Salmos 89
89
O Del achel pe iek orba e Davidea
O sikadipe katar o Etan o esraita.
1Devla, sogo ziviva ka phenav ando llilabipe kai tu san posteno,
me llilabimaia ka phenav suako llive
kai tu san chacho.
2Ka phenav kai cho volipe si ostade,
kai cho chachipe ni pharrudol nikada,
sargo o miloso kai ni pharrudol.
3Dian cho alav e Davide,
jalan sovel che slugake gale alavenchar:
4Ka cherav te charoil ostade cho porodo
pe cho than.#2 S 7.12-16; Sal 132.11-12; Jer 33.21; Ech 2.30.
5¡Ioi Devla!
o miloso blagosil che glamne ezgode
ta che santura phenen cho chachipe.
6¡Niko inai ando miloso sargo tu Devla!
¡Niko inai prema tu Devla maskar e dela!
7Glamno Del kai daran tutar ando miloso,
kai truial tutar si e santura.
8Ioi Devla, kai si tut sa e zor,
sa e zor si chiri ta cho chachipe si truial tutar,
¡inai niko sargo tu!
9Tu gazdari pe mora divi
ta achave lake bare valura.
10Ustadan pe azdava e moraki
sargo kana saia iek mulo,
rispisardan che dusmanonen
che zurale vastea.
11O miloso ta e phuv si chire,
tu cherdan e phuv ta sa so si ande late.#Sal 24.1-2; 74.16-17; 95.4-5; 1 Kor 10.26.
12Tu cherdan o norte ta o sur,
e burdura, o Tabor ta o Jermon llilaben vesele chuke.
13Chiro si o va o zuralo,
cho va o chacho si zuralo ta blagosime.
14Cho trono si istardo po chachipe ta pe so si orta,
o volipe ta o chachipe llan angla tu.
15¡Ioi Devla!
Blagosime o foro kai llanel te blagosil tut veselimaia
ta phirel po villelo kai tu de le,
16kai veselilpe ande cho anav suako llive
ta lel zor ande cho chachipe.
17Soke tu san o villelo katar amari zor
ta pala chi volia amari zor bariol mai but.
18¡Amaro eskudo si o Del!
¡Amaro Charo si o Santo katar o Israel!
19Omanglal tu dian orba sargo ande iek suno
che chache slugenchar ta phendan lenge:
Esverisardem iekhe llene tromano katar mo foro,
thodem le upre ta blagosisardem le.#2 S 7.4-16.
20¡Maladem me sluga e Davide!
Mo santo zeitino thodem pe lete,#1 S 13.14; 16.20; Ech 13.22.
21ta ka pomoziu le suako llive.
Me vastea ka dav le zor.
22Leke dusmanura ni ka den pe lete
ta ni ka dobin le e llene bilache.
23Ka chalavav leke dusmanonen angla lete
¡ta ka raniu golen kai murzin pe lete!
24Mo chachipe ta volipe ka aven lea,
ta cheres ma ka avel le mai but zor.
25Ka cherav te gazdaril pe vastea o stingo
pe mora a e chachea pe paia.
26Ta ka phenel mange:
Tu san mo Dad,
tu san mo Del kai braduil man ta arakhel man.
27Ta me ka dav le o liubao katar o chavo o mai purano,
o mai baro maskar e charura e suetoke.#Apo 1.5.
28Mo volipe pe lete ka avel suako llive,
ta ni ka phagav mo alav kai diem le.
29Leko porodo ka charoil pe leko than
ostade, sogo avela o miloso.
30A leke chave te mukena mo zakono
ta te na zivina prema me alava,
31ta te mukena ando lallao mo sikadipe
ta te na kandena me zakonura.
32Ka dukhavav len soke ni kandie,
ka chalavav len e bichoia pala lengo bilachipe.#Dt 8.5; 2 S 7.14; Sal 94.12; Pr 3.11-12; Ebr 12.5-11.
33A mo volipe po David ni ka merel,
ta ka avav lea chacho
34ta ni ka phagav mo alav,
ta ka cherav so phendem.
35Iek drom jalem sovel pe mi santidad,
ta ni ka kojavav leke:
36Leko porodo ka charoil pe leko than
ostade, sogo avela o kham.
37¡Zurale ostade sargo o chon!
¡Zurale ostade sogo avela o miloso!
38A tu, ni kamlan ta ni thodan sama
e charoke kai tu esverisardan,
¡jolailan pe lete!
39Phaglan o alav che slugaia,
chudian pe phuv leki korona.
40Muklan putardipe pe sa leke zidura,
¡muklan sa ando phagipe leke forura!
41Kogo nakhel del ta lel peke sogo mangel,
gola kai zivin pase asan peke letar.#Sal 80.12.
42Cherdan te vazden pe va veselimatar
lenge dusmanura, soke dobisarde.
43Cherdan te na avel ostro lengo jarni,
ta ni dian le zor kana marelape.
44Achadan lengo baripe,
chudian pe phuv leko trono.
45Chikniardan e bursa katar leko zivoto
ta muklan le ando lallao.
46¡Ioi Devla!
¿Gachin ios ka gurudo?
¿Gachin ios ka phabol chi joli sargo e iag?
47Devla, de tut golli kai mo zivoto si minono,
kai o manus kai tu cherdan zivil cherricha vreme.#Job 10.20; 14.1-2; Sal 39.5-6; 90.9-10; 103.15-16.
48¡Niko nasti zivil ta te na merel nikada!
¡Niko nasti kurtulilpe katar o meripe!
49Devla,
¿Kaitalo o volipe kai saia tut mai anglal,
kana jalan sovel ande cho chachipe kai ka voli e Davide?
50Devla, de tut golli kai
but llene maren espurnia katar che sluge,
ta sar chidiem gola bilache alava ande mo lio.
51¡Ioi Devla!
¡Gia maren amendar espurnia che dusmanura!
¡Katar go llala gia maren espurnia katar cho lleno
kai si thodo o zeitino pe lete!
52Blagosime te avel o Del ostade.
¡Gia te avelpe! ¡Gia te avelpe!
Currently Selected:
Salmos 89: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
