Mhakechüko 25
25
Paul Kaisar ki Puo Dienya Kecha
1Siro Festae rünau nu vor tsokelie zha se sie, puoe Kaisaria nunu Jerusalem nu kho, 2Sünu zievokezhatho-u mu Judamia pehüko Paul pejokecü die pie puo ki pushü. Uko puo ki cha 3mu Paul petsoukecü die puo pu rükhruo di puo ze Jerusalem nu vorshünu chata. Ketho nu ro uko puo chadze ba di puo dukhriwaketuo rhüpie ba. 4Sitse Festa sie uko ki Paul-e Kaisaria nu kedie chü ba mu puo rei pecha kemonu sünu votuo ükeba pushü. 5Puo sie, “Süla nieko krütako a ze kelie mu puo mha huo chü kekrüwakecü nyi ro, sünunu uko bu puo pejoliecie.”
6Siro puo zha ker kezie uko ze bakeshü sie Kaisaria nu la keta, süsienhie puo dienya bau gei balie di mia bu Paul ze vornushü. 7Sidi puo vorlie tse, Jerusalem nunu kekerko puo houpfü thalie di mha kekra pupie puo pejota, sirei ukoe süko zhapu khashülie kenjüta. 8Paul-e puo mese pu di sie, “A Judamia zho-u morei uko rüsuokiu morei Kaisar rei kepetsou mhatho chü chie mo.” 9Derei Festa Judako nei chü nyü di Paul ki, “No Jerusalem nu kho di a mhodzünu n nyie kecüketuo n medo me?” 10Sitse Paul sie, “A Kaisar dienya bau mhodzünu tha zo; mu hau nunu a nyie kecükelie mese zo. No n thuo zorei a Judamia gei kekrükecü mhapuorei chü mo zocü si ba zo. 11A thezho-u varhuo liro mu sia kesü mhatho huo chüwata üro, a sia rei mvü mo zo; derei a pejo ketha die hakoha puorei ketho mo ücü sie miapuorei a khapie uko dzie nu shüwalie kenjü. A Kaisar bu a nyie kecütuo.” 12Sitse Festae sie puo pehüko ze kerüchü di sie “No Kaisar bu n nyie kecüketuo chate, süla no Kaisar ki votuo,” sita.
Paul Agripa Mhodzünu Die pukeshü
13Siro zha huo sie kediu Agripa mu Bernikapfü unie vor Kaisaria nu Festa kelu. 14Unie zha kekra sünu bakelie sie, Festae Paul dze pete pu menuopie kediu kie di, “Haki Felikae mia puo khapie kedie chü ba; 15siro a Jerusalem nu kho tse, Judamia zievokezhako tsiu phichüko puo ngukemvü die puta mu a bu puo pejowanu chata. 16Derei a sie uko ki mia puo pejo kesie ki puotei pie puo tsüshü di puo bu puo pejoketako mhodzü puo mezhü pulieketuo khashü mo di puo pie mia dzie nu shükewa u Rommia zho mo üshüwate. 17Sidi uko vor hanu kengulie tse, a puotei puorei kehiewa mo di süsienhie a dienya bau gei balie di mia bu themiau ze vorlienushü. 18Süki puo pejokecüko siethalie di puo pejovü, derei puo kekrükewa#25:18 Leshü kewe huo nu mhapuorei se. a le keba kemhie puorei se puo pejolie mo. 19Sirei puo pejokecü pete rei uko thuo uko nanyütsatie dze nu mu siaketa Jisu ükecümia puo, Paul-e puo üse rhei ba ükecü dze rübei pu keprüli. 20A mha hau la thedzeko si kemenuopie mhapuorei pepilieketuo chülie kenjüta, süla a sie Paul ki puo bu Jerusalem nu vo di puo nyie kecüketuo puo medo tuo mo mo shi di ketso. 21Derei Paul sie puo khapie haki ba zonu mu Kaisar bu puo nyie pepituo üdi chata, süla a puo ketsepie Kaisar ki keshü mhodzü mia bu haki puo pfhe ba zolienu die khashüwate.” 22Agripae Festa ki, “A rei themia süu die sishü rei vi zo.” Ru puo sie, “N bu sodu puo pfhe sishütuo,” sita.
Paul Agripa Mhodzünu Kevor
23Süla süsienhie Agripa mu Bernikapfü unie kerütso phi mu chüpahi mhokezhako mu rünau nu pehümiako ze di mia vor kehou kebachüu nu lerlie. Süsie Festae mia bu Paul ze vorlienu diekhashü ru mia puo ze lershü. 24Sitse Festa sie, “Kediu Agripa mu hanu vor kebako pete, nieko themia hau ngu batuo, puo la Judako pete, haki kebako mu Jerusalem nu kebako, puo dienya se a ki vorte siro uko pete rei puo bu rhei sa tuo zhü mo üdi pheshie phrete. 25Derei ae puo sia kezhü mhatho puorei chükewa ngulie mo; sidi puo kediu bu puo nyie kecütuoü chaketa la, a puo ketseshüwaketuo pepiliete. 26Derei a kezhatho kediu ki puo dze kedipuo thushütie shi lelie mo ba. Süla a puo ze vor haki kebako mu, kediu Agripa, n mhodzünu pekuo di bawe, sidi puo nyieu kega meho menuoshü di a bu puo dze mha huo thulie kevi chülieketuo la. 27Kekreilamonyü kediemia puoe puo pejokecü ca si tou di thu kemesa mo di puo ketseshüketuo a mhodzüki lelie mokecü la,” sishü.
Currently Selected:
Mhakechüko 25: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
