Apokalipsis 13
13
E azdava katar e mora
1Ondaka thodem man upral pe chisai e moraki, ta dikhlem kai likela katar e mora iek azdava kai saia la efta sore ta des singa, ta ande lake singa des korone ta upral pe lake sore, iek anav kai kusel e Devle.#Dn 7.3; Apo 17.3,7-12. 2Ta o dragon kai dikhlem saia sargo o leopardo; ta leke porrne sea sargo e melledoke, ta leko mui sargo mui lionoko, ta o dragon dia la pi zor ta po trono ta baro gazdaripe.#Dn 7.4-6. 3Ta dikhlem iek katar lake sore ranime te merel, a lako ranipe sastilo, ta sa o sueto chudisailo pala e azdava. 4Ta blagosisarde e dragono kai dia e zor e azdava, ta blagosisarde e azdava ta phenena: ¿Ko sargo e azdava, ta ko sai marelpe laia?
5Ta avilo lake dino iek mui kai dela bare orbe ta kusela e Devle, ta avila lake dino te gazdaril saranda ta dui chon. 6Ta kusela e Devle pe alavenchar, katar leko anav, ta leki chara, ta golen kai zivin ando miloso.#Dn 7.8,25; 11.36. 7Ta saia lake dino te marelpe e santo foroia, ta te dobil len, ta i saia lake dino te gazdaril pe suako vicha, foro ta phuv.#Dn 7.21. 8Ta blagosisarde la sa e llene kai zivin pe phuv, gola kai lenge anava inai pisime ando lil katar o zivoto e Bakreko, kai saia dino kurbano mai anglal katar gava sueto.#Sal 69.28; Apo 3.5.
9Vareko te si le kan te asunel.
10Vareko te si te phangliol#Jer 15.2; 43.11.
ka llal phanglo;
a vareko te mundarela e jarniea,
e jarniea morabi te avel mundardo.
Kate si o terpipe ta o pachape katar o santo foro.
E azdava ta e phuv
11Mapalal dikhlem aver azdava kai likela katar e phuv; ta saia la dui singa sargo bakreke, a dela orba sargo dragon. 12Ta si la sa o gazdaripe katar e purvi azdava, ta gazdaril angla la ta cherel e phuv ta e llene kai zivin pe late te blagosin e purve azdava kai lako ranipe merimako sastiloia. 13Ta i cherel bare ezgode, gia bare, kai cherel te perel iag katar o miloso pe phuv angla e manusa. 14Ta kojavel e llenen kai zivin pe phuv e bare ezgodenchar kai si lake dino te cherel angla e azdava, ta cherel e llenen kai zivin pe phuv te cheren iek slika e azdavaki kai si ranime e jarnietar ta kai zivisarda.#Mt 24.24; 2 Ts 2.9-10. 15Ta saia lake dino te del zivoto gole slika, te sai del orba, ta te cherel te mundaren sa golen kai ni blagosina la. 16Ta cherela saurren e minonen ta e baren, e barvalen, ta i e chorren, e eslugen ta i gola kai inai esluge te avel lenge thodi iek marka pe lengo chikat. 17Ta niko nasti chinela ta nasti bichinela, te na avela le e marka, o o anav katar e azdava, o o numero katar leko anav.
18Kate si bizaipe:
Ko acharel te llinel o numero katar e azdava, soke si numero manuseko, ta o numero si sov stotine ta sovardes ta sov.
Currently Selected:
Apokalipsis 13: BACHRO
Highlight
Copy
Compare
Share
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
