo Ibri#26:14 Süu, Aramaik. die nunu ‘Saul, Saul, no kiüdi a pechüpenyüya ga? Seithie mesükecü n thuo n pechü keba zo, idi a ki kepu si.’ 15Sitse ae sie, ‘Niepuu no supuo ga?’ ishü. Süki Niepuu sie, ‘A Jisu, no puo pechüpenyüyakezhau. 16Derei no sielie, di thalie, kekreilamonyü a thie n pengukeshü, n bu a kenguko mu thiesie n bu a nguketuoko zhapu chüketuo la n kedakelie zo. 17A n ketsepie n themia mu Judakemomia ki shü zhükecüko dzie nunu n kelashütuo, 18n bu uko mhi chü kemhirhopie kezeiu nunu kezieu ngulieketuo mu Satan kekuou dzie nunu rürei Ukepenuopfü kekuou nu vorlie, sidi uko bu u kepeleu pie a gei balie di kephoumako va lalie di chü kemesalieketako donu u tha nyilieketuo la.’
Paul Puo Mhatho Dze Kepu
19“Süsie, kediu Agripa, a teigei ziemho dieze chü mvüta mo zo, 20derei a therieu Damaska nu mu Jerusalem nu süsieu Judia kijü pete nu, tsiu Judakemoko ki rei sa idi uko bu thenou rürei la Ukepenuopfü ki vorlie morokesuo mu thenoukedilieta ükecü u kelhou nunu pie pekieshü morokesuo dze pu pethashüte. 21Mha hauha la Judakoe rüsuokiu nunu a telie di a dukhriwatuo üsie zo. 22Derei thie ketso Ukepenuopfü a khruohi tuo zocü la, a tsie haki ketha kecümia ki rei kezhamia ki rei zhapu chüzhie, mu siedzekesiko siro Mosae pukeshü chü vorketuo kepuu sie die kekrei puorei pu mo zo; 23süu Khrista bu kemezhieketuo, sidi kesiako donunu rheisielie kerieu chü di kezieu pie Judako mu kemoko pesishüketuou zo.”
Paul Agripa Bu Pelelienu Chakecü
24Hai di puo mezhüko pu ketha nu, Festae shiekhoui di sier, “Paul, no nyate! Leshü phrüthorcü la n chü penyawate,” sita. 25Derei Paul sie, “Harie, therhukepfütho Festa, a nyata mo! A ketho mu kemecie die puya. 26Kediu thuo rei mha hako si ba zo, a puo ki a kethechie mo di pu tha zo; sizomonyü die hako puoe si kemo puorei mo zo ükecü a le tou tha zo, hako mia kejüra nu chü mo zocü la. 27Kediu Agripa, no siedzekesiko peleya mo? No süko peleyacü a si ba.” 28Sitse Agripa sie Paul üse, “No hai zo di a bu Khristamia chü mhailie thenyüsieya me?” 29Sitse Paul sie, “Zi rei morei a Ukepenuopfü ki a mezhiemelo kethau sü, n rübei monyü thie a die rünyü keba pete bu rei a khepfü kebau mhieta zo kemosie, a mhie phreta nyü zo,” sita.
30Sitse kediu sie thata, siro ahng mu Bernikapfü tsiu puo khie kebako pete siethata; 31sidi uko tuoprakezhü ki huoniehuo üse, “Themia hauha sia kezhü morei kedie chü kezhü mhatho puorei chüwa mo zo,” sita. 32Siro Agripa sie Festa ki, “Themia hauha kediu bu puo nyie kecütuoü chata kemosie puo kha lashüwatalie vi zo.”
Currently Selected:
Mhakechüko 26: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
