Korintmiako Kerieu 3
3
Ukepenuopfü Liethomia
1Harie a siezedzürieko, a nie üse ruopfü themiamia mhiei mha pulie suote, derei nieko üse Khrista kitsa nuoranuomia tuoi chüüphou themiako mhie di mha pu morosuote. 2A nudzü se nieko vachü vor, kecüca kemetei se mo, nie kecüca kemetei cülie suokecü la. Nieko tsie rei dojüse ba mo, 3nieko chüüphou kitsa ba zocü la. Nieko huoniehuo ngu nie ro tsiu huoniehuo ze kegei ba zocü, nieko chüüphou kitsa, mu themia zhorüli se lhou baya mo üme? 4Nieko miapuonie sie, “A Paul kitsa,” mu kekreiu sie “A Apolo kitsa,” idi puketa ha nieko kijü nu mia zo mo üme?
5Ka, Apolo supuo ga? Paul supuo ga? Mia kituomia zo, di nie bu unie geinu pelekelie zo, süusü Niepuu thuo pelekeshü mhatho-u kechü zo. 6A leishü, Apolo dzü pie vashü, derei Ukepenuopfü thuo memiekelie chüshü. 7Süla leikeshüu rei mu dzü pie vakeshüu rei mhapuo mo, derei memiekelie chükeshüe Ukepenuopfü zo. 8Leikeshüu mu dzü pie vakeshüu unie mhatho puo zo, mu kehoupuorei mhachükeshüu geinu zhakhra chüpie tsütuo. 9Kekreilamonyü we Ukepenuopfü kituomia, kedziese di mhachüya; nieko we Ukepenuopfü lieu, Ukepenuopfü kiu zo.
10Ukepenuopfü ngukemezhie kha a ketsüe ki chü kesimia mhiei, di a puo mvü dzeshü, mu kekreimia huo süu geinu ki chüya. Derei kehoupuorei kimhiei di puo kiu chüya shi menuoliecie. 11Kekreilamonyü puo mvü dzepie zhüwaketau zo kemosie miapuorei puo mvü dze pekrei lalie kenjü; puo mvüdzeu sü Jisu Khrista zo. 12Kehoupuorei puo mvüdze süu geinu suna, rakachü, ketsie puoma kereko, sei, zoga mu rügu pie puo ki chüya ro, 13ki kechümia kehoupuo mhatho rei thashütuo, Teisozha sünhie süu hielashütuo, süu mi nunu thashüketuo la, mu mi süu thuo kehoupuo mhatho rei kedipuo mhie shicü kevikesuo thashütuo. 14Kitho kehoupuorei mvüdze süu geinu krukelieko, puo zhakhra ngulietuo. 15Mhakinu mhatho-u thewata ro, ki kechüu ka phituo; derei ki kechüu zowe kelalietuo, sirei mi nu kevo mhie zotuo.
16Nieko Ukepenuopfü rüsuoki zo, mu Ukepenuopfü Ruopfüu nie nou bakecü si mo zo me? 17Kehoupuorei Ukepenuopfü rüsuokiu pekawa ro, Ukepenuopfü rei süu pekawatuo. Kekreilamonyü Ukepenuopfü rüsuokiu mesa, mu niekoe puo rüsuokiu zo.
18Nie thuo nie sewa hiecie. Mhanuü kijü hanu nie thuo nie ü mhasiüya ro, nie mhakesimia chülieketuo la kenyamia chüliecie. 19Kijü hau mhasi lesie ro Ukepenuopfü mhodzünu kenyamia zocü la. Süusü thupie kezhü,
“Puoe mhakesiko kedodakesie ki uko telieya,”
20süsie rei,
“Niepuue mhakesiko noule kemethuo zo ükecü silieya,” si.
21Süla kehoupuo bu rei themia krüta se kemelha hiecie. Kekreilamonyü mha pete rei nie vie zo, 22Paul rei, Apolo rei, Kefa rei, kijüu rei, kerhei rei, kesia rei, tsiedo rei thiesie rei pete nie vie zo, 23siro nie Khrista vie, mu Khristae Ukepenuopfü vie zo.
Currently Selected:
Korintmiako Kerieu 3: ANBRBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2023, Used by permission. All rights reserved. More