Mhakechüko 16
16
Timothi-e Paul mu Sila Nie Ze Tuoketa
1Süsie Paul rüve Derbe mu Lustra nu vo ru sünu pethakeliemia puo puo za Timothi ücü puo ba, puo zuoe Judamiapfü di peleketapfü puo, derei puo puoe Grikmia. 2Lustra mu Ikonia nu kepelemiako#16:2 Gk Siezedzürieko. rei Timothi pu pevi phiya. 3Paul-e Timothi bu puo ze tuo nyüta, süla puo zelie di puo zhürewa, sütsatie lhou keba Judakoe puo puoe Grikmia ücü si keba la. 4Uko rüve rünako nu kevo ki Jerusalem nu apostelko mu phichüko pepikelieko pie kepelemiako ki pu di uko bu süko chüüzelienushü. 5Süla kehouko kepele nu metei sakuolie tsiu teisonhie themia kra kechülie.
Troa nu Paul Ziemho Kengu
6Kemesa Ruopfüe uko bu dieu pie Asia nu pu mvüketa la tuo Frigia mu Galatiako nu vota. 7Sidi Misia kepetsoutsatie vorlie tse, uko Bithunia nu lekecü lesie, derei Jisu Ruopfüu uko bu sünu le mvüta. 8Süla uko Misia kijü pfüthe Troa nu vota. 9Süzhü Paul-e ziemho geinu Makedonia mia puoe puo kie bei di sie, “Makedonia nu vor di hieko khruohishücie,” iketha ngu. 10Paul-e ziemho süu ngu tse hieko Makedonia nu voketuo la dojülie, Ukepenuopfüe hie bu dieliekeviu pupie uko pethashünukecü la hie kie keba lelieketa la.
Filipi nu Lidia Thenou Kedikelie
11Hieko Troa nunu rou zelie di mezhü Samothra nu vo, mu süsienhie Neapoli tsolie. 12Hieko sünu Rommia vo rüna chü keba Makedonia nadi kemeyietho-u Filipi nu vorlie. Sidi hie zha huoyo nadi sünu bata. 13Hieko sabat nhie kharu sie pra di, kerü khieki kecha chüyaücü thechü puo nu vo, mu hieko sünu ba di thenumia kro puo vor kengu kebako ze kerüchü. 14Süki puo za Lidia, Ukepenuopfü rüsuoyakezhapfü puo, hieko die rünyü ba; puoe Thiatira nadiu nunu vor mu pfhe meriemegekecü lhi chüya. Niepuu thuo puo nou khrüshü di Paul die pukeshüko rünyü menuolie. 15Süpfü mu puo kinuko dzülupfülieta tse, puo hieko kie bei di sie, “Nieko a üse Niepuu kepelemiapfü puo üya ro, a ki nu vor batacie.” Sidi puo hie bu vonu beita.
Paul mu Sila Nie Kedie Kechü
16Khunhie puo hieko kechachüu nu vokezhü ki, miadiemiapfü puo themou ruopfü zeyakezhapfü puo ze keselie, mu puo themou la raka kekra krapie puo niepumia tsülieya. 17Süpfüe Paul hieko siemedzi shiekhoui di sie, “Themia hako Kerükrietho Kepenuopfü kituomia zo, kelakelie chau pie nieko#16:17 Leshü kewe huo nu hieko si. ki puya.” 18Puo zha kekra si tuota. Hau Paul keyhu phiketa la reipra ruopfüu ki, “A Jisu Khrista za se n bu puo geinu partanuyawe!” Sitse bavüdo süu tou nu süu prata.
19Derei puo niepuko raka ngulieketuo kemerü ba moketa ngulie tse, uko Paul mu Sila telie di merhashü ze lhithochü nu kezhako mhodzünu vota. 20Uko unie ze kezhako mhodzünu vor di, “Themia hanie-e u rüna kebvü bate; unie Judamia, 21mu we Rommia medzi morei zelie kesuo u zho kemo zenu pethaya.” 22Süki krodi kepekrolie di unie petsou sierta, sidi sorkari keseko unie pfhenei cierhawa mu mia bu seipie unie vüwanu die khashüwa. 23Sidi uko unie vü pesuo phiwa di unie khapie kedieki nu bawa mu kedieki kepfheu bu unie pfhe menuolienushüwata. 24Dielie hau ngukelie ki kedieki kepfheu phikha pie unie phi kekhawa di unie khapie kedieki kesoutho nu bawa.
25Khisoteiluo Paul mu Sila unie kecha chü mu chielipie Ukepenuopfü tshe ba siro kedieko unie pfhe rünyü ba. 26Süki kiükishü kemerie mhapuochü vorta, sitse kedieki mvüdzeko shükeniewa, mu kikhako shühie parta, tsiu kediemia phako rüprei phreta. 27Kedieki kepfheu cosier ru kikha pete khrüpie ketha ngu di kedieko pete tate nhiecü le di, puo zhiecha zoupie puo thuo puo dukhriwatuoü thata. 28Derei Paul shie puo rhiechü di sie, “No n thuo n pechü hiecie, hieko pete haki ba phre zo,” sishü. 29Kedieki kepfheu mi chalie di ta le tsiu pekhrukhru di tsu Paul mu Sila unie mhodzünu zhüta. 30Süsie puo unie ze chazou pralie di sie, “Kezhanie, a kelalieketuo la kedipuo chü morosuo ga?” 31Sitse unie sie puo ki, “Niepu Jisu pelelie, sitse no rei mu n kinuko rei kelalietuo.” 32Sidi unie Niepuu die pie puo mu puo ki sünu keba pete ki pushü. 33Süzhü teiluo kedieki kepfheu unie ze vo unie gei thepfüko pete khrüwa; sidi puo mu puo kikru pete dzülupfü mhalieta. 34Siro puo unie ze puo ki nu vo di kecüca pie unie tsü; puo mu puo kinuko pete u nei phita, puo Ukepenuopfü pelelieketa la.
35Teisolie tse, kekuokeseko thenako ketseshü di sie, “Themianie khashüwacie,” sita. 36Süla kedieki kepfheu sie Paul ki, “Kezhakoe Sila nnie khashüwanu pu vorte; süla nnie parlie mu nnie nou mene di tuotalie.” 37Derei Paul sie, “Uko hie nyie kecü mo di, hie Rommia zorei mechühou nunu hie vü di hie pie kedieki nu shüwa; sidi tsie pekhre hie kha lashüwatuo üya le? Mhakipuorei silie kenjü! Uko bu vor di hienie kha lashüliecie.” 38Sitse thenako die süko se vo kekuokeseko ki pushü, mu uko unie Rommia zo ücü silie tse michieta. 39Süla uko vor di unie ki u kejo chata. Sidi uko kedieki nunu unie ze parshü di unie bu nadiu nunu tuotanu cha beita. 40Siro unie kedieki nunu parta tse tuo Lidia ki nu vota, di sünu unie siezedzürieko ngulie tse uko nou chü kethepfushü di tuota.
Currently Selected:
Mhakechüko 16: ANBRBSI
Highlight
Copy
Compare
Share
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More
