Salmos 78
78
So cherda o Del pala po foro
Sukar alava kai sikaven katar o Asaf.
1Foro murno, asun mo zakono,
¡thov sama ta asun e alava kai phenav chuke!
2ka dav chuke orba ande paramiche,
ka phenav chuke ezgode kai sea gurudine
sar kana saia o vreme purano.#Mt 13.35.
3Sogo asundam ta llana
kai amare dada phende amenge,
4ni ka guruva len katar amare chaurre.
Ka blagosi e Devle i e porodoia
kai ka avel mai angle,
ka da orba katar leki zor
ta katar leke glamne ezgode.
5O Del thoda iek orba e Jakobeke,
mukla iek zakono ando Israel,
vou phenda amare puranenge
te sikaven le pe chaurrenge,
6te pinllarel le o porodo kai saia te avel,
e chaurre kai saia te biandon,
ta gia i von te sikaven le pe chaurrenge,#Ek 10.2; Dt 4.9; 32.7; Sal 44.1.
7te sai uzdinpe ando Del,
te na bristaren so vou cherda
ta te kanden so phenen leke zakonura.
8Te na aven sargo e purane llene
kai ni kandena ta sea dile
ta pharruvena po lio ta po duo.
¡Vicha kai ni kandela e Devle!#Dt 32.5-6.
9Katar e vicha e Efraineki
kai saia len arkura ta llide te marenpe,
ta die e zea ando llive kana saia te marenpe,
10phagle o alav kai saia len e Devlea
ta ni kamle te kanden ni leko zakono.
11Bristraile katar so cherda o Del,
katar e glamne ezgode kai vou cherda te dikhen.
12O Del cherda bare ezgode angla lenge dada,
ande umal katar o Zoan kai si ando Ejipto.#Ek 7.8—12.32.
13Putarda e mora po dopas ta cherda te nakhen,
achada o pai sargo zido.#Ek 14.21-22.
14Ollivesea thoda iek oblako te sikavel lenge o drom#Ek 13.21-22.
ta suako riat dela len villelo e iagako.
15Po pusto phagla po dopas e pechine
ta dia len te pien but pai.
16¡O Del cherda te likel katar e pechina
iek bari len!#Ek 17.1-7; Nm 20.2-13.
17A von pale cherena o bilachipe e Devleke,
po pusto ni kamle te kanden e Devle.
18Zumade e Devle ande po lio
soke mangle letar o jape kai saia lenge drago.
19Die orba bilachi katar o Del ta phenena:
¿A so, o Del sai thovel amenge iek sinia po pusto?
20Chachimaia o Del phagla e pechina,
ta andral likisto pai sargo iek len,
ta e phuv pherdili pai,
¿a ka del pe foro marrno ta i mas?
21Kana o Del ansunda so phende, jolailo,
¡leki joli phabili sargo iag po Jakob,
ta phabili leki joli i po Israel!
22Soke ni pachaie ando Del
ta ni uzdisaile ande leko braduipe.
23A o Del phenda e oblakonenge
ta putarda e udara katar o miloso,
24¡ta cherda te delpeke pe leko foro o mana,
lliu katar o miloso te sai jan!
25¡O manus jala marrno e suechonengo!
¡O Del dia len but jape!#Jn 6.31.
26E balav katar likel o kham,
e balav katar o sur phurdie ando miloso.
¡O Del anda len pe zoriaia!
27Cherda te delpeke mas pe po foro sargo prajo.
¡Diapeke chiriklia sargo chisai e moraki!
28O Del cherda te peren po maskaral katar o pero
ta truial katar e chare.
29Ta jale lligo ni chalile,
ta gia o Del cherda pe lengo.
30A lengi bok ni lelape,
a o jape saia ande lengo mui,
31kana e joli e Devleki peli pe lende
mule e murusa e mai zurale.
¡Cherda te meren e mai lache llene katar o Israel!#Ek 16.2-25; Nm 11.4-23,31-35.
32A von pale cherde o bilachipe,
ni pachaie ande glamne ezgode e Devleke.
33Goleke o Del lia lengo zivoto
ta getosarda lenge bursa ande bari dar.
34Kana thovela maskar lende o meripe,
ondaka rodena e Devle, irinape lete
ta oma rodena le,
35ondaka denape golli kai o Del arakhela len,
ta kai o Del saia lengo braduimari.
36A pe sukar alavenchar
kojavena e Devle,
37a lengo lio ni saia chacho lea
ta nikada ni kandie
o alav kai achilea e Devlea.#Ech 8.21.
38A e Devleke saia zalba,
prostila lengo bilachipe ta ni zatrila len,
but droma mukla pe iek rig pi joli
ta ni sikada lenge sa pi joli.
39O Del diape golli kai von sea samo manusa,
kai sea sargo e balav, kai llaltar ta ni irilpe.
40¡Gachin droma ni kandie e Devle
ta dukhade le po pusto!
41Ta pale zumavena le,
¡pale zumavena e Devle,
o Santo katar o Israel!
42Ni diepe golli katar gua llive
kana o Del pe zurale vastea
braduisarda len katar o dusmano,
43kana sea ande umal katar o Zoan, ando Ejipto,
ta cherda te dikhon bare ezgode,
44kana cherda te cherdon rat e paia
ta lenge lena, te na pien o pai.#Ek 7.17-21.
45Bichalda pe lende makha kai jana len
ta zambuke te zatrin len.#Ek 8.1-6,20-24.
46Ta o Del cherda o chermo ta e langosta
te jan e septelie kai barilea pala lengo rado.#Ek 10.12-15.
47E krupenchar ta e silea
zatrisarda lenge simochine ta lenge drakha.
48Lenge guruva ta lenge bakre mule
pala e krupe ta e esterliche.#Ek 9.22-25.
49O Del bichalda pe lende pi bari joli:
o silnope, e zatrania ta e briga,
sea e suechura kai zatrin.
50¡Mukliarda pi joli!
Ni arakhla lengo zivoto,
ta dia len kai o meripe.
51¡Ando Ejipto cherda te merel
o purvo chaurro
katar suako familia katar e ejipsiura!#Ek 12.29.
52Ta cherda pe foro te liken sargo bakre,
ta inllarda len maskar o pusto sargo iek stoka.#Ek 13.17; Sal 77.20; Is 63.11-14.
53Cherda len te uzdinpe sar phirena
te na avel lenge dar,
a lenge dusmanura achile telal katar e mora.#Ek 14.26-28.
54O Del anda pe foro angla pi phuv santa,
¡kai o burdo kai vou dobisarda pe chache vastea!#Ek 15.17; Jos 3.14-17.
55Tradia e forura kai sea angla lende,
ta solenchar fulada lengi phuv,
ta thoda te zivin pe lenge thana,
e viche katar o Israel.#Jos 11.16-23.
56A von zumade e Devle kai si ando miloso
ta ni kamle te kanden le ios
ta ni kandie leke alava,#Jue 2.11-15.
57soke isto gia cherde lenge purane,
mukle e Devle ta ni kandie le,
¡bangile sargo iek arko kojamno!
58Joliarde le pala lenge thana vazdine,
cherde le te joliaol pala e dela kai von cherde.
59Ta o Del jolailo kana dikhla gala ezgode
ta istarda bari murzania po Israel.
60Goleke mukla pi chara kai saia ando Silo,
e chara kai saia le maskar e manusa.#Jos 18.1; 1 S 1.3; Jer 7.12-14; 26.6.
61Mukla te len peke e ezgoda mai glamni
katar leki zor.#1 S 4.4-22.
62Gia joliariko saia pe po foro,
kai mukla len po jarni e dusmanoko.
63E chaurre terne mule phabarde,
¡Ni cherdile llilia zinimake e borienge!
64Mundarde e poponen e jarniea,
ta lenge phivlia ni rovde pala lende.
65Ondaka Del llungadilo
sargo katar iek suno,
sargo iek lleno tromano
kai veselilpe katar e mol,
66ta dobisarda pe dusmanonen,
ta cherda len te nasen,
¡mukla len ando lallao ostade!#1 S 5.6,12.
67Mukla pe iek rig e chara katar o Jose,
ta ni esvirisarda e vicha katar o Efrain,
68ta esvirisarda e vicha katar o Juda
o burdo katar o Sion kai volil.
69Cherda po santuario, baro sargo o miloso,
ta cherda te achel istardo ostade sargo e phuv.
70Esvirisarda pe sluga e Davide,
kai saia chobano e bakrengo,
71ikanda le te na llal pala e bakre,
te sai arakhel e Jakobo kai si leko foro,
te e Israele kai si leki phuv.#1 S 16.11-12; 2 S 7.8; 1 Kr 17.7.
72Ta o David arakhla o foro e Devleko,
arakhla ta sikavela lenge o drom
ando va o chacho ta chache liea.
Currently Selected:
Salmos 78: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
