Apokalipsis 1
1
Salami
1Gava si so sikada o Del e Jesukristoke katar e ezgode kai si te avenpe oma, te sai sikavel vou e llenen kai si leke esluge. Goleke o Jesukristo bichalda iekhe suecho te sikavel gala ezgode e Juaneke kai si leko esluga, 2Ta o Juan phenda sa o chachipe katar e ezgode kai dikhla ta katar e orba e chachi e Jesukristoki.
3Blagosime gua kai chitil gava lil, ta blagosime i gola kai asunen gala alava katar e ezgode kai si te avenpe ta kanden e alava kai si pisime ande gava lil, soke pase si o vreme.
4Me o Juan, bichalav salami e efta khanllirenge kai si ande Asia. Len tumen o volipe ta e pas katar gua kai si, kai saia, ta kai si te avel; ta i katar e efta duura kai si angla leko trono,#Ek 3.14; Apo 4.5; Is 11.2. 5ta i katar o Jesukristo, kai phenel o chachipe, ta si o purvo kai ustilo katar o meripe ta kai gazdaril pe sa e charura katar e phuv. O Kristo volil amen ta jalada amen katar amaro bilachipe pe ratea,#Sal 89.27; Is 55.4; Ech 26.23; Kol 1.18. 6ta cherda amendar charura ta popura kai radin e Devleke kai si leko Dad ¡O baripe ta e zor te aven leke ostade! Gia te avelpe.#Ek 19.6; Apo 5.10; 20.6.
7¡O Kristo avel maskar e oblakura!#Dn 7.13; Zak 12.10; Mt 24.30; Mk 13.26; Lk 21.27; 1 Ts 4.17; Mt 24.30; Jn 19.34,37.
Suako iak ka dikhel le
ta i gola kai mundarde le,
ta sa e phuvia e suetoke
ka roven pala le.
Ea, gia te avelpe.
8Me sem e Alfa ta e Omega#1.8 Alfa si e purvi letra katar e griegura, a e Omega si e mai paluni, gava si o mai angluno ta o mai paluno. phenel o Gazda, o Del kai si le sa e zor; gua kai si, kai saia, ta kai si te avel.#Is 41.4; 44.6; Ek 3.14; Apo 1.17.
O sikadipe katar o Jesukristo
9Me o Juan sem tumaro phlal, soke me sargo tumen, si man vera ando Jesukristo. Goleke sem katar e Devleki charoina, ta gia sargo tumen, si man e zor te nakhav e patnia. Me sema phanglo ande isla kai ikhardol Patmos, soke sikavava e Devleke alava ta e orba e chachi e Jesukristoki. 10Me sema ando Duo ando llive e Devleko, ta asundem palal pala mande iek baro avazi sargo iek tuturuga, 11kai phenela:
Me sem e Alfa ta e Omega, o mai angluno ta o mai paluno, ta phenela:
Pisisar pe iek lil so dikhe, ta bichal le e efta khanllirenge kai si ande Asia, ando Efeso, Esmirna, Pergamo, Tiatira, Sardes, Filadelfia, ta Laodisea.
12Boldinailem te dikhav katar avela o avazi kai dela orba manchar, ta dikhlem efta lampare sunakune, 13ta po maskaral katar e efta lampare saia iek lleno sargo o Chavo e Manuseko, furiado iekhe patavenchar kai resena llik kai leke porrne ta iek kavisi sunakuno kai resela llik kai leko brek.#Dn 7.13; Dn 10.5. 14Ta leko soro ta leke bal sea parrne sargo e bakrane bal, parrne sargo thud, ta leke akha sea sargo plameko iagako.#Dn 7.9. 15Leke porrne klichina sargo o tuch kana kosen le, ta sargo kana biladol ande furnava. Ta leko avazi asundilo but zurale sargo iek bari len.#Dn 10.6; Ez 1.24; 43.2. 16Ta ande leko va o chacho sea efta cheraia. Ta katar leko mui likela iek jarni sano ta ostro pe dui riga. Leko mui saia sargo o kham kana kletosarel zurale.
17Kana dikhlem le pelemtar kai leke porrne sargo mulo. Vou thoda po va o chacho pe mande, ta phenda mange: Na dara. Me sem o mai angluno ta o mai paluno,#Is 41.4; 44.6-8; 48.12; Apo 1.8; 2.8; 22.13. 18gua kai zivil. Me sema mulo, ta akana ziviu ostade, ta mande si e kluchura katar o meripe. 19Pisisar so dikhlan: so si akana ta so ka avel mai angle katar gala ezgode. 20Gava si so si len gurudino e efta cheraien kai dikhlan pe murni chachi, ta so si len gurudino e efta lampare sunakune:
E efta cheraia si e efta suechura katar e efta khanllira, a e efta lampare si e efta khanllira.
Currently Selected:
Apokalipsis 1: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
