Mhakechüko 17
17
Thesalonika nu Kevo
1Paul mu Sila unie rüve Amfipoli mu Apolonia pfüthe Thesalonika nu vorlie, sünu Judamia sinagog puo ba. 2Paul-e puo zhoki tuoi uko ki nu vo, mu sünu sabat va se ba di kethodieko nunu uko ze kepukekie ba, 3tsiu süko ca vatshapie uko kie di Khrista kemezhiekewa sie kesia nunu rheilakesie dzeko thapie uko kie menuoshü, di sie, “A pie nieko ki pu keba Jisu hauha Khristau zo.” 4Süko donu huomia kepfhezelie siro pecükecü Grikmia kekra tsiu thenumia krüta kekra rei pelelieta di Paul mu Sila unie zeta. 5Derei Judako u ro di sie, lhithochü nu kerüzhümia huo kie kengupie kemeyhu kro puo chülie di rünau nu mha kebvüshü. Sidi ukoe unie ze mechühou nu votuoü Paul mu Sila nie pfhü keba ki vo Jason ki reta. 6Derei uko unie ngulie mota tse, Jason mu kepeleko#17:6 Gk Siezedzürieko. huomia merhashü rünau nu kekuokeseko mhodzünu vor, shiekhoui di sie, “Kijüu pfü pekhepelaketuo themianie haki rei vor, 7ru Jason unie pesolie. Uko pete rei kedi kekrei Jisu ükecü puo tuo üdi kediu zhoko petsoute,” sita. 8Siro die hau sikeshü ki themiako tsiu kekuokeseko bu u nou kehoukeruo chüta, 9sidi Jason mu kekreiko u die phrakeshü sie uko bu tuota.
Beria nu Kevo
10Süzhü kepeleko Paul mu Sila nie ketsepie Beria nu shüwa; sidi unie sünu vorkelie ki Judamia sinagog nu vota. 11Hanu keba Judako Thesalonika nu kebako ki u nou mezhükuo, kekreilamonyü ukoe u nei siei di dieu lielie mu die süko puotou mo mo shiü silieketuo la teisonhie kethodieko pfhü phrüya. 12Sidi themia kekra rei pelelie; siro u tha kenyi Grikmiapfü mu therhukepfü thepfumia kekra rei pelelie. 13Derei Thesalonika nu keba Judako Paul vo Beria nu rei Ukepenuopfü dieu pie petha tuoketa dze silie tse, uko sünu rei ker di mha kebvü mu krodiko nou chü pesuoshü. 14Sitse kepelemiako Paul ketsepie dzükezha khie shü mhawa; derei Sila mu Timothi unie we sünu bata. 15Siro Paul meza ze kevoko puo ze vo Athen tsoshü, süsie Sila mu Timothi nie bu pezi vo puo tsolie morokesuo silieta, di uko puo ze kekhota.
Athen nu Kevo
16Paul-e Athen nu Sila mu Timothi nie pfhe keba ki nadiu nu terhuorhiko thuo tshupfü keba ngu di puo noumeca seta. 17Süla puo teisonhie sinagog nu Judako mu pecükecümia kekrei rei tsiu lhithochüko#17:17 Moro mechü zieke; Gk nu Agora. nu themia kehoupuorei ze kesekelieko rüchü. 18Siro Epikuri mu Stoik mhasi pie pethayakezha kronie donu huomia puo ze ketikemeüta. Süko huomia sie, “Diebou hau kedipuo pu ba mu?” Kekrei huo sie, “Puo chazoumia rhuo kro puo pupie mia pethaketuo puo zo.” (Puoe Jisu Khrista mu rheilasiekelie dze pie petha tuokecü la). 19Süla uko puo ze Ariopaga ükecü chü nu vorlie di sie, “No mha kesa puo pie pethaketuo dze hie bu sishütieya mo? 20Süko hie la kesa kro puote, süla hie n ki mha süko ca si nyüyalie,” sishü. 21Siro Athenmia mu chazoumia sünu lhou keba pete mhapuorei chü mo zo di mha kesa puo kepu morei rünyü ba u tei pevowawaya.
22Sitse Paul-e Ariopaga metsuo nu thalie di sie, “Athenmiako, nieko ha mha pete nu terhuo keprei nanyü nu pecü phiyacü a ngulie. 23A nieko ra tuo rühou kevo ki nieko rüsuoyakezhako meho tuo ru ruosuoba puo gei ‘Si kemo Rhuo puo la’ ikecü thupie keba ngulie. Niekoe si mo zorei rüsuoyakezha süu, a tsie pie nie ki puya. 24Puo sü Ukepenuopfü, kijü mu sünu ketuo kheko chükeshüu, puoe tei mu kijü mho Niepuu zo, themia thuo chükelie rüsuokiko nu baya mo, 25morei puo mhapuo tsopfhü bata di u dzie pie puo theke rei ya mo, puoe puo thuo kerhei mu keha tsiu mha pete rei pie u kehoupuorei tsüyakezha la. 26Mia puo geinu puo seyie neiüko chüpie uko bu kijüu pete gei lhou tuote, tsiu puo pedzüperie uko bu lhouketuo teiko siro baketuo rieko rhieshüwate, 27sidi uko bu Ukepenuopfü#17:27 Leshü kewe huo nu Niepuu si. pfhülie mu si zo vo puo ngulieketuo la, puo zowe u mia puo kinu rei pecie tuo mo zo; 28kekreilamonyü ‘We puo geinu rhei mu mele tsiu lhou tuoyakezha zo,’ süu nie donu ükezomia huo rei pukecü,
‘We rei puo yiemia zo,’ si.
29We rei Ukepenuopfü yiemiakecü la, puo üse suna morei rakachü morei ketsie pie chükelie miarhi, themia do mu mhasi se chükelie kemhie puo ücü leta zhü mo. 30Ukepenuopfüe thiedzü themia mhasi kemo teikiko kevavuo di khawate, tsie we puo themia kehoura tuo shierei pete bu thenou kedilienu pushüwate, 31kekreilamonyü puoe mia puo bu kemezhü tou nunu kijüu nyie pepiketuo la teisozha puo pethose tuote, mu hau chü touketuo la kesia nunu themia süu chü perheipie peteko kieshüte,” sishü.
32Kesiamia rheilakesie dze sishü tse, uko huomia udzü thevita; derei kekreiko sie, “Hie hau dze n kinu rünyü latuo,” sita. 33Süki Paul uko ze kekhota. 34Derei huomia puo kitsa vata di pelelie, süko donu Ariopagit-u Dionisi, mu thenumia Damari ücüpfü puo, siro kekrei huo rei sa.
Currently Selected:
Mhakechüko 17: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
