Salmos 119
119
E Devleko zakono si blagosime
1Blagosime gola kai llan orta
ta kai llan pala o sikadipe e Devleko.#Sal 1.1.
2Blagosime gola kai thoven sama
pe leke zakonura,
ta roden le sa pe liea.
3Von ni cheren ni iek bilachipe,
soke llan po drom e Devleko.
4Tu phendan kai che zakonura
si te cherdon sa chachimaia.
5¡Daboida te llav orta
ta te kandav che zakonura!
6Ni ka avel soke te lallav
kana ka thovav sama pe sa che zakonura.
7Ka blagosiv tut iekhe chache liea
kana ka sikivav che zakonura kai si chache.
8¡Mangav te kandav che zakonura!
¡Na muk man nikada!
9¿Sar ka chistol po zivoto iek terno?
¡Te kandela che alava!
10Me rodav tut sa me liea,
na muk te durivav katar che zakonura.
11Che alava thodem ande mo lio
te na cherav chuke o bilachipe.
12¡Te ave blagosime tu, Devla!
¡Sikav man che zakonura!
13Suako drom ka phenav
sa e zakonura kai tu phendan.
14O drom katar che zakonura
veselil man mai but neko sa o barvalipe.
15Ka misliu man ande che zakonura
ta ka thovav sama pe che droma.
16Ka veseliu man ande che zakonura
ta ni ka bristarav che alava.
17¡De man zivoto kai sem cho sluga!
¡Ta ka kandav che alava!
18Putar me akha,
te dikhav cho glamno sikadipe.
19Me llav pe gava sueto,
na guruv mandar che zakonura.#Sal 39.12; 1 P 2.11.
20Sorro llive sem brigime
soke mangav te pinllarav che zakonura.
21Tu de pe llene barikane
ta pe llene prokete
kai durion katar che zakonura.
22Duriar mandar o kusipe ta e joli,
soke kandiem che zakonura.
23I te chidiniaona e llene kai gazdarin
te dosaren man,
me ka misliu man ande che zakonura.
24Drago mange che zakonura,
von sikaven man.
25Po meripe sem,
¡de man zivoto, prema cho alav kai dian!
26Sikadem chuke sogo cherdem,
ta dian man anglal,
sikav mange che zakonura.
27¡Cher te acharav che zakonura!
te sai misliu man ande che glamne ezgode.
28Mo lio pharrol katar e briga,
¡De man zor, prema e sovel kai jalan!
29Duriar man katar o kojaipe
ta ande chi zalba
sikav mange cho zakono.
30Esvirisardem o drom katar o chachipe
ta mangav che zakonura.
31Devla, istardilem pe che zakonura,
¡Na muk man ando lallao!
32Sigarav te kandav che zakonura
soke tu phere veselia mo lio.
33Devla, sikav man o drom
katar che zakonura,
soke mangav te phirav pe lende
llik kai o son.
34De man o bizaipe
te kandav cho zakono,
¡mangav te kandav le sa me liea!
35Inllar man po drom katar che zakonura,
soke kana phirav pe lende sem veselo.
36Cher mo lio te mangel che zakonura
a na e love kai lenpe bilachimaia.
37Na muk te dikhav pe dela kojamne,
¡De man zivoto te llav pe cho drom!
38Chachar mange cho alav
kai sem cho sluga te dav tut liubao.
39Duriar mandar e espurnia
kai daravel man,
soke che zakonura si lache.
40Me mangav che zakonura,
¡de man zivoto soke tu san chacho!
41Devla, an mange cho volipe
ta cho braduipe gia sar dian cho alav.
42Gia sai ka dav anglal
goleke kai kusel man,
soke uzdiu man ande cho alav.
43Na le mandar nikada
o alav katar o chachipe,
soke uzdiu man ande cho chachipe.
44¡Mangav te kandav cho zakono,
ostade, sa o vreme!
45Ta ka ziviu mukliardo,
soke llelem pala che zakonura.
46Ka dav orba katar che zakonura
angla e charura ta ni ka lallav.
47Soke voliu che zakonura
ta veseliu man lenchar.
48Volimaia vazdav me va
karing che zakonura,
ta misliu man but ande che alava.
49De tut golli o alav kai dian che sluga,
ande lete cherdan te aduricharav.
50Ta gava del man zor ande zalba,
soke che alava den man zivoto.
51E llene barikane
maren mandar espurnia suako llive,
a me ni durivav katar cho zakono.
52Devla, misliu man
ande e zakonura e purane,
ta ande lende liem mange zor.
53Pherdivav joli kana e llene bilache
muken che zakonura.
54Che zakonura si me llilia
pe gaia phuv kai inai murni.
55Devla, orachaia dav man golli tutar,
¡mangav te kandav cho zakono!
56Gala ezgode liem:
te kandav che zakonura.
57Devla, tu san sa so si man,
jalem sovel te kandav
sa so phenen che alava.
58Sa me liea rodiem tut,
le man lachimaia,
prema cho alav kai dian.
59Mislisailem so cherav,
ta irisailem te phirav prema che zakonura.
60Ni jasardem o vreme ta sigardem
te kandav so phenen che zakonura.
61E llene bilache si truial mandar
ta mangen te peraven man,
a me ni bristrailem katar cho zakono.
62Po dopas katar e riat
ustav te dav tut fala
pala che zakonura e chache.
63Ta sem amal katar gola kai blagosin tut,
ta katar gola kai kanden che alava.
64Devla, cho volipe si pe sa o sueto,
¡sikav man che zakonura!#Sal 35.5.
65Devla, tu avilan lacho che slugaia,
prema sar dian cho alav.
66Sikav man te misliu chachimaia
ta te avel man bizaipe,
soke uzdiu man ande che zakonura.
67Mai anglal te achav ando lallao
cherdem but ezgode bilache,
a akana kandav che alava.
68Tu san lacho ta chere o lachipe,
¡sikav man che zakonura!
69E llene barikane
dosaren man kojaimaia,
a me cherav sa me liea
so phenen che alava.
70Lengo lio si but zuralo,
a me veseliu man ande cho zakono.
71Cherda mange sukar kai jalem lallao,
soke gia sikilem che zakonura.
72Mai lache si mange e alava
kai liken katar cho mui,
neko but milie tolaria sunakune ta rupune.
73Tu cherdan man che vastenchar,
¡de man bizaipe te sikivav che zakonura!
74E llene kai blagosin tut
veselinpe kana dikhen man,
soke uzdiu man ande che alava.
75Devla, me llanav
kai che zakonura si chache,
ta kai chere so si orta kana dukhave man.
76¡Sikav mange cho volipe ta de man zor
prema o alav kai dian man!
77Sikav mange cho volipe ta ka ziviu,
soke cho sikadipe veselil man.
78Te achen ando lallao e llene barikane
kai dukhaven man bi dosako.
A me ka misliu man ande che zakonura.
79Te chidiniaon manchar
gola kai den tut liubao,
gola kai pinllaren che zakonura.
80Te avel mo lio orta ande che zakonura,
te na avel man soke te lallav.
81Mangav tutar sa me liea te bradui man,
¡aduricharav ande cho alav!
82Me akha chinion
kai aduricharav cho alav,
ta phenav:
¿Kana ka ave te de man zor?
83Me sem phuro ta bristraile mandar,
a me ni bristrailem katar che zakonura.
84¿Gachin ios ka aduricharav?
¿Kana ka krisi golen kai dukhaven man?
85E llene kai istardon
ta kai ni kanden cho sikadipe
thoven mange kojaipe pe mo drom.
86¡Pomozisar man soke dukhaven man
bi te avel pe mande e dos!
¡Sa che zakonura si chachune!
87Sem sargo chudino pe phuv,
a ni muklem che zakonura.
88De man zivoto prema cho volipe,
ta ka kandav e alava kai tu phendan.
89Devla, che alava si ostade,
¡ta istarde si ando miloso!#Is 40.8.
90Tu san chacho ostade,
tu istardan e phuv, ta achili pe porrne.
91Sa e ezgode si istarde
prema che zakonura,
ta sa radin chuke.
92Te na andaia veselia cho sikadipe,
e zalba mundardaia man.
93Nikada ni ka bristarav man
katar che alava,
soke lenchar dian man zivoto.
94¡Braduisar man soke sem chiro
ta llelem pala che alava!
95E bilache llene,
roden kana ka zatrin man,
a me thovav sama che alavenge.
96Me dikhlem kai suako ezgoda si la o son,
a che alava si ostade.
97¡Gachin voliu cho zakono!
¡Sorro llive misliu man ande lete!
98Che alava si murne ostade,
cherde te avav mai bizai
neko me dusmanura.
99Acharav mai but
neko e llene kai sikade man,
soke misliu man but ande che alava.
100Acharav mai but neko e llene purane
soke kandav che alava.
101Ni phirav po bilacho drom
te sai cherav so tu phendan.
102Ni durilem katar che krisa
soke tu sikave man.
103Che alava kai dian man
si mai gugle mange
neko o aullin ande mo mui.#Sal 19.10.
104Katar che alava liem o bizaipe,
goleke murziu kana cheren o kojaipe.
105Che alava si iek memeli
kai del villelo pe mo drom.#Pr 6.23.
106Diem mo alav ta ka cherav le:
¡ka cherav so phenen che krisa
e chache!
107Bari nuzda si mange,
¡de man zivoto prema cho alav kai dian!
108Devla, le mo molipe,
ta sikav man che krisa.
109Suako llive sem pe dar te merav,
a ni bristarav man katar cho zakono.
110E llene bilache
thoven mange sole te perav,
a me ni durilem katar che alava.
111Murne si te aven che alava ostade,
von si e veselia katar mo lio.
112Sa me liea manglem te cherav
so phenen che alava,
ostade llik kai o son.
113Murziu pe llene kojamne,
a voliu cho zakono.
114Tu guruve man ta arakhe man,
ande cho alav me uzdiu man.
115¡Len tumen mandar, bilache llene,
soke mangav te kandav
e alava me Devleke!
116De man zor
prema cho alav kai dian,
ta ka ziviu,
¡na muk man ando lallao pe so aduricharav!
117Pomozisar man ta ka avav braduime,
ta gia suako llive ka kandav che alava.
118Tu muklan pe iek rig
golen kai durion katar che alava,
soke lengo bizaipe si kojaipe.
119Sargo llubri si chuke pe phuv
e llene bilache,
goleke me voliu che alava.
120Mi esnaga izdral daratar angla tu,
¡ta izdrav daratar katar che krisa!
121Sa mo zivoto cherdem so si orta,
na muk man ande va katar me dusmanura.
122Cher te llal mange sukar,
te na dukhaven man e llene barikane.
123Me akha chinion
kai aduricharav cho braduipe
ta pala o chachipe kai phendan te chere.
124Cher che slugaia prema cho volipe,
¡sikav man che alava!
125Me sem cho sluga. De man bizaipe,
soke mangav te pinllarav che alava.
126Devla, avilo o vreme te chere vareso,
soke phagle cho zakono.
127Goleke me voliu che alava
mai but neko o sunakai mai kuch.
128Goleke me llav prema che alava
ta murziu kana cheren e ezgode kojaimaia.
129Che alava si glamne
goleke kandav len.
130Kana che alava sikadon, den villelo
ta bizaipe e llenen kai ni istardon.
131Veselimaia dav orba,
soke zeliu che alava.
132Dik pe mande,
te avel chuke zalba mandar,
gia sar chere golenchar kai volin tut.
133Cher te phirav prema che alava,
na muk te gazdaril pe mande o bilachipe.
134Kurtulisar man
katar o silnope e suetoko,
ta ka kandav che alava.
135Dik lachimaia pe cho sluga,
ta sikav man che alava.
136Bare ausa peren katar me akha
soke inai liubao pe cho zakono.
137Devla, tu san chacho,
ta che krisa si orta.
138Sa che alava
si orta ta chachune.
139Merav jolinatar, soke me dusmanura
bristraile katar che alava.
140Cho alav si but chacho,
goleke cho sluga volil cho alav.
141Minono sem ta murzin pe mande,
a me ni bristrailem katar che alava.
142Cho chachipe si chacho ostade,
ta cho zakono si o chachipe.
143Sema ande zalba ta ande nuzda,
a che alava veselisarde man.
144Che alava si chache ostade,
¡de man bizaipe te sai ziviu!
145Devla, ikharav tut sa me liea,
¡de man anglal,
ta ka kandav che alava!
146Chuke moliv man, pomozisar man
ta ka kandav che alava.
147Mai anglal te llivosaol,
ustav te mangav tutar te pomozi man,
aduricharav cho alav kai dian.
148Sorro riat ni sovav,
te misliu man ande cho alav.
149Devla, asun mo avazi pala cho volipe,
de man zivoto, pala cho chachipe.
150Pase si gola kai roden te dukhaven man,
a von si dur katar cho zakono.
151Tu Devla san pase,
ta sa che zakonura si chachune.
152But vreme pinllarav che alava,
kai tu cherdan te aven ostade.
153Dik pe mande ta le mandar e nuzda,
soke ni bristrailem katar cho zakono.
154Mar tut cheres ma ta braduisar man,
¡de man zivoto, prema cho alav kai dian!
155Cho pomozipe si dur
katar e llene bilache,
soke ni llan pala che alava.
156Devla, cho volipe si but baro,
de man zivoto, prema cho chachipe.
157But llene si dusmanura
ta murzin pe mande,
a me ni durivav katar che alava.
158Nasti terpiu e llenen kai inai chache,
golen kai ni kanden che alava.
159Devla, dik sar voliu che alava,
¡de man zivoto pala cho volipe!
160Ande sa cho alav si o chachipe,
chache ta ostade si sa che krisa.
161Llene kai gazdarin llan pala mande
bi te avel pe mande e dos,
a mo lio del liubao che alavenge.
162Me sem veselo pala cho alav kai dian,
sargo kana iek lleno malavel
iek baro barvalipe.
163Murziu po kojaipe ta nasti terpiule,
a voliu cho zakono.
164Efta droma ando llive blagosiv tut
pala che chache krisa.
165Gola kai volin cho zakono si ande pas,
ta niso ni peravel len.
166Devla, aduricharav te bradui man,
ta cherdem so phenen che alava.
167Me kandav so phenen che alava
ta voliu len sa me liea.
168Me kandav che zakonura,
ta so tu phendan te chera,
¡tu llane so cherav!
169Devla, te resel mo urkipe llik tute,
¡de man bizaipe, prema cho alav!
170Te resel mo molipe llik tute,
¡braduisar man, prema cho alav kai dian!
171Te blagosil tut mo mui,
kana ka sikave man che alava.
172Ka dav orba katar cho alav kai dian,
soke sa che alava si chache.
173De man cho va ta pomozisar man,
soke manglem che alava.
174Devla, ¡mangav te bradui man!
¡Me sem veselo pala cho zakono!
175Mangav te ziviu te blagosiv tut,
te pomozil man cho chachipe.
176Jasailem sargo iek bakro,
¡aide te rode man,
soke ni bristrailem katar che alava!#Is 53.6; Jer 50.6; Ez 34.11-16.
Currently Selected:
Salmos 119: BACHRO
Highlight
Share
Compare
Copy
Want to have your highlights saved across all your devices? Sign up or sign in
Biblia ande chib Romani © Sociedad Bíblica Chilena, 2018.
