Mhakechüko 20
20
Paul Makedonia mu Gris nu Kevo
1Mha kebvükecüko laketa sie Paul-e pethakelieko kelieshü di uko chü kethepfushü mu kekhokecü die pushü di Makedonia nu vota. 2Puoe rünako pfüthe kevo ki kepelemiako chü kethepfu phishü, sidi puo Gris nu vorlie, 3sidi sünu khrü se bata. Puo rou nunu Siria nu votuo üdi dojü keba ki Judako puo gei thedo kesuo puo rhülieta, süla puo Makedonia nunu la votaketuo pepilie. 4Süki Beriamia Pairha nuou Sopater, siro Thesaloniamia Aristarka mu Sekunda, Derbemia Gaya, siro Timothi, tsiu Asiamia Tukika mu Trofima rei puo ze tuo. 5Süko hie mhodzü vo Troa nunu hie pfhe ba; 6derei Khreiüshükemo Niekhrüdanyiu sie nu hie Filipi nu rou nunu tuoshü, sidi zha pengou sie nu vo Troa nunu uko ze keselie, mu hieko zha thenie sünu bata.
Paul Troa nu Kevo Thelau
7Zhadoudo zha therie nhie hieko keze niekhrüda bietshie cütuoü kengulie tse, Paul süsienhie tuota nyü keba la uko ki die pu zo ba khisoteiluo tso. 8Siro hieko kehou keba kibou peso nu mitu rei ba pere. 9Süki khriesamia Iutuka ükecü puo khirki gei ba ru puo ze rüngu tsuta mu Paul süki rei die pu ba zo. Puo ze pesou tsuta di ki lha seu geinu te kijü tsuta mu uko puo phou sie ru siata. 10Derei Paul ke di zeretsu puo ciepielie di sie, “Nie nou thachüta hie, puo rhei ba zo,” sita. 11Süsie Paul la peso gei kho di niekhrüda bietshie cükelie sie rei die pu zo ba teisotie tso di tuota. 12Siro uko khriesau rheikelie la uko nei dapfü rei mota.
Troa nunu Mileta nu Kevo
13Hieko we Asos nunu Paul pfhekelie le di rou geinu sie sünu vota. Puo kijü keso ze sünu voketuo rhü pekreilieketa la. 14Puo Asos nu vor hieko ze keselie tse, hieko puo bu rou gei pfülie di Mitilin nu vota. 15Hieko sünunu rou ze ta lashü di süsienhie Khios rütsietsa vorlie. Süsienhie vo Samos tsolie mu süsienhie Mileta nu vorlie. 16Paul Asia nu puo zha va sawa molieketuo le di rou thu se Efesa cie voketuo leta, puo chülie kevi chie Pentekost nyi nhie Jerusalem tsolie nyü bei tuoketa la.
Paul Efesa Kehou nu Phichüko Ki Thekhadie Kepu
17Puo Mileta nunu dielie ketsepie Efesa kehou nu phichüko ze keseshütuo üdi kelieshü. 18Sidi uko vor puo tsolie tse, puo uko ki:
“A Asia nu keler therie nhie nu nieko ze kedipuo mhiei nieko donu lhou shicü nieko si ba, 19a rünuo, mhidzü pekrü zo mu Judako thedo rhü a rükeba neiüko kegepfü di Niepuu lie chükecü nieko si batuo. 20A a kethe mo zo di nieko la viketuoko se nie ki pu, mechühou nunu rei mu kiüko nunu rei nieko petha mota mo, 21tsiu Judamia mu Grikmia rei kemhie zo, thenou kedipie Ukepenuopfü tsülienu siro u Niepuu Jisu pelelienu pushü zo. 22Siro tsie, a Ruopfüu diemia tuoi,#20:22 Moro Mu tsie ruopfüu nu phase ketuo chü di. Jerusalem nu votazhie, mu sünu kedipuo a gei phirtuo shicü si mo, 23tsiu rüna kehoupuo nu rei Kemesa Ruopfüu a ki kepu zowe kedie chüketuo mu kemezhieketuo a pfhe keba thapie a kie. 24Sirei a a thuo zowe a kelhou hau mhathopuo ütuo mo; derei Niepuu Jisu a ketseshü di a bu Ukepenuopfü ngukemezhie dieliekeviu pupie mia kieshünukecü lietho-u chü tseishü nyükecü leketuo rübei zo.
25“Siro harie a nieko donunu Ukepenuopfü kedi dze pu petha tuokecüko nieko miapuorei cüsie a zie ngu lalie lho zokecü a si bate. 26Süla thie a nieko mhodzünu pushüya ho, themia kehoupuorei kata rei süu zie a tsü gei mo ho, 27kekreilamonyü a nieko ki kelakelie do-u pete pushü khrie di a ketheta mo zo. 28Süla nieko thuo zorei nie terüchü balie mu Kemesa Ruopfüue pie nie peleshüwaketa kro-u bu rei u kirei balie. Puo Nuou#20:28 Moro puo thuo puo zie pie. zie pie khrükelie Ukepenuopfü kehou kepfhemia chüliecie. 29A tuoketa sie socie puo zho kesuoko nieko donu vor zotuokecü si ba, mu tekuokro-u khrielie lho. 30Siro nie thuo nie kro-u donu zorei pethakelieko teshüpie u siemedzilieketuo la kedietho-u chü kerüpfhiwaketuo huomia sier zotuo. 31Süla nie terüchü balie, mu a mhidzü pekrü zo di teizeiteiso cie se nie kehoupuorei tahitarhokeshü rükraliecie. 32Mu a tsie nieko khapie nie chü pekruopethelie di mesalieketako donu puo kau khapie nie tsülie keviu Ukepenuopfü mu puoe mia ngukemezhie dieu pelewatatuo. 33A mia puo rakachü rei, suna, morei pfhemenei rei lie nyü vor mo. 34Nie si batuoü, a a thuo a dzienie pie mhachü di a mu a ze ketuoko se morokesuo de pfhülielie vor zo. 35Mu sügeinu we rei kethachümiako khruohishülie morokesuo la mu u Niepuu Jisu thuo pukeshü ‘Mia kinu mha ngukelieu ki rei mha pie mia ketsüwe thejapfükuo’ ikecü dieu rükralieketuo la a mha pete nu a rhiechü di mhachüpie nieko kieshü.”
36Puo die pu tseikewa sie, puo uko pete ze khoutoulie di kecha chülie. 37Süki uko pete keze kra phita, sidi uko Paul ciepielie di puo mebo, 38puo uko üse mhakipuorei puo zie ngu salie lhoketa pukeshü la uko nousuo phita. Sidi uko puo ze zo vo rou kebau nu shü.
Currently Selected:
Mhakechüko 20: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
