Salmos 55
55
O molipe katar iek lleno kai mangen te zatrin le.
Katar o lleno kai sikavel te llilaben, ande basalde kai si len kuerde. O David sikavel.
1Devla, asun mo molipe,
na gurudo mandar.
2Thou mange sama ta de anglal,
mangav tutar, ta dukhal man mo lio
3pala o avazi katar mo dusmano,
pala e orbe kai den gola kai ni pachan ando Del,
llan pala ma jolinaia ta mangen te zatrin man.
4Mangel te pharrol mo lio,
but dar si mange katar o meripe.
5But bari dar lia man.
¡Izdrav daratar!#Job 4.14.
6Ta phenav:
Voliva te aven man pakha sargo o gulubo,
gia sai furiava te lelpe mandar o chiñipe.
7Furiava ta llavatar but dur,
ta ziviva po pusto.
8Prastava zurale te gurudivav
katar e balav ta katar o bursin.#Jer 9.2.
9Zatrisar len Devla, cher te achadol lengi chib,
soke dikhav kai ando foro samo janpe ta marenpe,
10sorro riat ta sorro llive
llan truial katar e zidura e foroke.
Andre si o bilachipe ta e briga e radoki,
11pe leke droma e llene kojaven ta marenpe
ta po maskaral si o kojaipe.
12Ni dukhada man iek dusmano
kai sai terpisardema leke,
ta ni vazdinailo pe mande gua kai murzil pe mande
kai sai gurudilema letar.
13¡Isto tu sana mo amal,
gua kai sikavela man o drom ta kai saia mi familia,
14kai llava lea ando cher e Devleko
ta daia orba ande veselia,
kai phirava lea maskar e llene!
15¡Daboida te meren me dusmanura!
¡Te peren llunde ando limori
soke o bilachipe si ande lengo lio!
16A me ka moliv man e Devleke,
o Gazda ka braduil man.
17Ka moliv man ta ka rovav
thiarinako ollivesea ta orachaia,
ta vou ka asunel mo avazi.
18Kana ka marav man vou ka kurtulil man,
ka braduil mo zivoto,
i te avena but gola kai marenpe manchar.
19O Del, gua kai charoil ostade,
ka asunel man ta ka mukel len ando lallao,
soke von ni pharruven po zivoto
ta ni daran katar o Del.
20Vazden po va pe llene kai si lenchar ande pas,
ta phagen po alav lenchar.
21Lenge alava si mai kovle neko o kaimako,
a mislinpe te marenpe.
Phenen alava kovle sargo o zeitino,
a lenge alava si sargo iek jarni ostro.
22Muk cho pharipe kai o Del,
ta vou ka del tut zor.
Ni ka mukel peradino ostade
e llene kai kandel le.#Mt 6.25-34; 1 P 5.7.
23Devla,
e llene kai mundaren ta e kojamne
ni ka zivin ni dopas katar po zivoto.
Tu ka chere te peren chak andre ando limori,
a me uzdiu man ande tute.
Currently Selected:
Salmos 55: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
