Mhakechüko 18
18
Korint nu Kevo
1Hau sie Paul-e Athen nunu Korint nu vota. 2Sünu puo Judamia puo Akila ükecü Pontu nu kelhoumia puo ze keselie, sümhodzü za kinu puo kimia Priskila ze di Itali nunu vor ba, kekreilamonyü Klaudiae Judamia pete bu Rom nunu tuotanuketa la. Paul unie mehotuoü vo, 3puo rei unie mhatho kemhie chüyacü la, puo unie ze bata, mu uko keze mhachü, uko pfhekichüyakezhamia phre zocü la uko keze mhachü bata. 4Süki puo sabat metsei sinagog nunu kerüchü di Judamia mu Grikmia hü phi.
5Sila mu Timothi unie Makedonia nunu vorkelie sie, Paul-e dieu pu thenou kenyü chü mia petha di Jisue Khristau zo ükecü pie Judako ki zhapu chüshü. 6Uko puo petsou mu puo thata tse, puoe puo pfhe kesou di uko ki, “Nie zie bu nie tsügeituo! A mezhü zo. Thie yawinu a Judakemoko ki votatuo,” sita. 7Süsie puo sinagog nunu tuota#18:7 Gk Sünunu tuota. di vo Ukepenuopfü rüsuoyakezha Tita, Justa ükecü Ukepenuopfü kepelemia puo kinu bata; puo ki sinagog khieki ba. 8Siro Krispa, sinagog nu krütau rei puo kinuko pete ze Niepuu pelelieta; mu Korintmia kekra Paul dieu kesiko pelelie di dzülupfülie. 9Khuzhü puo Niepuue ziemho nunu Paul ki, “Michie hiecie, derei die pu ba zolie mu kemekrie bata hie; 10a n ze tuo zo, süla miapuorei n bie pesuowalie lho, rüna hanu a themia kekra bakecü la.” 11Süla Paul teicie puo di puotie sünu ba di Ukepenuopfü dieu pie themiako petha bata.
12Sirei Galioe Akaya nu kezhau chükelie ki, Judako keze kenourhe di Paul teze dienyakiu nu vota. 13Uko sie, “Themia hau mia hüpie u bu Ukepenuopfü rüsuolienucü pu di thezho-u petsou tuote,” sita. 14Paul mha putuoü sie tse Galio sie Judako ki, “Dienya hau mha kesuo kechü morei kekrükecü chüwaketa puo üliro, nieko Judako nyie hau a rünyükecü mese zo, 15derei hau die kro puo mu theza kro puo mu nie thuo nie zho nunu keprülikecü puote ru nieko thuo meholietacie; a thenyie haicü ca nyü mo!” 16Puo sidi dienyaki nunu uko ketsewa. 17Sitse uko peteko#18:17 Leshü kewe huo nu Grikmia pete si. sie Sosthene, sinagog nu krüta chüyakezhau merhashülie di dienyakiu mhodzüki nu puo vüta. Derei Galio süu la mhapuorei puo nou nyüshü mo.
Antiok nu La Kevor
18Paul telhe sünu ba vor di kepeleko#18:18 Gk Siezedzürieko. ze kekhota, sidi Priskila mu Akila unie zelie di rou geinu Siriatsa la vota. Siro hadzü puo die phrakeshü puo la Kenkria nu puo tsü thiewa. 19Uko vor Efesa tsolie tse, Paul-e Priskila mu Akila nie khapie ba di Sinagog nu vo Judamia ze kerüchü. 20Süki uko puo bu uko ze ba sashünu cha, derei puo mvüta; 21mu puo uko ze kekhotatuo üdi sie, “Ukepenuopfü medo liro a#18:21 Leshü kewe huo nu kehoupuo chü rei a Jerusalem nu thenyiu nu voketuo chü bei morosuo, derei a .... la nieko ki vortuo,” sishü. Süsie puo Efesa nunu rou gei sie di tuota.
22Sidi puo Kaisaria nu vor tsolie tse Jerusalem nu kho di kehouu kelushü, sidi tuo Antiok nu keta. 23Puo zha huo sünu bakelie sie Galatia mu Frigia tsatie vo di pethakelieko pete chü kemeteishü.
Apolo Mhatho
24Siro Judamia puo puo za Apolo ükecü puo, Alexandramia, puo Efesa nu vor, puo die pu si mu kethodieko si pevi phikecü puo. 25Puo Niepuu Chau pie pethapfükeliemia puo, puo Johan mia dzülukepfüu dze rübei kesi zo ürei puo rhiechü Jisu dze kethoko pu tou mu pethayakezha puo. 26Puoe thepfu se di sinagog nu die pu; derei Priskila mu Akila unie puo die sikelie ki unie puo ze kinu vo di Ukepenuopfü Chau dze pu tou sapie puo pethashü. 27Siro puo Akaya tsatie vo nyü sie tse, kepelemiako#18:27 Gk Siezedzürieko. puo chü kethepfushü mu pethakelieko bu puo zelienu di leshü puo thu sashü. Puo sünu vorlie tse ngukemezhie nunu pelekelieko khruohi phishü, 28kekreilamonyü puoe mechüu mhodzünu puo die kuo se di Jisue Khrista zo ükecü kethodieko nunu tha kemecie toupie kiekeshü geinu Judako die va pejüwa.
Currently Selected:
Mhakechüko 18: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
