Mhakechüko 19
19
Paul Efesa nu Kevo
1Siro Apolo Korint nu keba ki, Paul pesotsatie nu rüve se Efesa nu vorlie, mu sünu puoe pethakeliemia huo bacü ngulie. 2Puo uko ki, “Nieko pelekelie ki Kemesa Ruopfüu ngulie me?” si. Uko sie, “Molie, hieko Kemesa Ruopfü tuo ükecü rei si mo.” 3Sitse puo sie, “Di siro nieko kikecü dzülu puo pfülie ga?” Uko sie, “Johan dzüluu zo.” 4Sitse Paul sie “Johan thenoukedikelie dzülu se mia dzülu khakeshü zo; mu puoe themiako bu puo sie vorkezhüu pelelienushü, süu Jisu zo,” si. 5Uko hau sikelie ki Niepuu Jisu za nunu dzülupfülie. 6Paul puo dzie chapie uko gei keshü ki, Kemesa Ruopfü uko gei vorlie, mu uko pfheneiü nunu mha pu, tsiu siedzedie rei puta, 7uko pete kesa mia kerekenie mese.
8Sidi puo sinagog nu le mu khrü se mese thepfu se di Ukepenuopfü kedi dze pu keti di mia hü phi. 9Sirei huomia u nou re mu pele mvü di mechü mhodzünu Chau dze pu pesuota, süla puo uko khawa, di pethakelieko ze teisonhie kepethayakezha Tiranus kiu#19:9 Leshü kewe huo nu Tiranus, khise keba kerepuokrü nu vo thehesie keba dia. nunu kerüchüta. 10Puo teicie kenie si bata, süla Asia nu keba Judako rei mu Grikko rei pete Niepuu dieu silie.
Skiva Nuonuoko
11Ukepenuopfüe Paul geinu ungomhatho rükrü zokecü kro puo chüshü, 12süki mia dziesüpfhe morei pfhenyhie se vo puo nyülie di pie kechükenyü chü kebako gei shü tse, süko shürholie mu kesuo ruopfüko rei whuolie. 13Sirei rüve rühou tuokezha Judamia themoumia kro puo Niepuu Jisu za se di kesuo ruopfü u gei tuoketako ki, “A Paul-e se petha tuoyakezha Jisu za se rüse zo di nieko ki pushü ho,” si tuota. 14Themia süko Judamia zievokezhatho-u, Skiva nuonuo thepfu theniekoe süsü chü. 15Derei kesuo ruopfüu sie uko ki, “A Jisu si, mu a Paul si; derei nieko suomia ga?” 16Sidi kesuo ruopfü puo gei tuoketau prou uko va, di uko penyüwa, mu uko penyü pesuothor pie uko bu uko phoulhuo mu rüzapfü di puo ki nunu tata. 17Judamia rei, Grikmia rei Efesa nu keba pete thedze hau silie tse, u ngopie mhapuochüta, mu hau geinu Niepuu Jisu za chü pezhakuolieta. 18Peleketa kekra rei chüwaketa mhathoko phra phreshü. 19Siro kemeduomia kekra u leshüdako se vor kengulie di mechü mhingu nunu thewata; mu süko ma le kesie rakachü nyie hiepengou mese. 20Sidi Niepuu dieu kuo süthede chü di kruo kechü sa vota.
Efesa nu Mha Kebvüketa
21Mha hako chüthekewa sie Ruopfüu Paul hüshü di puo bu Makedonia mu Akaya pfüthe Jerusalem nu voketuo rhülie. Puo sie, “A sünu vokelie sie, Rom rei sa meho morosuo,” sita. 22Süla puo kekhruohi kenie, Timothi mu Erasta, ketsepie Makedonia nu shüwa, sidi puo zowe zha huo Asia nu ba sata.
23Siro süki Chau dze la kebou petsa mota. 24Demetria ükecü, rakachü rükreimia puo, rakachü pie Artemis rüsuoki kechü rhithomiako la thelhi ketsapfü puo chüshü mo. 25Puo puo kezeko mu lhitho sükemhie chüyakezha pete kie kengulie di, “Kezeko, úko mhatho hau la mhanyiliekecü nieko rei si ba. 26Mu nieko si mu ngu bate, Efesa nu rübei zomonyü Asia pete khre rei Paul ücüu themia kekra hü mu se ketsi ze themia thuo rhikelie rhuoko üse terhuo ketho mo üdi pute. 27Siro mia bu u mhatho hau rhu moketa zomonyü terhuopfü Diana rüsuokiu rei ü mhaü moketa prei tsiu Asia nu mu kijü pete nu rüsuoyakezhapfü za pejüwatie.”
28Uko hau sishü tse u nou meyiepie mhapuochü shie di “Efesamia terhuo kezhapfü sü Diana.” 29Sidi nadiu pete nu bouübita; siro Paul ze rüveketuo Makedoniamia Gaya mu Aristarka unie telie di merhashü ze rüzhüchüu nu vota. 30Paul-e themia krodiu ki vo nyü sie, derei pethakelieko puo bu vo mvüta; 31Asia kijübou nu#19:31 Gk Asiako mia huo. kezhamia puo khriethomiako rei dielie ketsepie puo ki shü di puo bu rüzhüchüu nu vo hienuta. 32Süki mechükehouu bouübita; huomia shie di mhapuo pu mu kekreiko mha kekrei puo pu; themia kekratsa kedipuo la vor kengu ba shikecü ca rei si mota. 33Ru Judako huomia thuo Alexander khupie krodiu mhodzünu khashü. Sitse Alexander puo dzie chapie uko bu kemekrieta nu di themiako mhodzünu puo mezhü pu nyü sie. 34Derei uko puo Judamia ücü silie tse, bavüdo kenie mese pfhe puo chü shiekhoui di, “Diana sü Efesamia terhuo kezhapfü zo,” sita. 35Derei rüna kese kezhau themiako kekha zeiwa di sie, “Efesamiako, supuonie Efesamia rünae Artemis kezhapfü rüsuoki mu teigei nu teketsur miarhiu kepfhe ükecü si kemo ba ga? 36Miapuorei mha hako ü mo ükelie jü, siüliro nieko rei kemekrie bakelie mese mu meyhumezhie di mhapuorei chüta hie. 37Niekoe themia hanie rüsuokiu vie sekecümia morei úko rhuopfü thakecümia mo zo ürei unie ze haki vorte. 38Mhanuü Demetria mu puo ze mhachüyakezhako huomia gei dienya huo ba üliro mha süko pepiketuo la dienyaki siro capimia rei ba, mu sünunu kenyaliecie. 39Nieko sümho rei mha huo si sa nyü üro, thezho kehou nunu pepi morosuo. 40Si moliro thie kebvükeboukecü hau u pejotalie vi, kekreilamonyü kebouketa hau we puoca jü, u ketso kesie ki we keboukecüu pu kemesalie kenjütatuo.” 41Puo die hau pushü di kehouu bu lata.
Currently Selected:
Mhakechüko 19: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
