Salmos 38
38
O molipe te pomozil o Del
Llili katar o David te sai den pe golli.
1Devla, na de pe mande ande chi joli,
ta na dukhav man kana ka joliao.
2Soke peletar pe mande che llide,
¡cho va thodan pe mande!#Dt 32.23-24; Job 6.4; 16.12-13; Lm 3.12-13; Ez 5.16.
3Pala chi joli katar mo bilachipe.
Sa mi esnaga si nasuali,
¡ni iek katar me kokala inai sasto!
4Mo bilachipe si but baro
iek pharipe but baro kai nasti terpiu le.
5Pala mo bilachipe,
o chindipe pe mo mas cherniol ta khandel.
6Sorro llive si mange zalba,
ta llav tristome inai man vlaga.
7Phabon me zea nasualimatar,
¡Sa mi esnaga si nasuali!
8Sa mi esnaga si phagi ta inai man zor,
¡rovav dukhatar andral katar mo lio!
9Devla, tu pinllare sa so me mangav,
¡tu llane kana rovav dukhatar!
10Mo lio marel zurale,
inai man zor,
¡sa truniariko dikhav!
11Me amal ta e llene kai radin manchar,
achen peke dur mandar, dur katar o chindipe kai si pe mo mas,#Job 19.13; Sal 31.11; 69.8; 88.18.
12gola kai mangen te mundaren man thoven mange sole te achadivav,
e llene kai roden mange o bilachipe, den orba katar mi zatrania,
ta sorro llive mislinpe sar ka cheren e beda.
13A me sem sargo kasuko, ni asunav,
sargo iek nemao kai ni del orba.#Is 53.7.
14Sem sargo iek kai ni asunel
ta kai nasti chacharelpe.
15Devla kai san mo Gazda ta mo Del,
me aduricharav tutar te de anglal.
16Samo mangav tutar te na asan peke mandar,
te na urkin veselimatar kana ka perav.
17Ta chachimaia lav te perav,
ta e duk ni lelpe mandar.
18¡Ka phenav mo bilachipe
soke cherel man dosalo!
19Me dusmanura cherdile mai but ta ni llanav soke,
but llene murzin pe mande bi te avel pe mande e dos.
20Pochinde mange o bilachipe po lachipe,
ta dosaren man kana me mangav te cherav o lachipe.
21Devla, ¡na muk man korkorre!
Tu san mo Del, ¡na duriu mandar!
22Tu san mo Del ta mo Braduimari, ¡aide oma te pomozi man!
Currently Selected:
Salmos 38: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
