Apokalipsis 2
2
E poroka e khanllirake kai si ando Efeso
1Pisisar e suechoke katar e khanlliri kai si ando Efeso: Gia phenel gua kai si e efta cheraia ande leko va o chacho, ta phirel maskar e efta lampare sunakune: 2Me llanav so chere, ta llanav kai trudi tut but ande cho rado, ta llanav kai nasti terpi e bilachen, ta kai zumadan golen kai phenen kai si apostolura a von inai, ta llanglan kai von si kojamne. 3Terpisardan but ta radisardan but pe cho rado, soke voli mo anav. 4A iek ezgoda inai mange drago tutar, kai muklan o volipe kai saia tut mai anglal. 5Goleke de tut golli katar pelan ta keisao, ta cher e ezgode kai cherea omanglal. A te na chereale, ka avav oma tute ta ka ikanav chi lampara kotar katar si thodi, te na keisailan. 6A si tut gaia ezgoda kai murzi pe ezgode kai cheren e nikolaiture, ta i me murziu pe ezgode kai von cheren. 7¡O lleno kai si le kan, te asunel so phenel o Duo e khanllirenge! Ko ka dobil, ka dav le te jal katar o kas e zivotoko kai si po maskaral katar o paraiso e Devleko.#Ez 28.13; 31.8.#Jen 2.9; Apo 22.2.
E poroka pala e Esmirna
8Pisisar i e suechoke katar e khanlliri ande Esmirna: Gia phenel o mai angluno ta o mai paluno, gua kai saia mulo ta pale zivisarda.#Is 41.4; 44.6; 48.12; Apo 1.17; 22.13. 9Me llanav e ezgode kai chere ta e patnia kai nakhe ta cho chorripe, a tu san barvalo ta pinllarav o kojaipe katar e llene kai phenen kai si judiura, a von si iek khanlliri e judionengi kai si e Satanaseki. 10Te na dara katar e patnia kai ka nakhe, soke o llavolo ka chudel nesave llenen tumendar ande rubie te sai aven zumade des llive, goleke lla chachimaia llik kai o meripe ta me ka dav tut e korona e zivotoki. 11¡O lleno kai si le kan, te asunel so phenel o Duo e khanllirenge! Sa gola kai ka dobin, ni ka len e duk katar o duito meripe.#Apo 20.14; 21.8.
E poroka pala o Pergamo
12Pisisar e suechoke katar e khanlliri ando Pergamo: Gia phenel gua kai si le o jarni sano ta ostro pe duie riga: 13Me llanav so chere ta kai zivi. Tu san kote kai besel o Satanas ta isto gia lla chachimaia ande mo anav. Ni muklan mo pachape ni ande llivesa kana mundarde e Antipase kai dela mi orba chachi, kai mundarde le kote kai zivil o Satanas. 14A si man nesave ezgode kai inai mange drago tutar: soke si tut kote gola llene kai ni kamen te muken o sikadipe e Balaameko, gua kai sikavela e Balake te cherel te peren ando bilachipe e Israeleke chaven, ta cherela len te jan kurbanura kai dena avere delenge, ta te cheren o kurvaluko.#Nm 22.5,7; 25.1-3; 31.16; Dt 23.4. 15Ta i si tut gola llene kai ni muken o sikadipe katar e nikolaite kai me murziu pe lengo sikadipe. 16Goleke keisao, soke te na chereale, me ka avav tute oma ta ka marav man lenchar e jarniea kai likel katar mo mui. 17¡O lleno kai si le kan, te asunel so phenel o Duo e khanllirenge! O lleno kai ka dobil ka dav le te jal katar o mana gurudino, ta ka dav le iek barrorro parno kai pe lete si pisime iek anav nevo kai niko ni pinllarel le, samo gua kai lel le.#Is 62.2; 65.15.#Ek 16.14-15,33-34; Jn 6.48-50.
E poroka pala e Tiatira
18Ta pisisar e suechoke katar e khanlliri kai si ande Tiatira: Gia phenel o Chavo e Devleko, kai leke akha si sargo plameko iagako ta leke porrne si sargo o tuch kai klichil: 19Me llanav so chere ta llanav cho volipe, cho pachape, cho rado, sar terpi, ta kai cho rado akana si mai baro. 20A si nesave ezgode kai inai mange drago tutar: kai muke gole diskinia kai ikhardol Jezabel kai phenel kai si porauka te sikavel, ta cherel me eslugen te cheren o kurvaluko ta cherel len te jan katar e kurbanura kai den len avere delenge.#1 R 16.31; 2 R 9.22,30. 21Me diem la vreme te sai keilpe, a voi ni kamel pala po kurvaluko. 22Goleke me peravav la ande postelia. Ka cherav te perel dukhadi ande postelia ta golen kai kurvinpe laia ka cherav len te nakhen bari patnia, te na keinape katar e ezgode kai voi cherel. 23Ta lake chaurren ka raniu len merimaia, ta gia sa e khanlliria ka llanen kai me sem gua kai pinllarel o mislo ta o lio, ta ka dav suakone llene prema so cherda.#Sal 7.9; Sal 62.11-12; Pr 24.12; Ez 18.30; 33.20; Jer 17.10; Mt 16.27. 24A tumenge ta i golenge kai si ande Tiatira, ta sa e llenenge kai inai len gua sikadipe ta kai ni pinllarde so von ikharen, e bare ezgode gurudine katar o Satanas, me phenav tumenge kai ni ka thovav aver pharipe pe tumende. 25A so si tumen, na muken le lligo ni ka avav me. 26Gua kai ka dobil ta kai ka cherel mo rado llik kai o son, me ka dav len o gazdaripe pe phuvia. 27Ta ka gazdarin iekhe kastea kai si sastruno, ta ka phagen len sargo o taso kai cherel o lleno e chikatar, gia sar liem i me o gazdaripe me Dadetar.#Sal 2.8-9. 28Ta i ka dav len e cherain e thiarinaki. 29¡O lleno kai si le kan, te asunel so phenel o Duo e khanllirenge!
Currently Selected:
Apokalipsis 2: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
