Salmos 31
31
Sa e vera ando Del
Katar o lleno kai sikavel te llilaben. Llili katar o David.
1Devla, tute gurudivav,
¡na muk man nikada!
¡Braduisar man pala cho chachipe!
2Thou mange sama,
¡sigar, braduisar man isto akana!
Tu san o barr angla amende te gurudivav,
¡tu san e charoina kai gurudivav ta mo braduipe!
3¡Tu san mo barr ta mi charoina!
¡Sikav mange o drom ta arak man, ando liubao katar cho anav!
4¡Ikan man katar e prevarka kai thode mange,
soke tu san kai arakhe man!
5Ande che va mukav mo duo
¡braduisar man, tu kai san o Del katar o chachipe!#Lk 23.46; Ech 7.59.
6Murziu pe llene kai blagosin avere delen kai ni mol len niso.
Mi vera si ando Del.
7Cho volipe anel mange dragostia ta veselia.
Tu dikhlan mi zalba,
pinllare me dukha,
8ni dian man ande va katar o dusmano,
¡Thodan man pe porrne ande iek bari umal!
9Devla, te avel chuke zalba mandar,
soke sem ande nuzda
e duk chiniarel me akha
ta sa mi esnaga.
10¡E duk ta o roipe
jale mo zivoto!
E zalba lel mandar mi zor,
¡mi esnaga jasarel pi vlaga!
11Me dusmanura asan peke mandar,
espurnia maren mandar e llene kai zivin pase,
e llene kai pinllaren man daran mandar.
¡Kogo dikhel man po drom nasel mandar!#Job 19.13; Sal 38.11; 69.8; 88.18.
12Bristraile mandar
sargo kana sem mulo.
Sem sargo iek piri kai phagol pe milia kotora.
13Asunav sar murmalin e llene:
Bari dar si truial.
Sargo iek lleno den orbe bilache mandar,
¡Den orba sar ka mundaren man!#Jer 20.4,10; 46.5; 49.29; Lm 2.22.
14A me Devla, si man vera ande tute,
me phendem gia:
¡Tu san mo Del!
15Mo zivoto si ande che va,
¡Braduisar man katar me dusmanura,
kai roden man!
16Me sem cho sluga,
dik pe mande zalbaia,
ta braduisar man pala cho volipe.
17Chuke moliv man Devla,
¡Na muk te achav ando lallao!
¡Muk ando lallao e bilache llenen,
muk len ando limori!
18Te na den orba e muia kojamne,
kai den orba espurniaia
ta dukhaven e llene kai si chacho.
19¡Gia bari si chi zalba pe llene kai den tut liubao!
Guruvela sargo sunakai
te na dikhen la e llene,
ta fulavela e llenenchar kai si len vera ande tute.
20Guruve len kote kai samo tu dikhe len
bradui len katar o bilachipe kai mangen te cheren lenge e bilache llene,
tala chi chara arakhe len
te na asunen sar kusen len lenge dusmanura.
21Blagosime te avel o Del,
soke pe volimaia cherda mange bare ezgode
kana sema ande nuzda.
22Ni llanava so ka cherav, ta misliva kai
chudian man tutar,
a kana manglem te pomozi man
tu asundan sar mangava tutar.
23Volisaren e Devle, sa gola kai llan pala le.
O Del volil sa golen kai si chache,
a golenge kai si barikane,
pochinel lenge zurale so si te len.
24Len zor ande tumare lie
sa gola kai si len vera ando Del.
Currently Selected:
Salmos 31: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
